Read Zotung Chin BYAPIATU 9 Bible Online

BYAPIATU 9 - Zotung Chin bible

BYAPIATU 9

¹Jerubbaal ccapaw Abimelek tuh Shekhem khua e a nung puizia hae kalan cceih zah, minmin te a nung puizia hae balyn kyakhe,

²“Shekhem khua e uktu hae balyn nynh a thaenaw hae kyakhe, ‘Nae hanlan pawmou ahoyhua, Jerubbaal ccapaw hae sung sari nynh mih balynte ae uk oh paw tou, tuhkhyhze lu kheit nynh ae uk oh paw tou?’ cite la khiatua oh. Kae tuh nae ru te nae saw ka thuapaw hynh mah la ning nan oh,” a cipya hae.

³Tukeiccuze tuh-e bya balyn tuh a nung puizia hae nynh Shekhem khua e uktu hae a thaenaw hae khe Abimelek ccelang a hopya hae; minmin tuh Abimelek nulang zuiku rynaw thinlung a hoi hae, pawccecize minmin nynh, “Abimelek tuh aening uno nynh thua,” a ci hae.

⁴Minmin nynh Baal-berith inn lungkhu e ngunphua sung sari kha a pya hae, tuh-e ngunphua tuhte Abimelek nynh a nulang a zuikuh lanpaw ccungccaw, ccungkia leipaw te a hynhu hae paw kha a hoh hae.

⁵Ofrah khua umpaw a paaw inn lang cceih zah, Jerubbaal ccapaw hae, a uno hae sung sari kha lungpi ccangkheit vawlan khe a chia hae; thuasalama Jerubbaal a ccasoipaw Jotham tuh zya rekuh zah a hiinhy.

⁶Te Shekhem khua e uktu hae balyn te Beth-millo khuaccaaw hae balyn tuh sueluakuh hae zah, Shekhem khua e liathuinawpaw phaesi ku pe khe Abimelek kha siapharan lang a khang hae.

⁷Tuh-e konglang tuh Jotham kha he a hopah hae tuh, Gerizim Mua dung lang kae zah a thadyn, te thawte sia zah minmin kha, “Shekhem uktu hae, Pachia nynh nae bya ae ngaepya nawlan oh, ka bya hynh ngaetua oh.

⁸Vae kheit tuh thingku hae nynh mih siapharan lang chitui thuh khylan cceih hae zah, oliv ku kha, ‘Kaening hynh oun uk,’ a cipya hae.

⁹Oliv ku nynh minmin kha, ‘Ccungccaw hae te pachia hae kha sawtuanaw pyanawpaw ka tho hoypaw hynh cciatawte, thingku hae kha uk khylan ka cceih cih aa tou?’ a ci.

¹⁰Te thingku hae nynh thaeku ku kha, ‘Nang nynh yn cceih lah, kaening hynh oun uk,’ a cipya hae.

¹¹Thuasalama thaeku ku nynh, ‘Ka enaw te athuapaw ka thae kha nungsyate, thingku hae kha uk khylan ka cceih cih aa tou?’ a cipya hae.

¹²Te thingku hae nynh misu ku kha, ‘Nang nynh yn cceih lah, kaening hynh oun uk,’ a cipya hae.

¹³Thuasalama misu ku nynh, ‘Ccungccaw hae te pachia hae kha mih lungtuasahpaw ka misutui kha cciatawte thingku hae kha uk khylan ka cceih cih aa tou?’ a ci.

¹⁴Tukeiccuze thingku hae balyn nynh hinpawbu kha, ‘Nang nynh yn cceih lah, kaening hynh oun uk,’ a cipya hae.

¹⁵Hinpawbu nynh thingku hae kha, ‘Nanning nynh siapharan lang khang khylan thanccingte chitui nae thuh oh zetuh, oun cceih oh lah, ka mynlyh kaw kya um oh; thuasalama tuhcite athua khyh zetuh, hinpawbu kyate maee yn pou sah lah, Lebanon kya-e sidar thing hae kha u hae sah,’ a cipya hae.

¹⁶“Tukeiccuze Abimelek kha siapharan lang khangkute nanning nynh lungzi sawtuate na um oh ze thuasah, Jerubbaal te a puizia hae kha hoyte na ccuepe oh zah, a ryalaw mee thyhte na liaru oh ze thuasah,

¹⁷ka paaw nynh nae hanlan rhaw ae tukpah oh zah, a hiinnaw pyakute Midian hae kuih kyate ae luesah oh;

¹⁸thuasalama atunin nanning nynh ka paaw puizia hae kha na dou oh zah, a ccapaw hae sung sari kha lungpi ccangkheit vawlan na chia oh; te a seenung ccapaw Abimelek tuh nae puizia athua keiccuze Shekhem khuaccaaw hae kya siapharan lang na nung oh.

¹⁹Atunin nanning nynh Jerubbaal te a puizia hae kya lungzi sawtuate na um oh ze, Abimelek tungvaw nae lungtua sah lah, aning nynh mah nae tungvaw a lungtua sah;

²⁰thuasalama tuhte athua khyh zetuh, Abimelek kyate maee pou sah lah, Shekhem te Beth-millo khuaccaaw hae kha u hae sah; te Shekhem te Beth-millo khuaccaaw hae kyate mah maee pou sah lah, Abimelek kha u sah,” a ci.

²¹Te Jotham tuh a uno Abimelek raw a ri keiccuze ccue zah, Beer khua lang cceih zah tuin kya a um.

²²Abimelek nynh Israel kha kum thum a uk.

²³Pachia nynh Abimelek te Shekhem khuaccaaw hae laku kya muisaw hoyleipaw kha sawnua hae zah, Shekhem khuaccaaw hae nynh Abimelek tungvaw mih lungzi vae khyh.

²⁴Tuhte acyikupaw tuh, Jerubbaal ccapaw hae sung sari kha puathote theih hae zah, tuh-e hae chiise tuh a theihtupaw mih uno Abimelek tungvaw thuasah, a uno hae chia khylan thawzung a pya hae paw Shekhem khuaccaaw hae tungvaw thuasah accaw keiccu nynh thua.

²⁵Abimelek kha buh khylan Shekhem khuaccaaw hae nynh mua dung hae kyakhe ccungccaw nung hae zah, tuh-e hae nynh tuh-e laanpi kya a cceihpaw balyn kha uccaw a luade hae; tuh-e konglang tuh Abimelek kha a hopya hae.

²⁶Ebed ccapaw Gaal nynh a puizia hae ryte Shekhem khua lang nuekuh zah, Shekhem khuaccaaw hae nynh amaw kha a doliaku hae.

²⁷Loo lang cceih hae zah mih misu khokhu kya-e misu thae kha pumte su hae zah, poi a tua hae. Mih pachia inn lungkhu lang teete ae hae neih hae zah, Abimelek kha a sarya hae.

²⁸Ebed ccapaw Gaal nynh, “Kaening Shekhem khuaccaaw hae tuh ahum kae thua zah, Abimelek tuh ahum athua keiccu mou rya kae lawpya lanpaw tuh? Jerubbaal ccapaw te a kuihkaw e bawi Zebul nynh Shekhem paaw Hamor a ccungccaw hae kha ryalawpah khyh hae tou? Pawccemou kaening nynh Abimelek kha rya kae lawpya lanpaw tuh?

²⁹E ccungccaw hae hynh ka kuihkaw um hae ravo nyn! Tuhte a la thua ze, Abimelek kha ccaring ka dee cih zah, ‘Na rhawkaw hae kha lungsah chih hae lah, yn pou,’ ka ci cih paw,” a ci.

³⁰Ebed ccapaw Gaal bya kha Shekhem khua uktu Zebul nynh a thae te, a thinrianaw tuh maee lang arua.

³¹Aning nynh Abimelek kalan, Arumah langkhe ccungccaw saw zah, “Dotua, Ebed ccapaw Gaal te a puizia hae nynh Shekhem lang oun cceih hae zah, nang kha dou khylan khuaccaaw hae kha a tuhou hae.

³²Tukeiccuze nang te na umkheih oh paw rhawkaw hae nynh khuazi khe cceih oh lah, loo kyakhe buh oh.

³³Awkhua takaw, khuanin thua takaw te, thokuh oh lah, khua kha thiing oh; aning te a umkheih hae paw rhawkaw hae nynh nanning dou khylan he oun pou hae te, na cyi kho thyh oh te na cyih cih oh,” a cipya.

³⁴Tukeiccuze Abimelek te a rhawkaw hae balyn tuh khuazi khe thokuh hae zah, phu pali lang phiakute Shekhem khua kha a buh hae.

³⁵Ebed ccapaw Gaal tuh toikuh zah khua koikua teenaw kya he a thadyn te, Abimelek te a umkheih hae paw rhawkaw hae nynh a buhnaw hae kyate a thonuaku hae.

³⁶Gaal nynh minmin kha he a muih hae te, Zebul kha, “Dotua, mua dung hae kyate ccungccaw hae oun rungbung hae!” a cipya. Te Zebul nynh, “Mua a mynlyh kha nynh ccungccaw hae lang na ria,” a cipya.

³⁷Gaal nynh bua hopah zah, “Dotua, ram angaelung kyate ccungccaw hae oun rungbung hae, phu kheit tuh Beidinhothya hae paw kya-e Phaesi ku kalan te oun cceih hae,” a cipya.

³⁸Te Zebul nynh amaw kha, “ ‘Kaening nynh rya kae lawpya lanpaw Abimelek tuh hummou athua?’ cite na hopaw na bya kha atu teimou a um vae. E ccungccaw hae hynh pawlang na ria lei hae paw kha thua khyh hae tou? Atu toikuh lah, tuktua hae,” a cipya.

³⁹Tukeiccuze Gaal tuh Shekhem khuaccaaw hae malang khe toikuh zah Abimelek te rhaw a tukkuh hae.

⁴⁰Abimelek nynh dee zah a malang khe Gaal tuh a ccue; koikua teenaw kyacia ccungccaw patae vaemaw muete a khuliakuh hae.

⁴¹Te Abimelek tuh Arumah kya a um; Zebul nynh Gaal te a puizia hae kha Shekhem khua kya a um khyh nawlan hae ccaring a dee hae.

⁴²Awkhualan khe ccungccaw hae tuh loo lang a cceih hae. Tuh-e konglang tuh Abimelek he a hopah hae tuh,

⁴³a rhawkaw hae kha ko hae zah, phu thum lang phiate loo kya a buh hae. Khua kyate oun toikuh hae paw kha do zah he a muih hae tuh, thonuakuh hae zah a chia hae.

⁴⁴Abimelek te a umkheih hae paw aphu nynh malang naang hae zah khua koikua teenaw kyakhe a thadyn hae, tuh ccyh lyakhe phu ning hae nynh loo kya umpaw balyn kha naang hae zah a chia hae.

⁴⁵Abimelek nynh khuapi kha anin ninlang tuk zah a lah koute khua kya umpaw balyn kha a chia hae, khua kha khaleih roh zah loi a phing.

⁴⁶Shekhem Innhangpaw kya um hae paw balyn nynh tuh-e konglang tuh he a thae hae te, El-berith beikinn rhawlungrua lungkhu lang a tee hae.

⁴⁷Shekhem Innhangpaw kya um hae paw balyn tuh a sueluakuh hae cite Abimelek kha a hopya hae.

⁴⁸Tukeiccuze Abimelek tuh a umkheih hae paw rhawkaw hae balyn ryte Zalmon Mua lang a kae hae. Abimelek nynh hae zung kheit ccyngkute thingran ran kheit kha bae zah, a raw kya a khangku. Te aning nynh rhawkaw hae kha, “Ka cyipaw na muih oh thyhte arangte cyih oh,” a cipya hae.

⁴⁹Tukeiccuze rhawkaw miakaw nynh thingran kha ccarou baekuh hae zah Abimelek nulang zuikute khualungrua kha a pumnua hae, te khualungrua kha maee te soi hae zah, Shekhem Innhangpaw kya-e ccungccaw balyn, nopi pise thong kheit loukaw a chih hae.

⁵⁰Te Abimelek tuh Thebez khua lang cceih zah, Thebez kha ryahmin tahnuakute a law.

⁵¹Thuasalama khuapi lungkhu kya sihkakinpaw innhangpaw ccangkheit a um, khua kya um hae paw nopi pise balyn tuh tuh-e innhangpaw kalan ccue hae zah a khawsungkuh hae; innhangpaw innccuvaw lang a kae hae.

⁵²Abimelek nynh tuh-e innhangpaw kha ccianuate tuk zah, maee te u khylan tuh-e innhangpaw teenaw kalan khe a naekuh.

⁵³Nopinung lu kheit nynh sungmia-lung te Abimelek lu kha sawphu zah, a luru akoi.

⁵⁴Tetuh a rhawtuk-uccaw a ccyngpahpaw ccangvaepaw kha ko kangmaw zah, “Na thaloi kha thuaakuh lah, yn theih; tuhteze nynh ccungccaw hae nynh, ‘Nopinung nynh aning kha a theih,’ cite yn ho lan khyh hae,” a cipya. Tukeiccuze ccangvaepaw nynh po zua lan thuing zah Abimelek tuh a chih.

⁵⁵Israel hae nynh Abimelek a chipaw kha a thae hae tuh, mimaw inn raveih lang a ki hae.

⁵⁶Tuhcite a uno sung sari kha theih zah a paaw tungvaw seinaw a rae keiccuze Pachia nynh Abimelek kha a liaru;

⁵⁷te Shekhem khuaccaaw hae hoyleinaw balyn kha mimaw lu vawlan Pachia nynh ccawsah zah, Jerubbaal ccapaw Jotham thyalawnaw tuh mih tungvaw accah.