Read Zotung Chin BYAPHY 16 Bible Online

BYAPHY 16 - Zotung Chin bible

BYAPHY 16

¹Beikinn lungkhu te myarya accaepaw roi nynh, “La cceih oh lah, Pachia thinrianaw athuapaw pakekhupaw ccangsari kha laephi vawlan ccae oh,” cite vaaw hae lu sari kalan a hopya hae paw kha ka thae.

²Masaty e vaawpaw nynh cceih zah a pakekhupaw kha laephi vawlan khe a ccae; te sarepaw kya-e syntawnaw a hoi hae paw te sarepaw azuh a beik hae paw tungvaw kyakhe myarya dothah zah luathua-ae-ui lan umpaw te myarya ccihpaw balyh nynh a thuanua hae.

³Lu ningnaw e vaawpaw nynh a pakekhupaw kha rili vawlan khe a ccae; rili tuh ccungccaw achihpaw chii hawte chii lang phe a tang; rili kya umpaw a hiinpaw miakaw marya a chih hae.

⁴Lu thumnaw e vaawpaw nynh a pakekhupaw kha vawpi hae te tuidy hae vawlan khe a ccae; tuh-e hae tuh chii lang phe a tang.

⁵Tui a uktu vaawpaw nynh, “Atu a umpaw, langmawlya a la um vae paw, pou Athyaapaw, nang tuh na ding, pawccecize nang nynh hynh-e hae hynh bya na pia.

⁶Minmin nynh mithyaa hae chii te profeh hae chii kha luasah hae zah, nang nynh minmin a nia lan hae paw chii kha na pya hae. Minmin tuh tuhcite teing lan a ngaekuh hae paw nynh thua,” cite a hopaw kha ka thae.

⁷Ccangpaw vaawpaw nynh silawhang kyate, “Athung huaccepaw Bawipaw Pachia, na byapianaw tuh hme zah adingpaw nynh thua!” cite a hopaw kha ka thae.

⁸Lu palinaw e vaawpaw nynh a pakekhupaw kha khuanin vawlan khe a ccae; khuanin tuh ccungccaw hae kha maee te unaw kaw a mue.

⁹Myarya asopaw maeeso khate ccungccaw hae kha u thua hae zah, hynh-e shethya hae tungvaw kaw a hoitupaw Pachia min kha thya a law hae; minmin tuh ngaesikuh khyh hae, Pachia kha mah phu-enaw pya khyh hae.

¹⁰Lu pangawnaw e vaawpaw nynh a pakekhupaw kha sarepaw kya-e bawitungkhung vawlan khe a ccae; a peenaw tuh mohnaw te phe beih zah, eih acci keiccuze ccungccaw hae nynh mih lae kha a teiku hae.

¹¹Minmin nynh a teing hae paw mih vaemaw te mih balyh hae keiccuze vaawlang e Pachia kha thyalaw hae zah, mih cyisahnaw kha ngaesikuh khyh hae.

¹²Lu taruhnaw e vaawpaw nynh a pakekhupaw kha myarya lepaw Zufrates vawpi vawlan khe a ccae; nithua lang e siapharan hae ccianaw kha paccynpya khylan, tuin kya-e tui tuh phe akan.

¹³Nakaa-hupi khalang, sarepaw khalang te ahme leipaw profeh khalang kyate buphaw te alokuhpaw athupaw muisaw hae ccangthum yn poupaw kha ka muih.

¹⁴Tuh-e muisaw hae tuh muihsahnaw hae a langsakuhpaw raerangsaro hae kya-e muisaw hae nynh thua; Athung huaccepaw Pachia kya-e alesaepaw nin kya rhawtukku khylan minmin nynh laephi pynpi kya-e siapharan hae kha ccianua hae zah a suelua hae.

¹⁵(“Dotua, kae tuh miruh hawte nynh kae thua! A ccakaete a ccia khyh nawlan te a maethyanaw alang khyh nawlan a uccaw kha a rinkuhpaw te ngaw a dokuhpaw tuh hythua a ccoupaw nynh thua!”)

¹⁶Tuh-e muisaw hae nynh siapharan hae kha Hebru bya te Armageddon a ci hae paw hmin kyakhe nynh a suelua hae.

¹⁷Lu sarinaw e vaawpaw nynh a pakekhupaw kha khivae kyakhe a ccae; vaawlang e beikinn kya umpaw bawitungkhung kyate myarya accaepaw roi yn pou zah, “Athang vae!” a ci.

¹⁸Khozawlaekunaw, roiccaenaw, kholungthyhnaw te myarya rupaw innrysuekunaw a um; laephi vawlan ccungccaw a um takaw te tuhcih arupaw te tuhcih alepaw innrysuekuhpaw tuh um boi khyh.

¹⁹Myarya lepaw khuapi tuh san thum lang phia thua zah, minphuin hae kya-e khuapi hae tuh phe ating. Pachia nynh a thinrianaw te asekuhpaw bungpawnaw misutui banang kha niasah khylan myarya lepaw Babilon khuapi kha a liathui vae.

²⁰Tuikoih miakaw tuh pong ccue hae zah, mua hae tuh muih lan um vae khyh hae.

²¹Pung za kheit loukaw aripaw myarya lepaw hya tuh ccungccaw hae tungvaw khe vaawlang te a ccah. Tuh-e shethya tuh myaryamaw ccih zah, tuh-e hya te asekuhpaw shethya keiccuze ccungccaw hae nynh Pachia kha thya a law hae.