Read Zotung Chin BYAPHY 4 Bible Online

BYAPHY 4 - Zotung Chin bible

BYAPHY 4

¹Hynh-e koute ka do zah vaawlang kya thuakaw ahungkuhpaw kha ka muih. Masaty ka thaepaw roi tuh mungkae roi hawte bya yn hopahpaw roi nynh thua; tuh-e roi nynh, “Hynhlang yn kaethung lah, hynh-e koute yn cyihkuh lanpaw kha kae muihsah cih,” yn cipya.

²Vaekheihmawte kae tuh Muisaw kyakhe ka um. Dotua, vaawlang kya bawitungkhung ccangkheit um zah, tuh-e bawitungkhung vawlan ccungccaw lu kheit a haung.

³Tuh-e a haungpaw tuh jasper lung te sardias lung hawte nynh alang. Bawitungkhung po voilu lan emerald lung te alokuhpaw sawdoih a um.

⁴Tuh-e bawitungkhung po voilu lan ccangpaw bawitungkhung hae ccangkuin lae pali a um. Tuh-e bawitungkhung hae vawlan piccan hae lu kuin lae pali tuh boeining rawpaw lawkute a haung hae paw kha ka muih. Minmin tuh mih lu kya sui lukhung a khungkuh hae.

⁵Bawitungkhung kyate khozawlaepaw, riakawpaw te roiccaepaw hae a pou; te bawitungkhung malang khe Pachia kya-e muisaw ccangsari athuapaw, maeekhua ccangsari a awkuhpaw a um hae.

⁶Bawitungkhung malang khe lung-awmatei te alokuhpaw muinsado rili a um. Bawitungkhung angaelung te a pepan khe nulang malang te mit te phe beihpaw ahiinpaw sarangpaw sa pali a um hae.

⁷Masaty ahiinpaw sarangpaw tuh chindeih te lokuh zah, ccangningnaw ahiinpaw sarangpaw tuh vaetuataw te nynh aloku. Ccangthumnaw ahiinpaw sarangpaw tuh ccungccaw hawte mitmae hoi zah, ccangpalinaw ahiinpaw sarangpaw tuh mosipi azoupaw te nynh aloku.

⁸Tuh-e ahiinpaw sarangpaw sa pali tuh sake ccangtaruh cci a hoi hae. Atolang te alungkhu lang tuh mit te phe beih hae, minmin nynh, “Athyaa, athyaa, athyaa, Athung huaccepaw Bawipaw Pachia, atu lya a umpaw, langmawlya a la um vae paw te malang zemah a um cih paw nynh thua,” cite khuazi khuadae apaekuh lei lan hlaw a sah hae.

⁹Bawitungkhung vawlan a haungpaw, zungzae te zungzae cia a hiinpaw kalan khe tuh-e ahiinpaw sarangpaw hae nynh phu-enaw te sawtuanaw kha pya hae zah lungtuabya he a ho hae tuh,

¹⁰bawitungkhung vawlan a haungpaw malang khe piccan hae lu kuin lae pali tuh bakhung hae zah zungzae te zungzae cia a hiinpaw kha a beik hae, te bawitungkhung malang khe mih bawilukhung hae kha nungsya hae zah,

¹¹“Pou Bawipaw, nang tuh phu-enaw, sawtuanaw te huhan kha mue lan na ngaekuh; pawccecize pawpaw balyn kha na rae vae, tuh-e hae tuh na rynaw hawte rae thua zah a um hae,” a ci hae.