Read Zotung Chin BYAPHY 17 Bible Online

BYAPHY 17 - Zotung Chin bible

BYAPHY 17

¹Tuinte pakekhupaw ccangsari a hoipaw vaaw hae lu sari kyaze lukheitpaw nynh yn cceih zah yn hopyapaw tuh, “Rang, tui patae vawlan a haungpaw ohhuanung lepaw tungvaw byapianaw kha kae muihsah cih;

²laephi siapharan hae nynh tuh-e nung te a ohhuakuh hae; laephi vaw a um hae paw tuh tuh-e nung kya-e ohhuakunaw misutui khate pong a rui vae hae,” a ci.

³Tuhcite Muisaw liate kae kha ramkaw lang yn cciakhae; alu lu sari te aki ki haw hoi zah Pachia thethyasahnawpaw min hae te phe beihpaw sarepaw sekakungpaw vawlan a haungpaw nopinung kha ka muih.

⁴Nopinung tuh sephaphuhpaw te asepaw boeining kha lawkuh zah sui, aphutepaw lung hae te palee hae khate a ccaankuh; a ohhuakunaw kya-e luathua-ae-ui lan umpaw te myarya anungsikuhpaw sui banang kha a kuih kya a ccyngbia.

⁵A terui kyakhe, “Alesaepaw Babilon, ohhua hae nung te laephi kya-e luathua-ae-ui lan umpaw nung,” cite byakhu lante min azeikuh.

⁶Nopinung tuh mithyaa hae chii te Jesu a zyn hae keiccu a chia hae paw chii khate a ruipaw kha ka muih, tuh-e nung kha he ka muih tuh, myarya ka ngaeangthua.

⁷Vaawpaw nynh, “Pawccemou na ngaeangthua? Tuh-e nopinung kya-e byakhupaw te tuh-e nung a cciakhaepaw alu lu sari te aki ki haw a hoipaw sarepaw kya-e byakhupaw kha kae hopah ung cih.

⁸Na muihpaw sarepaw tuh langmawlya la um zah atu um khyh, adianaw um lei lan akhupaw laekarung lungkhu te yn kaethung cih zah ronaw kalan a cceih cih; laephi vawlan um hae zah laephi athotakaw te hiinnaw ccauh kya mih min zei athua lei hae paw nynh langmawlya la um zah atu a um leipaw, te bua yn langkuh cih paw sarepaw kha he oun muih hae tuh, mih ngaeangthua cih.

⁹“Hein kyahin hawnaw te nythyanaw hoi aho: alu lu sari tuh nopinung nynh a haungnawpaw mua muasari nynh thua;

¹⁰siapharan hae lu sari mah a um hae; lu pangaw tuh a ccahbung vae hae, lu kheit tuh a um ung; ccangpaw lu kheit tuh yn thua loh khyh; aning tuh he yn thua te, ccyh dyntari rou nynh atyn cih.

¹¹Langmawlya la um zah atu a um leipaw sarepaw tuh lu taryanaw e siapharan nynh thua, aning tuh lu sari kya a um buapaw mah thua zah, ronaw kalan a cceih cih.

¹²Na muihpaw aki ki haw tuh siapharan kawhoinaw a mue loh leipaw siapharan lu haw hae nynh thua; thuasalama siapharan hae hawte kawhoinaw kha sarepaw ryte suimilan ccangkheit lungkhu a muekheih cih hae.

¹³Tuh-e hae tuh tuanaw ccangkheit a hoi hae paw thua zah mih thungnaw te kawhoinaw kha sarepaw kalan a pya cih hae.

¹⁴Tuh-e hae nynh Tuutaw kha rhaw a tuk cih hae zah Tuutaw nynh minmin kha a tae cih hae, pawccecize Tuutaw tuh bawi hae Bawipaw te siapharan hae Siapharan nynh thua; amaw ryte a umkheih hae paw tuh ko athua hae paw, po athua hae paw te mih lungzipaw nynh thua hae,” yn cipya.

¹⁵Vaawpaw nynh, “Ohhuanung nynh a haungnawpaw tui na muihpaw tuh minphuin hae, ccungccaw zapi hae, ram hae te bya hae nynh thua.

¹⁶Na muihpaw aki ki haw hae te sarepaw nynh ohhuanung kha a hua cih hae, a uccaw miakaw kha a ropah cih hae zah a ccakaete a nung cih hae; a ngesaw kha a ae cih hae zah amaw kha maee te a u cih hae.

¹⁷Pawccecize Pachia bya accing mawlaezung, a rynaw kha ccingsah khylan, minmin kha lunglokunaw hoisah te minmin kya-e siapharan kawhoinaw kha sarepaw kalan pya lan Pachia nynh mih thinlung kya phe a sang vae.

¹⁸Na muihpaw nopinung tuh laephi siapharan hae a uktupaw, myarya lepaw khuapi kha nynh thua,” cite yn hopya.