Read Zotung Chin BYAPHY 9 Bible Online

BYAPHY 9 - Zotung Chin bible

BYAPHY 9

¹Lu pangawnaw vaawpaw nynh mungkae tu zah, awsi ccangkheit tuh vaawlang te laephi vawlan a ccawpaw kha ka muih. Adianaw um lei lan akhupaw laekarung toh kha tuh-e paw tuh a pya hae.

²Aning nynh adianaw um lei lan akhupaw laekarung kha he a hung tuh, myarya lepaw maeephupi kya-e maeekhuh hawte laekarung lungkhu te maeekhuh a pouthung; laekarung kya-e maeekhuh keiccuze khuanin te vaawlui tuh pong amoh.

³Maeekhuh kyate tungkhipaw hae tuh laephi vawlan oun pou hae, laephi kya-e zekang hae nynh a hoi hae paw thungnaw te alokuhpaw thungnaw kha minmin tuh pya athua hae.

⁴Laephi kya-e lonua, ahinpaw aku te thingku ku kheit sanmah vawsawnaw pya leite, mih terui kya Pachia kya-e tazeih a hoi leipaw ccungccaw hae kyalya kha vawsaw a pya nawlan hae minmin kha kawpya athua hae.

⁵Minmin nynh tazeihkhia athua leipaw ccungccaw hae kha chianaw kaw hoi khyh hae, thuasalama sawpaw sah pangaw cia vawsaw pyanaw kaw tuh ua athua hae. Minmin nynh vawsawnaw pya hae zah accipaw tuh zekang nynh ccungccaw a teih vae ze accipaw te nynh aloku.

⁶Tuin ccyh kya ccungccaw hae nynh chinaw kha a ccungkuh cih hae zah muihkuh lan khyh hae; chi a ry hae zemah chinaw nynh a ccuetaw cih hae.

⁷Tuh-e tungkhipaw hae pungsan tuh rhawtuk lan a paccyn hae paw marang hae te nynh aloku; mih lu kya sui te raepaw bawilukhung a khungkuh hae paw te lokuh zah, mih maesue tuh ccungccaw maesue te nynh aloku.

⁸Mih sang tuh nopi hae sang te lokuh zah, mih haw tuh chindeih haw te nynh aloku.

⁹Mih kya-e bykhaw tuh sivaw bykhaw te lokuh zah, mih sake a zaw hae paw roi tuh rhawtuk lan a ccue hae paw marangle hae patae roi te nynh aloku.

¹⁰Zekang hawte leihmae hoi hae zah, mih leihmae kya hinpaw a um, tuh-e mih leihmae kyatuin sawpaw sah pangaw cia ccungccaw hae vawsaw pyanawpaw thungnaw a hoi hae.

¹¹Minmin nynh siapharan lu kheit hoi hae zah, tuh-e paw tuh adianaw um lei lan akhupaw laekarung kya-e vaawpaw nynh thua. A min tuh Hebru bya te Abaddon cikuh zah Grik bya te Apollyon acikuh.

¹²Ngaethya lan umpaw ccangkheit tuh athang vae; dotua, hynh-e koute ngaethya lan umpaw ccangning yn thua ung cih.

¹³Lu taruhnaw vaawpaw nynh mungkae tu zah, Pachia malang umpaw sui silawhang kya-e ki kipali kyate roi roikheit ka thae;

¹⁴tuh-e roi nynh mungkae a hoitupaw lu taruhnaw e vaawpaw kha, “Myarya lepaw Zufrates vawpi kya a khii hae paw vaaw hae lu pali kha supah hae,” a cipya.

¹⁵Ccungccaw hae pum thum pum kheit kha chia khylan tuh-e suimilan, tuh-e nin, tuh-e sawpaw, tuh-e kum hanlan a paccyn hae paw vaaw hae lu pali kha a supya hae.

¹⁶Marang a ccikuh hae paw rhawkaw phu milu tuh million za ning acih; minmin milu ccazing kha ka thae.

¹⁷Ka vizin kya marang hae kha hynhte ka muih: tuh-e marang hae tungvaw a ccikuh hae paw tuh maee hawte asepaw, ke hawte amepaw, safaia lung hawte ahinpaw bykhaw hae kha a hoi hae; marang hae lu tuh chindeih lu te nynh aloku hae, te mih khalang lungkhu te maee, maeekhuh te kemaee apou.

¹⁸Mih khalang lungkhu te apoupaw maee, maeekhuh te kemaee, hynh-e phuin thum keiccuze ccungccaw hae pum thum pum kheit tuh a chih hae.

¹⁹Marang hae mih thungnaw tuh mih khalang te mih leihmae kya nynh a um; mih leihmae tuh hupaw hawte lu hoi zah, tuh-e mih leihmae te ccungccaw hae kha vawsaw a pya hae.

²⁰Hynh-e shethya keiccu chi leite a laehypaw ccungccaw hae tuh raerangsaro hae kha thuasah, ngawmuih kho leipaw, nawthae kho leipaw te a cceih kho leipaw sui, ngun, sohin, lung, thingphe te raepaw zohtuh hae kha thuasah a beik khyh nawlan hae, mih kuih te a raeku hae paw hanlan ngaesikunaw hoi khyh hae.

²¹Minmin nynh ccungccaw a chia hae paw, ccungccaw a naaw hae paw, a ohhuakunaw hae paw te a ru hae paw kha ngaesikuh khyh hae.