Read Zotung Chin BYAPHY 5 Bible Online

BYAPHY 5 - Zotung Chin bible

BYAPHY 5

¹Alungkhu lang te anulang ccawzeikuh zah tazeih ccangsari te khia athuapaw ccakue ccangkheit kha bawitungkhung vawlan a haungpaw a ranglang kuih kyakhe ka muih.

²A thawsaepaw vaawpaw nynh, “Tuh-e ccakue kha daw lan te tazeih hae kha ro lan hummou a ngaekuh?” cite thawte khua-opaw kha ka muih.

³Tuh-e ccakue a daw kho lanpaw te a do kho lanpaw tuh vaawlang kya thuasah, laephi vaw thuasah, lae kaw lang thuasah hum sanmah um khyh.

⁴Tuh-e ccakue tuh daw lan, ria lan te do lan angaekuhpaw hum sanmah muih lan a um khyh keiccuze thawte ka rah.

⁵Piccan hae kyaze lukheitpaw nynh, “Rah nan, dotua, Judah phin kya-e Chindeih, David Tharui nynh a tae vae, ccakue kha daw kho zah tuin kya-e tazeih ccangsari kha a ro kho vae,” cite kae kha yn hopya.

⁶Kae nynh ka do zah bawitungkhung te ahiinpaw sarangpaw hae sa pali angaelung kya te piccan hae angaelung kyakhe a chia vae hae paw hawte athuapaw Tuutaw a thadynpaw kha ka muih; tuh-e Tuutaw tuh ki kisari te mit ccangsari hoi zah, tuh-e hae tuh laephi pynpi kalan sawpaw Pachia kya-e muisaw ccangsari nynh thua.

⁷Tuutaw nynh cceih zah bawitungkhung vawlan a haungpaw a ranglang kuih kya-e ccakue kha a law.

⁸Tuhte ccakue kha he a lah tuh, ahiinpaw sarangpaw hae sa pali te piccan hae lu kuin lae pali nynh tintang kha thuasah, mithyaa hae sawsangnaw athuapaw mynkhuhpaw te phe beihpaw sui pakekhupaw hae kha thuasah ccarou ccyngkuh hae zah Tuutaw malang khe a bakhung hae.

⁹Minmin nynh hlaw thawpaw kha sah hae zah, “Nang tuh ccakue kha law lan te ccakue kya-e tazeih hae kha kia lan na ngaekuh, pawccecize nang tuh chia na thua zah na chiise liate phin miakaw, bya miakaw, minphuin miakaw te ram miakaw kya-e ccungccaw hae kha Pachia hanlan na shawkhaw hae.

¹⁰Minmin kha kae Pachia hanlan siapharan lang te ranpibawi lang na rae hae zah, minmin nynh laephi hynh a uk cih hae,” a ci hae.

¹¹Ka do zah bawitungkhung, ahiinpaw sarangpaw hae te piccan hae pepan khe vaaw hae patae roi kha ka thae, tuh-e vaaw hae tuh riatae lei, athong-asan acih hae.

¹²Minmin nynh, “Chia athua vae paw Tuutaw tuh thungnaw, hoirumnaw, hawnaw, thawzung, sawtuanaw, phu-enaw te hythuanaw kha ccou lan a ngaekuh,” cite roi accae lante a ho hae.

¹³Vaawlang, laephi vawlan, laephi kaw, rili te pawpaw kya balyn a um hae paw ahysuepaw miakaw nynh, “Hythuanaw, sawtuanaw, phu-enaw te thungnaw tuh bawitungkhung vawlan a haungpaw kya te Tuutaw kya zungzae te zungzae cia um sah!” a ci hae paw kha ka thae.

¹⁴Ahiinpaw sarangpaw hae sa pali nynh, “Amen!” a ci hae. Piccan hae lu kuin lae pali nynh bakhung hae zah a beik hae.