Read Zotung Chin BYAPHY 3 Bible Online

BYAPHY 3 - Zotung Chin bible

BYAPHY 3

¹“Sardis khua kya umpaw khriccaawbuu kya-e vaawpaw kalan hynhte zei: Pachia kya-e muisaw ccangsari te awsi ccangsari a hoitupaw nynh hynhte a ho. “Na ryalaw hae kha ka ny. Nang tuh na hiin cite min na hoi zemah na chih cipaw ka ny.

²Ngawrandotua, na chi maw hin na hoi ungpaw thawzung kha lawku tua; pawccecize Pachia malang na ryalaw hae tuh accing cite ka muih khyh.

³Tukeiccuze ae ccangpyapaw te na thaepaw miakaw kha liathui lah varyng kyngkuh, te ngaesikuh. Tukeiccuze ngawran na do khyh ze, miruh hawte na kalan kae thua cih zah hohtuh ccyh nynh na kya kae thua cih cipaw na nyh lan khyh.

⁴Sardis khua kya mih boeining athu leipaw ccungccaw hae ccapyh na hoi hae; minmin tuh angaekuhpaw athua hae keiccuze boeining rawpaw lawkute kamaw ryte a cceihbua cih hae.

⁵A taetupaw tuh boeining rawpaw kha lawsahku athua cih, hiinnaw ccauh kyate a min kha ka thee vae lan khyh, ka Paaw malang te a vaawccungccaw hae malang a min kha ccaekia ka khan cih.

⁶Muisaw nynh khriccaawbuu hae kalan a hopaw kha nakaring a hoipaw ccungccaw tuh thae sah.

⁷“Filadelfia khua kya umpaw khriccaawbuu kya-e vaawpaw kalan hynhte zei: Athyaapaw, ahmepaw, David kya-e toh a hoitupaw, hum nynh san a khaw kho lei lan a hungtupaw, te hum nynh san a hung kho lei lan a khawtupaw nynh hynhte a ho:

⁸“Na ryalaw hae kha ka ny. Dotua, hum nynh san a khaw kho leipaw thuakaw ahungkuhpaw kha na malang ka nung vae. Pawccecize nang tuh thawzung ccapyh nynh na hoi cipaw ka ny, ka bya kha na ccykekuh zah ka min kha na vua khyh.

⁹Dotua, Judah hae nynh kae thua cite ho hae zah athua lei hae paw mihyn hae kha Satan ccungccaw hae lang ka rae cih hae. Dotua, na cculeihpaw kya bakhung sah khylan te nang kha kae sungsah cipaw nysah khylan minmin kha na kalan kae thuasah cih hae.

¹⁰Ngaesangnaw te asekuhpaw ka bya kha na ccykeku keiccuze laephi vawlan a um hae paw kha syntawtua khylan, laephi pynpi kya yn thua vae cih paw tuhounaw ccyh kyate nang kha kae khynsah cih.

¹¹Kae tuh arangte kae thua vae cih. Hum nynh sanmah na bawilukhung kha ae luade khyh nawlan, na hoi vae paw kha varyng kyngkuh.

¹²A taetupaw kha ka Pachia beikinn kya tungpi lang ka rae cih, aning tuh atolang kharouh pou vae lan khyh. ka Pachia min te ka Pachia khuapi min kha a tungvaw khe ka zei cih; tuh-e khuapi tuh ka Pachia kyate vaawlang te yn rungbungpaw, Jerusalem thawpaw nynh thua; ka min thawpaw kha mah a tungvaw khe ka zei cih.

¹³Muisaw nynh khriccaawbuu hae kalan a hopaw kha nakaring a hoipaw ccungccaw tuh thae sah.

¹⁴“Laodisia khua kya umpaw khriccaawbuu kya-e vaawpaw kalan hynhte zei: Pachia kya-e raenaw athonaw athuapaw, a lungzipaw te ahmepaw ccaekia athuapaw Amen nynh hynhte a ho.

¹⁵“Na ryalaw hae kha ka ny. Nang tuh kyaa mah na kyaa khyh, so mah na so khyh. Nang tuh na kyaa ze kyaa, na so ze so ci ka ry.

¹⁶Tuhcite nang tuh kyaa mah kyaa lei, so mah so lei, lalungpaw na thua keiccuze ka khalang kyate kae thoi vae cih.

¹⁷Nang nynh, ‘Kae tuh ka hoirum, ka dunghoy zah pawsang mah ka hobounaw um vae khyh,’ na ci keiccuze nang tuh myarya a riathaepaw, thawcci lan umpaw, a ryachipaw, a mitmohpaw te ccakaete a umpaw na thuapaw kha na nyhkuh khyh.

¹⁸Tukeiccuze nang kha hynhte tuanaw kae pya: nang tuh na hoirum ccaw, maee kya thyaasah vae paw sui kha kamaw kya-e rekuh, na ccakaete na umpaw maethyanaw kha a langku khyh nawlan boeining na lawku ccaw, boeining arawpaw kha kamaw kya-e rekuh; te ngaw na muih nawlan na mit kha sii na thuhku ccaw, kamaw kya-e rekuh.

¹⁹Ka sungsahpaw ccungccaw hae kha ka pe hae zah ka thuihei hae, tukeiccuze na lungtho sah lah, ngaesikuh.

²⁰Dotua, kae tuh thuakawzung khe ka thadyn zah ka khua. Ccungccaw lukhakheit nynh ka roi thae zah thuakaw yn hungpya ze, tuh-e paw kalan ka tee cih zah looh kae aekheih cih, aning mah kamaw ryte kae aekheih cih.

²¹Kae tuh taetu ka thua zah ka Paaw ryte a bawitungkhung vawlan kae haung hawte, taetu athuapaw tuh ka bawitungkhung vawlan kamaw ryte haungnaw kaw ka pya cih.

²²Muisaw nynh Khriccaawbuu hae kalan a hopaw kha nakaring a hoipaw ccungccaw tuh thae sah,” yn cipya.