Read Zotung Chin BYAPIATU 8 Bible Online

BYAPIATU 8 - Zotung Chin bible

BYAPIATU 8

¹Efraim phin hae nynh Gideon kha, “Midian hae dou khylan na ccia lyaze pawccemou kaening nae kobua khyh? Kae tungvaw na rynaw hynh pawmou athua?” cite ci hae zah thawte a seisah hae.

²Te Gideon nynh minmin kha, “Na cyi oh paw te touseku lanze ka cyipaw hynh paw san athua zawtou? Efraim misu ccamua tuh Abiezer misu thae lopaw laeze hoyhua khyh tou?

³Pachia nynh Midian rhawbawi hae Oreb te Zeeb kha nae kuih kya ae pya vae oh; na cyi oh paw te touse lanze kae tuh pawmou ka cyi kho?” a cipya hae. E bya he a ho te, mih thinrianaw tuh adae.

⁴Te Gideon te a kya um hae paw za thum tuh Jordan vaw thua hae zah a zua hae, thawbangte rhaw hae kha a deehui hae.

⁵Tukeiccuze Gideon nynh Sukkoth khuaccaaw hae kha, “Thawccinawte kae yn zui hae paw hynh sanlou beih pya oh, pawccecize mih thawbang vae, kae tuh Midian siapharan hae Zebah te Zalmunna kha ka deehui cciamang hae,” a cipya hae.

⁶Thuasalama Sukkoth khua e bawi hae nynh, “Kaening nynh na rhawkaw hae kha sanlou kae pya lan hae paw tuh, Zebah te Zalmunna tuh na kuih kya a thua vae hae zawtou?” a cipya hae.

⁷Gideon nynh khung hae zah, “Ahoy, Zebah te Zalmunna kha BAWIPAW nynh ka kuih kya he yn pya te, nae ngesaw kha ramkaw e hinpaw te thabu kya kae syde cih oh,” a cipya hae.

⁸Tuin kyate Penuel khua lang cceihthung zah minmin kha tuhmaminte a ngia hae; Penuel khuaccaaw hae nynh Sukkoth khuaccaaw hae hawte bya a khung hae.

⁹Te Gideon nynh Penuel khuaccaaw hae kha, “Taenaw te he kae ki te, e innhangpaw hynh ka tingsah cih,” a cipya hae.

¹⁰Zebah te Zalmunna tuh mih rhawkaw hae ryte Karkor khua kya a um hae, thong haw lae pangaw loukaw a um hae, tuh-e hae balyn tuh nithua lang e ccungccaw hae mih rhawkaw hae balyn kya-e a laehy hae paw nynh thua hae; zunghe kyngpaw ccungccaw cciing kheit thong kuin a chih hae.

¹¹Gideon tuh Nobah te Jogbehah nithua lang, khuaccongnaw laanpi khate cceihthung zah, rhaw hae kha a tuk hae; pawccecize rhaw hae tuh rhawviaku leite a la um hae.

¹²Zebah te Zalmunna tuh a ccue hae; Gideon nynh deehui hae zah Midian siapharan lu ning Zebah te Zalmunna kha a kyng hae, mih rhawkaw hae balyn kha a siisaku hae.

¹³Joash ccapaw Gideon tuh rhawtuknaw kyate Heres mua kaethungnaw kyakhate a ki lyakhe,

¹⁴Sukkoth khuapaw ccangvaepaw lu kheit kha kyng zah bya a khia; tuh-e paw nynh Sukkoth khua e bawi hae te piccan hae sung sari lu sari min kha a zeipya.

¹⁵Te Gideon tuh Sukkoth khuaccaaw hae kalan yn cceih zah, “ ‘Kaening nynh na rhawkaw hae kha sanlou kae pya lan hae paw tuh, Zebah te Zalmunna tuh na kuih kya a thua vae hae zawtou?’ cite nanning nynh mih konglang nae hopya oh paw Zebah te Zalmunna tuh hein kya a um hae,” a cipya hae.

¹⁶Tetuh khua kya-e piccan hae kha ko hae zah ramkaw e hinpaw te thabu khate Sukkoth khuaccaaw hae kha a syde hae.

¹⁷Penuel khua e innhangpaw kha mah tingsah zah khuaccaaw hae kha a chia hae.

¹⁸Te Gideon nynh Zebah te Zalmunna kha, “Tabor khua kya na chia hae paw kha teimou a um hae?” cite khia hae zah, minmin nynh, “Mih balyn mawte namaw hawte nynh athua hae; siapharan ccapaw hae nynh a lo hae,” cite a khung hae.

¹⁹Te Gideon nynh, “Minmin tuh ka uno hae thua hae zah ka nung ccapaw hae nynh athua hae; BAWIPAW tuh a hiin thyhte, mih hiinnaw kha na la haang oh zetuh, nanning kha kae theih lan khyh oh,” a cipya hae.

²⁰Tetuh a ccatawccaw Jether kha, “Thokuh lah theih hae!” a cipya. Thuasalama aning tuh ccangvae taraw athua ung keiccuze rih zah a thaloi kha thuaakuh khyh.

²¹Te Zebah te Zalmunna nynh, “Namaw ccaccei nynh yn cceih lah oun theih; pawccecize ccungccaw tuh piccan athua thyhawte a thawzung mah athuabua,” a ci hae. Tukeiccuze Gideon nynh Zebah te Zalmunna kha theih hae zah, mih kalauh hae nging kya a ccaannaw hae paw uccaw hae kha a law.

²²Tetuh Israel hae nynh Gideon kha, “Nang nynh kaening hynh oun uk, namaw, na ccapaw te na mintaw nynh mah oun uk hae sah; pawccecize Midian kuih kyate kaening kha nae luesah vae,” a cipya hae.

²³Gideon nynh minmin kha, “Kae nynh kae uk lan khyh oh, ka ccapaw nynh mah ae uk lan khyh oh; BAWIPAW nynh ae uk cih oh,” a cipya hae.

²⁴Te Gideon nynh minmin kha, “Uccaw ccangkheit ngia kae ry oh; luadete na lawku oh paw nakuahuing kha bebe yn pya oh,” a cipya hae. (Pawccecize rhaw hae tuh Ishmael phin thua hae zah sui nakuahuing a hoi hae.)

²⁵Minmin nynh, “Lungthote kae pya cih,” a ci hae. Te boei kha phae hae zah, a luade hae paw nakuahuing hae kha mih balynte boei vawlan a nung hae.

²⁶Gideon nynh a ngia hae paw sui nakuahuing tuh sui shekel thong kheit za sari ari (ccaankunawpaw uccaw, si alungmung, Midian siapharan hae nynh a lawku hae paw sephaphuhpaw boeining hae te mih kalauh hae nging kya a ccaannaw hae paw uccaw hae hobia leite).

²⁷Tuh-e hae tuhte Gideon nynh ranpibawi angki zung kheit rae zah amaw khua, Ofrah khua kya a nung; Israel hae balyn nynh tuin kyakhe ohhuakuh hae zah, tuh-e tuh Gideon te a innbyn hanlan kaang lang a tang.

²⁸Tuhcite Midian tuh Israel hae nynh tae hae zah, mih lu hang vae khyh hae. Tuhcite ram tuh Gideon she kya kum sung pali lungkhu adae.

²⁹Joash ccapaw Jerubbaal tuh amaw inn lang cceih zah a um.

³⁰Gideon tuh zu patae hoi zah a ciihan, ccapaw sung sari a saah.

³¹Shekhem khua kya umpaw a lovaenung nynh mah ccapaw lu kheit saahpah zah, Abimelek cite min a phu.

³²Te Joash ccapaw Gideon tuh myarya a taw te a chih, Abiezer hae khua Ofrah khua umpaw a paaw Joash shawku kya a uu hae.

³³Gideon he a chih takaw te, Israel hae tuh mimaw mamin lang tang hae zah, Baal pachia khate ohhuakute Baal-berith kha mih pachia lang a raeku hae.

³⁴Mih pepan po voilu lan um hae paw mih rhaw hae balyn kuih kyate a luesah hae paw BAWIPAW mih Pachia kha tuathui vae khyh hae;

³⁵te Gideon nynh Israel hanlan a la cyipaw hoynaw balyn hanlan liarute, Jerubbaal (tuh-e tuh Gideon nynh thua) innbyn tungvaw kya lungzinaw langsakuh vae khyh hae.