Read Zotung Chin BYAPHY 7 Bible Online

BYAPHY 7 - Zotung Chin bible

BYAPHY 7

¹Tukoute laephi ki kipali kya a thadyn hae paw vaaw hae lu pali nynh laephi vawlan, rili vawlan te thingku hae kha khisan nynh mung nan sah cite laephi san pali kya-e khisan hae phang a kyng hae paw kha ka muih.

²Ahiinpaw Pachia kya-e tazeih a hoipaw, nithua langte yn kaethungpaw, ccangpaw vaawpaw kha ka muih; tuh-e paw nynh laephi te rili kha vawsaw pya khylan kaw a mue hae paw vaaw hae lu pali kalan khe thawte sia zah,

³“Ah Pachia see hae kha mih terui kya tazeih ah khia mawlaezung oh, laephi thuasah, rili thuasah, thingku hae thuasah vawsaw pya nan oh,” a cipya hae.

⁴Tukoute tazeihkhia athua hae paw milu ccazing kha ka thae; Israel ccungccaw hae kya-e phin balyn kyate thong za kheit sung pali thong pali kha tazeihkhia athua hae.

⁵Judah phin kyate thong haw lae ning kha tazeihkhia athua hae, Reuben phin kyate thong haw lae ning, Gad phin kyate thong haw lae ning,

⁶Asher phin kyate thong haw lae ning, Naftali phin kyate thong haw lae ning, Manasseh phin kyate thong haw lae ning,

⁷Simeon phin kyate thong haw lae ning, Levi phin kyate thong haw lae ning, Issakhar phin kyate thong haw lae ning,

⁸Zebulun phin kyate thong haw lae ning, Josef phin kyate thong haw lae ning, Benjamin phin kyate thong haw lae ning kha tazeihkhia athua hae.

⁹Tukoute ka do zah ram takyh, phin takyh, minphuin takyh te bya takyh a ho hae paw kyate riatae leipaw ccungccaw zapi pi tuh bawitungkhung malang te Tuutaw malang khe a thadyn hae; minmin tuh arawpaw angkiccua kha lawkuh hae zah mih kuih kya sarutah ange hae kha ccyng biate,

¹⁰“Khumnaw tuh bawitungkhung vawlan a haungpaw ah Pachia te Tuutaw kya nynh a um,” cite roi accae lante thawte a sia hae.

¹¹Bawitungkhung pepan, piccan hae te ahiinpaw sarangpaw sa pali pepan khe vaaw hae balyn tuh a thadyn hae, bawitungkhung malang khe bakhung hae zah Pachia kha a beik hae.

¹²“Amen! Hythuanaw, phu-enaw, hawnaw, lungtuabya honaw, sawtuanaw, thungnaw te thawsaenaw tuh ah Pachia kya zungzae te zungzae cia um sah! Amen,” a ci hae.

¹³Piccan hae kyaze lukheitpaw nynh tho zah, “Arawpaw angkiccua a lawkuh hae paw hynh-e hae hynh hum hae mou? Teitemou oun thua hae?” cite kae kha yn khia.

¹⁴Kae nynh, “Bawipaw, nang nynh na nyh,” ka cipya. Aning nynh kae kha, “Hynh-e hae tuh myarya lepaw vawsawrunaw kyate oun pou hae paw nynh thua hae; minmin nynh mih angkiccua kha Tuutaw chii kya sukuh hae zah a rawsahku hae.

¹⁵Tukeiccuze minmin tuh Pachia kya-e bawitungkhung malang khe um hae zah a beikinn kyakhe khuazi khuadae rya a lawpya hae; te bawitungkhung vawlan a haungpaw tuh minmin laku khe a um cih.

¹⁶Minmin tuh mih vuelaw boi vae lan khyh, mih tui mah haw boi vae lan khyh; khuanin nynh e vae lan khyh hae, maeeso nynh mah u vae lan khyh hae.

¹⁷Pawccecize bawitungkhung angaelung kya a umpaw Tuutaw nynh minmin kha a rin cih hae zah, hiinnaw tuidy kalan a cciakhae cih hae, te Pachia nynh mih mit kya-e mitphi balyn kha a hupah cih hae,” yn cipya.