Read Zotung Chin BYAPHY 18 Bible Online

BYAPHY 18 - Zotung Chin bible

BYAPHY 18

¹Tukoute myarya lepaw kawhoinaw a hoipaw ccangpaw vaawpaw nynh vaawlang te yn rungbungpaw kha ka muih; a phu-enaw khate laephi tuh phaephae a aw.

²Aning nynh roi accae lante thawte sia zah, “Myarya lepaw Babilon tuh a khuliakuh vae, a khuliakuh vae! Raerangsaro hae umnaw lang nynh a tang vae, anungsikuhpaw muisaw miakaw elang thonginn lang, te athyaa leipaw te hua lan umpaw pavaw miakaw elang rekunaw lang nynh a tang vae.

³Pawccecize minphuin hae balyn nynh a ohhuakunaw te asekuhpaw athyaa leipaw misutui kha a nia vae hae; laephi siapharan hae tuh amaw ryte a ohhuakuh vae hae; laephi vaw e kungku hae tuh tuh-e nopinung a ohhuakunaw kya-e sisua liate a hoirum vae hae,” a ci.

⁴Tuinte vaawlang te ccangpaw roi kha ka thae zah tuh-e roi nynh, “Ka ccungccaw hae, nanning tuh tuh-e nung a seinaw kya na umbua khyh nawlan oh thuasah, aning nynh a teing lanpaw shethya kya na umbua khyh nawlan oh thuasah amaw kyate oun pou oh.

⁵Pawccecize a seinaw tuh vaaw cia phe phah vae zah a hoyleinaw kha Pachia nynh a liathui vae.

⁶Aning nynh ae cyi oh hawte cyihru oh; a cyisahnaw thyhte leit ning liaru oh; aning nynh a pydepaw banang kyakhe leit ning pydepah oh.

⁷Aning nynh amaw te amaw kha myarya a phu-esakuh zah ohhuakunaw kya a hoysah hawkhate vawsawnaw te rawkhuinaw kha pyaru oh; pawccecize aning nynh a thinlung kyakhe, ‘Kae tuh siapharannung nynh ka thua, nomae ka thua khyh, rawkhuinaw tuh ka tung lan khyh,’ a ciku.

⁸Tukeiccuze aning nynh shethya hae athuapaw chinaw, rawkhuinaw te ccakannaw kha nin kheit lungkhu a tung cih zah, maee nynh pong a u cih; pawccecize amaw kha bya a piatupaw Bawipaw Pachia tuh a thawsaepaw nynh thua,” a ci.

⁹Amaw ryte ohhuakuh hae zah ohhuakunaw kya a hoysah kheih hae paw laephi siapharan hae nynh a rhua a uunaw hae paw maeekhuh kha he a muih hae tuh, amaw elang a rah a khui cih hae.

¹⁰Aning nynh a teingpaw vawsawnaw kha minmin nynh a ri hae keiccuze asawnaw langkhe thadyn hae zah, “Ezou, ezou! Khuh-e myarya lepaw khuapi, athungpaw Babilon khuapi khuhlou! Suimilan ccangkheit lungkhu byapianaw nynh ae thuanua vae rei!” a ci cih hae.

¹¹Laephi vaw e kungku hae tuh amaw elang oun rah oun khui cih hae; pawccecize mih uccaw hae kha hum nynh sanmah repah vae lan khyh hae.

¹²Mih kungkunaw uccaw hae sui, ngun, aphutepaw lung hae, palee hae, nebaleihpaw boeining , kadipa uccaw, po-uccaw, sekakungpaw uccaw, amynkhuhpaw thing aphuinphuin, saepanua te raepaw uccaw aphuinphuin, aphutepaw thing te raepaw uccaw aphuinphuin, sohin uccaw, sivaw uccaw te lung rawpaw uccaw,

¹³cinnamon te mynkhuhpaw upaw, zimuin te frankinsen, misutui te oliv chitui, chanvuih akhuipaw te chanvuih, sahiin hae te tuu hae, marang hae te marangle hae, see hae te ccungccaw hiinnaw hae kha hum nynh san re vae lan khyh hae.

¹⁴Kungku hae nynh, “Na thinlung kyate kou na duaapaw thingthae hae tuh na kyate a zo vae hae, na hoysahnawpaw uccaw hae te na phu-enaw balyn tuh na kyate a zo vae hae, tuh-e hae tuh kharouh na muih boi vae lan khyh!” a ci hae.

¹⁵Tuh-e khuapi kya-e uccaw hae khate kungku hae zah a hoirum hae paw kungkutu hae tuh tuh-e nung nynh a teingpaw vawsawnaw kha a ri hae keiccuze asawnaw langkhe a thadyn cih hae zah rawkhuite,

¹⁶“Ezou, ezou, nebaleihpaw boeining, sephaphuhpaw te asepaw boeining kha lawkuh zah sui te aphutepaw lung hae, palee hae te a ccaankuhpaw khuh-e myarya lepaw khualipi khuhlou!

¹⁷Khahcih alungpaw sisua hae tuh suimilan ccangkheit lungkhu accakaepaw lang phe a tang vae rei,” oun ci cih hae. Sanphalung uktu hae balyn, sanphalung kya a cceihbua hae paw balyn, sanphalung mawng hae paw, rili kya kungku hae paw balyn nynh asawnaw langkhe thadyn hae zah,

¹⁸khuapi a unawpaw maeekhuh kha he a muih hae tuh, “Khuh-e myarya lepaw khuapi te alokuhpaw paw khuapi mou a um?” cite a sia hae.

¹⁹Minmin nynh laenoi kha mih lu vawlan phingkuh hae zah, “Ezou, ezou, rili kya a cceihpaw sanphalung hae a hoitu hae balyn kha amaw a hoirumnaw liate a hoirumsah bua hae paw khuh-e khuapi khuhlou! Suimilan ccangkheit lungkhu phe roh vae rei.

²⁰Pou vaawlang, pou mithyaa hae, locceihtu hae te profeh hae, nae lungtua sah! Pawccecize Pachia nynh nanning hanlan amaw kha bya a pia vae!” cite rawkhuite a sia hae.

²¹Tukoute a thawsaepaw vaawpaw nynh myarya lepaw sungmia-lung alopaw lung ccangkheit kha lawkuh zah rili lungkhu lang vua zah, “Babilon khualipi tuh hynhcite myarya ccih lan vua athua cih zah, kharouh muih lei lan vae.

²²Tintang a khua hae paw roi, tyngdaw a khua hae paw roi, phyly a tu hae paw roi, mungkae a tu hae paw roi kha na kya kharouh thae lei lan vae; a kuihhae hoypaw ccungccaw lu kheit san na kya muih lei lan vae; te sungmia-lung roi mah na kya kharouh thae lei lan vae.

²³Maeekhua a awnaw mah na kya kharouh aw vae lan khyh; te zudy ccangvaepaw te akaepaw liaccanung roi mah na kya kharouh thae lei lan vae; pawccecize na kungku hae tuh laephi kya alesaepaw ccungccaw hae nynh thua hae; pawccecize minphuin hae balyn tuh naaw na thyanaw khate ling athua hae.

²⁴Profeh hae chii, mithyaa hae chii te laephi vawlan chia athua hae paw balyn chii tuh tuh-e khuapi kya muih athua,” a ci.