Read Zotung Chin BYAPHY 8 Bible Online

BYAPHY 8 - Zotung Chin bible

BYAPHY 8

¹Tuutaw nynh ccangsarinaw tazeih kha he a kia tuh, vaawlang kya suimilan akhoi loukaw daetedae.

²Pachia malang a thadyn hae paw vaaw hae lu sari kha ka muih, te minmin kha mungkae ccangsari a pya hae.

³Ccangpaw vaawpaw nynh yn thua zah sui pakephepaw kha ccyngkute silawhang pe khe a thadyn; bawitungkhung malang a umpaw sui silawhang vawlan khe mithyaa hae balyn kya-e sawsangnaw ryte thuakhae khylan maee te upaw mynkhuhpaw patae kha tuh-e paw tuh a pya hae.

⁴Maee te upaw mynkhuhpaw a maeekhuh tuh mithyaa hae kya-e sawsangnaw ryte vaawpaw kuih kyate Pachia malang a kaethung.

⁵Tukoute vaawpaw nynh pakephepaw kha lah zah, tuh-e tuh silawhang kya-e maee khate phe a biasah koute laephi vawlan dae a vua; tetuh kholung yn thyh, roi yn ccae, khozaw yn laekuh zah innry yn suekuh.

⁶Mungkae ccangsari a hoi hae paw vaaw hae lu sari tuh mungkae tu lan paccynkute a um hae.

⁷Lu kheitnaw vaawpaw nynh mungkae he a tu tuh, chii ryte apykuhpaw hya te maee palou yn um zah, tuh-e hae tuh laephi vawlan a ccah hae; laephi pum thum pum kheit kha a u, thingku hae pum thum pum kheit te lonua ahinpaw balyn kha marya a u.

⁸Lu ningnaw vaawpaw nynh mungkae tu zah, maee nynh a upaw, myarya lepaw mua alopaw tuh rili lungkhu lang ccaring vua athua; te rili pum thum pum kheit tuh chiise lang a tang.

⁹Rili kya umpaw ahiinpaw sarangpaw pum thum pum kheit tuh a chih hae; sanphalung hae pum thum pum kheit tuh aroh.

¹⁰Lu thumnaw vaawpaw nynh a mungkae kha he a tu tuh, maeekhua hawte aruapaw awsipi tuh vaawlang te ccah zah, vawpi hae pum thum pum kheit vawlan te tuidy hae vawlan khe a ccah.

¹¹Tuh-e awsi min tuh Eccangkary acikuh. Tui hae pum thum pum kheit tuh eccangkary lang a tang; tui tuh akhahpaw lang rae athua keiccu tui keiccuze ccungccaw patae a chih hae.

¹²Lu palinaw vaawpaw nynh mungkae tu zah khuanin pum thum pum kheit, sawpaw pum thum pum kheit te awsi hae pum thum pum kheit tuh ro athua keiccuze tuh-e hae pum thum pum kheit tuh pong amoh; khuadae pum thum pum kheit tuh aw khyh; khuazi pum thum pum kheit mah tuhawte nynh thua.

¹³Ka do zah vaawlang angaelung kya azoupaw mosipi sa kheit nynh, “Vaawccungccaw hae lu thum nynh oun tu vae cih hae paw ccangpaw mungkae roi keiccuze laephi vaw um hae paw hanlan ngaethya lan kou um, ngaethya lan kou um, ngaethya lan kou um!” cite thawte a siapaw roi kha ka thae.