Read Zotung Chin BYAPHY 21 Bible Online

BYAPHY 21 - Zotung Chin bible

BYAPHY 21

¹Tukoute vaaw thawpaw te laephi thawpaw kha ka muih; pawccecize masaty vaaw te masaty laephi tuh zo hae zah rili mah um vae khyh.

²Athyaapaw khuapi athuapaw Jerusalem Thawpaw tuh a vawpaw hanlan a ccaankuhpaw akaepaw liaccanung hawte paccynkuh zah Pachia kyate vaawlang te yn rungbungpaw kha ka muih.

³Vaawlang te roi accaepaw nynh, “Dotua oh, Pachia nynh a umnawpaw bu tuh ccungccaw hae kya um zah, Pachia tuh minmin ryte a um vae cih; minmin tuh a ccungccaw hae athua vae cih hae. Pachia tuh minmin ryte a um cih zah mih Pachia athua vae cih.

⁴Pachia nynh mih mit kyate mitphi balyn kha a hupah cih hae. Chinaw um vae lan khyh. Ngaethyanaw, rawnaw te ccinaw um vae lan khyh; pawccecize langmawlya e uccaw hae tuh pong azo vae hae,” cite a hopaw kha ka thae.

⁵Bawitungkhung vawlan a haungpaw nynh, “Dotua oh, pawpaw balyn kha athawpaw lang ka rae vae,” a ci. Aning nynh kamaw kha, “Hynh-e hynh zei, pawccecize hynh-e bya tuh zyn lan umpaw te akyhpaw nynh thua,” yn cipya.

⁶Aning nynh kamaw kha, “Phe athang vae! Kae tuh Alfa te Omega, athonaw te athangnaw nynh ka thua. A tuihawpaw ccungccaw tuh hiinnaw tuidy kya-e tui kha amee leite ka pya cih.

⁷A taetupaw tuh hynh-e rho hynh a ccou cih; kae tuh a Pachia ka thua cih zah aning tuh ka ccapaw athua cih.

⁸Thuasalama mih rawthah hae paw, a zyn lei hae paw, luathua-ae-ui lan um hae paw, ccungccaw theih hae paw, a ohhuakuh hae paw, naawthya hae paw, zohtuh beik hae paw te a hyn hae paw balyn tuh kemaee te aruapaw maee tuili kyakhe nynh mih hanpaw a hoi cih hae, tuh-e tuh vaening chinaw nynh thua,” yn cipya.

⁹Nyathyakou e shethya ccangsari te phe beihpaw pakekhupaw ccangsari a ccyng hae paw vaaw hae lu sari kyaze lu kheit tuh ka kya yn thua. Kae kha bya yn beih zah, “Hynhlang rang, Tuutaw zu, akaepaw liaccanung kha kae muihsah cih,” yn cipya.

¹⁰Aning nynh myarya lepaw te ahangpaw mua kalan khe Muisaw liate yn cciakhae zah, athyaapaw khuapi Jerusalem tuh Pachia kyate vaawlang te yn rungbungpaw kha yn muihsah.

¹¹Tuh-e khuapi tuh Pachia phu-enaw te phe beih zah, a awnaw tuh lung-awmatei hawte accipaw jasper lung hawkhate, aphute huapaw lung te nynh aloku;

¹²koikua haw lae ning umpaw myarya lepaw te ahangpaw khualungrua hoi zah, tuh-e koikua hae kyakhe vaaw hae lu haw lae ning a um hae; tuh-e koikua hae kyakhe Israel ccapaw hae phin haw lae ning min kha zei athua.

¹³Nithua lang koikua ccangthum, palung lang koikua ccangthum, deilang koikua ccangthum, te niccaw lang koikua ccangthum a um.

¹⁴Khuapi kya-e khualungrua tuh athonaw lungbing haw lae ning a um, tuh-e hae kyakhe Tuutaw kya-e locceihtu hae lu haw lae ning min a um.

¹⁵Kamaw kha bya yn hopahtupaw tuh khuapi kha thuasah, a koikua hae te khualungrua hae kha thuasah tou nawpaw sui ccungngue ccangkheit a hoi.

¹⁶Khuapi tuh asaepaw te akopaw alokuh; aning nynh khuapi kha a ccungngue te tou zah asaepaw, akopaw te ahangpaw tuh me thong kheit za pangaw cci cih hae zah a lokuh hae.

¹⁷Khualungrua tuh tou zah vaawpaw kya-e tounawpaw thyhte ccungccaw dung te za kheit sung pali dung pali acih.

¹⁸Khualungrua tuh jasper lung te rae thua zah, khuapi tuh ccirarihpaw thawlang te alokuhpaw sui ccipaw nynh thua.

¹⁹Khuapi kya-e khualungrua athonaw aleihpaw hae tuh aphutepaw lung aphuinphuin te a ccaan hae; masaty athonaw aleihpaw tuh jasper lung, ccangningnaw tuh nilar lung, ccangthumnaw tuh agate lung, ccangpalinaw tuh emerald lung;

²⁰ccangpangawnaw tuh oniks lung, ccangtaruhnaw tuh karnelian lung, ccangsarinaw tuh khrisolaih lung, ccangtaryanaw tuh beril lung, ccangtakuanaw tuh topaz lung, ccanghawnaw tuh khrisoprase lung, haw lae kheitnaw tuh jacinth lung, haw lae ningnaw tuh amethist lung nynh thua.

²¹Koikua haw lae ning tuh palee haw lae ning thua zah, koikua ccangkheit cci tuh palee ccangkheit cci nynh thua; khuapi kya-e laanpi tuh thawlang hawte awrarihpaw sui ccipaw nynh thua.

²²Tuh-e khuapi kya beikinn ka muih khyh; pawccecize a beikinn tuh Athung huaccepaw Bawipaw Pachia te Tuutaw tuh nynh thua.

²³Tuh-e khuapi tuh khuanin awnaw te sawpaw awnaw ho vae khyh; pawccecize Pachia phu-enaw nynh tuh-e khuapi tuh awsah zah, Tuutaw tuh khuapi a maeekhua nynh thua.

²⁴Khumnaw a muepaw minphuin hae nynh tuh-e khuapi a awnaw kyakhe a pae cih hae; laephi siapharan hae nynh mih phu-enaw kha tuh-e khuapi lungkhu lang a thuakhae cih hae.

²⁵Khuapi kya-e koikua hae tuh khuadae ccyh kya khaw thua vae lan khyh; pawccecize tuin kya khuazi um vae lan khyh.

²⁶Minmin nynh minphuin hae mih phu-enaw te sawtuanaw kha tuh-e khuapi lungkhu lang oun thuakhae cih hae.

²⁷Anungsikuhpaw uccaw hae kha tuh-e khuapi lungkhu lang teekhae thua lan khyh, luathua-ae-uipaw rya a lahpaw te a hynpaw tuh tuh-e khuapi lungkhu lang kharouh tee lan khyh hae. Tuutaw kya-e hiinnaw ccauh kya min zei athua hae paw rou nynh a tee cih hae.