Read Zotung Chin 2 JOHAN 1 Bible Online

2 JOHAN 1 - Zotung Chin bible

2 JOHAN 1

¹A kum tang vae paw kae, Johan nynh byaccing kya ka sungsah hae paw, popaw bawinung te a ccaaw hae kalan ccaw kae ky oh. Kae kyalya nynh thua leite byaccing a nyh hae paw balyn nynh ae sungsah oh.

²Kae kya um zah kaening ryte zungzae a um cih paw byaccing keiccu nynh kae sungsah oh.

³Paaw Pachia kyate thuasah, Paaw a Ccapaw, Bawipaw Jesu Khri kyate thuasah byaccing te sungsakunaw ryte thawccinaw, ngaethyaumsahnaw te daenaw tuh nae kya la um sah.

⁴Paaw nynh kaw oun pya thyhawte na ccaaw hae abang nynh byaccing kya a hiin hae paw kha ka muih tuh myarya ka lungtua.

⁵Bawinung, kawbya thawpaw kha na kalan kae zei khyh, atakaw te kae hoi vae paw kawbya kha nynh kae zei. Atu nang kae ngia rypaw tuh aening lu kheit te lu kheit sungsakuh oh sih cipaw nynh thua.

⁶Sungsakunaw cipaw tuh aening nynh a kawbya hae thyhte ah hiin oh paw kha nynh thua; atakaw te na thae vae oh hawte, tuh-e kawbya tuh sungsakunaw kya hiinpaw kha nynh athua.

⁷Pawccecize ccungccaw lingtu hae patae tuh laephi vawlan oun langkuh vae hae; minmin nynh Jesu Khri tuh pynsaw lante yn thua cipaw ccaekiakhan khyh hae; khahcihawpaw ccungccaw tuh ccungccaw a lingtu te antikhri nynh thua.

⁸Nanning nynh rya na law oh paw kha shung leite, accingpaw ryalaw mee kha na mue nawlan oh, la raeringkuh oh.

⁹Humhung zemah Khri ccangpyanaw kya tyn leite, kaw a ngae leipaw ccungccaw tuh Pachia hoi khyh; Khri ccangpyanaw kya atynpaw ccungccaw tuh Paaw te Ccapaw kha parouh mawte a hoi.

¹⁰Tuh-e ccangpyanaw a ccyngkuh leipaw ccungccaw lukhakheit nynh nae kalan yn thua ze, nae inn kya la thuasah nan oh, bya mah la beih nan oh.

¹¹Pawccecize tuh-e paw kha bya a beihpaw ccungccaw tuh tuh-e paw kya-e ahoy leipaw cyisahnaw kha a neethungkuh buapaw nynh thua.

¹²Nanning kalan zei lanpaw patae ka hoi zemah ccanaw te ccatui te ka zei ry vae khyh. Aening ah lungtuanaw accing nawlan nae kalan kae thua cih zah, nanning ryte hawiliakute byabeihku lan cipaw ka ngaehoi.

¹³Po athuapaw na neitawnung a ccaaw hae nynh nang kha ae beihlang hae. Amen.