Read Zotung Chin BYAPHY 11 Bible Online

BYAPHY 11 - Zotung Chin bible

BYAPHY 11

¹Tukoute hoitang alopaw tounawpaw ccungngue ccangkheit kha yn pya zah, “Thokuh lah, Pachia beikinn te silawhang kha la tou, tuin kya a beiktu hae kha mah la ria hae.

²Thuasalama beikinn atolang e voidu kha tuh tou leite la cciataw; pawccecize tuh-e tuh Zenta hae kalan pya athua vae; minmin nynh athyaapaw khualipi kha sawpaw sung pali sah ning cia a syde cih hae.

³Ka ccaekia lu ning kha thungnaw ka pya cih hae zah, minmin nynh buriboei kha zingkute nin thong kheit za ning sung taruh cia profehbya a ho cih hae,” a ci.

⁴E ccaekia hae lu ning tuh laephi a peetu Bawipaw malang a thadyn hae paw maeekhuatung ccangning te oliv thingku ku ning nynh thua hae.

⁵Lukhakheit nynh minmin kha vawsaw pya a ry hae ze, mih khalang lungkhu te maee pou zah mih rhaw hae kha po a laang hae; lukhakheit nynh minmin kha vawsaw pya a ry hae ze, tuh-e paw tuh tuhcite chia athua hahe cih.

⁶Tuh-e hae nynh profehbya a ho lya hae khe khuaa araw khyh nawlan, vaawlang thuakaw khaw khonaw kaw a hoi hae; tui kha chii lang tangsah khonaw thungnaw, a ry takyh hae te shethya aphuinphuin te laephi kha vawsaw pya khonaw thungnaw kha a hoi hae.

⁷Minmin nynh ccaekiakhan hae paw kha he a thangsah hae te, adianaw um lei lan akhupaw laekarung lungkhu te yn kaethungpaw sarepaw nynh minmin kha rhaw a tuk cih hae, a tae cih hae zah a theih cih hae.

⁸Mih rhua hae tuh muisaw lante Sodom te Izip a ci hae paw, myarya lepaw khuapi kya-e laanpi kyakhe a huekuh cih hae; mih Bawipaw kha mah tuin khua kyakhe vaelantung kya a khiade hae.

⁹Ram hae, phin hae, bya hae te minphuin hae kya-e ccungccaw hae nynh mih rhua hae kha nin thum khoi lungkhu a muih cih hae zah, shaw kya uu lan a kang cih hae,

¹⁰laephi vawlan a um hae paw tuh mih lungtua cih zah mih lungpaw cih, lu kheit te lu kheit lasung a kykuh cih hae; pawccecize langmawlya tuh-e profeh hae lu ning nynh laephi vawlan a um hae paw kha myarya ccih lante vawsawnaw a la pya hae.

¹¹Nin thum khoi acih koute Pachia kyate hiinnawpaw hy tuh mih lungkhu lang tee zah mih ccu te a thadyn hae, minmin kha a muih hae paw tuh myarya a rih hae.

¹²Tuinte vaawlang e myarya ccaepaw roi nynh, “Hynhlang oun kaethung oh!” cite a hopya hae paw kha tuh-e hae lu ning nynh a thae hae. Minmin tuh mih rhaw hae muihnaw kyakhe maeking te vaawlang a kae hae.

¹³Tuh ccyh lyakhe innry thawte suekuh zah khuapi pum haw pum kheit tuh pong ating, tuh-e innrysuekunaw kya ccungccaw thong sari a chih hae, tuhlaepaw ccungccaw hae tuh rih hae zah vaawlang e Pachia kha phu-enaw a pya hae.

¹⁴Ngaethya lan umpaw ccangningnaw tuh athang vae; dotua, hynh-e koute ngaethya lan umpaw ccangthumnaw tuh taloi yn thua cih.

¹⁵Lu sarinaw vaawpaw nynh a mungkae kha tu zah, vaawlang te myarya accaepaw roi hae nynh, “Laephi peenaw tuh ah Bawipaw peenaw te a Khri kya-e peenaw lang phe tang vae, aning nynh zungzae te zungzae cia a uk vae cih,” cite a ho hae.

¹⁶Pachia malang mimaw bawitungkhung vawlan a haung hae paw piccan hae lu kuin lae pali nynh bakhungte Pachia kha beik hae zah,

¹⁷“Atu lya a umpaw, langmawlya mah a la um vae paw, Athung huaccepaw, Bawipaw Pachia, alesaepaw na huhan kha na lawkuh zah na uk vae keiccuze na kalan lungtuabya kae ho.

¹⁸Minphuin hae tuh myarya mih thinria, thuasalama na bungpawnaw tuh yn thua vae; michi hae byapianaw ccyh tuh yn thua vae, namaw rya ae lawpah hae paw na profeh hae, mithyaa hae, na min raw a rih hae paw ccungccaw adih ale hae kha ryalaw mee pyanaw ccyh te laephi a rohtu hae kha ronaw ccyh tuh yn thua vae,” a ci hae.

¹⁹Vaawlang a umpaw Pachia beikinn tuh hungkuh zah, a beikinn kyakhe amaw kya-e byakin thingkua kha muih athua; te khozaw alaekuh, roi accae, kholung athyh, innrysuekuh zah myarya lepaw hya accah.