Read Zotung Chin BYAPHY 10 Bible Online

BYAPHY 10 - Zotung Chin bible

BYAPHY 10

¹A thawsaepaw ccangpaw vaawpaw tuh maeking kha zingkute vaawlang te yn rungbungpaw kha ka muih; a lu vawlan sawdoih a um, a maesue tuh khuanin te lokuh zah, a ccu tuh maee tungpi te nynh aloku.

²Adawkuhpaw ccakue taraw kha a kuih kya a ccyng; a ranglang ccu kha rili vawlan sy zah a voilang ccu kha laephi vawlan a sy.

³Chindeih nynh a sia hawte roi accae lante thawte a sia; he a sia koute kholungthyhpaw roi vaesari accae.

⁴Kholungthyhpaw roi vaesari accae koute, kae tuh ccaw zei lan ka noukuh vae; vaawlang kyate roi nynh, “Kholungthyhpaw roi vaesari accaepaw uccaw hae kha tazeihkhia lah, tuh-e hae tuh zei nan,” cite kamaw yn hopyapaw kha ka thae.

⁵Rili te laephi vawlan a thadynpaw ka muihpaw vaawpaw nynh a kuih kha vaawlang hangthung zah,

⁶vaawlang te vaawlang kya umpaw uccaw hae, laephi te laephi kya umpaw uccaw hae, rili te rili kya umpaw uccaw hae a raetupaw, zungzae te zungzae cia a hiinpaw min phyate thyalawkuh zah, “Accyh ro vae lan khyh.

⁷Pachia nynh a ryalahtu profeh hae kya a la ho vae hawte, lu sarinaw e vaawpaw nynh mungkae a tupaw roi he yn ccae ccyh kyakhe Pachia byakhupaw tuh yn ccing cih,” a ci.

⁸Vaawlang e ka thaepaw roi nynh kamaw kha bua yn hopah zah, “Rili te laephi vawlan a thadynpaw vaawpaw kuih kya adawkuhpaw ccakue taraw khuh ccianua lah yn lah,” yn cipya.

⁹Vaawpaw kalan ka cceih zah, “Ccakue taraw kha yn pya,” ka cipya. Aning nynh, “Lawkuh lah ae, na vue kya a khah cih, thuasalama na khalang kya tuh khoitui hawte a e cih,” yn cipya.

¹⁰Vaawpaw kuih kya-e ccakue taraw kha ka lawkuh zah ka ae; ka khalang kya tuh khoitui hawte e zah, ccahe ka ae kou tuh ka vue kya a khah.

¹¹Aning nynh, “Ccungccaw hae patae, minphuin hae, bya hae te siapharan hae kalan khe profehbya bua na ho hahe cih,” cite yn hopya.