Read Zotung Chin RUTH 2 Bible Online

RUTH 2 - Zotung Chin bible

RUTH 2

¹Naomi nynh a vawpaw kalansang te vaeccaw lu kheit a hoi, tuh-e paw tuh Elimelek puiziapaw thua zah hoirumnaw lante phe langkuhpaw, a min Boaz cikuhpaw nynh thua.

²Moab minphuinnung Ruth nynh Noami kha, “Loo lang ka la cceih sah lah, thaw yn ccih hae paw nulang khe ccamua ka la ccungbua sah,” a cipya. Noami nynh, “Ka ccanung, la cceih,” a cipya.

³Tukeiccuze Ruth nynh cceih zah, loolae khe loohruetu hae nulang khate ccamua kha a ccung. Te Elimelek puizia athuapaw Boaz a loo kya a thua.

⁴Ccyh sosoh aro te Boaz tuh Bethlehem khua kyate yn thua zah loohruetu hae kha, “BAWIPAW tuh nae kya um vae sah,” cipah hae zah, minmin nynh, “BAWIPAW nynh hythua ae pya vae sah,” cite a khungru hae.

⁵Tetuh Boaz nynh loohruetu hae piccanpaw, a ryalahtupaw kha, “E liaccanung hynh hum te mou aseku?” cite a khia.

⁶Loohruetu hae piccanpaw ryalahtupaw nynh, “Moab ram kyate Naomi ryte oun thuakheih hae paw Moab minphuinnung nynh thua.

⁷Aning nynh, ‘Thawccinawte loohruetu hae nulang e loohcce hae kya umpaw ccamua hynh ccungkute beih kae sueluakuh,’ a ci. Tukeiccuze yn cceih zah, awkhua te atu cia sosoh san haeung leite rya a lah,” a cipya.

⁸Te Boaz nynh Ruth kha, “Ka ccanung, ngaetua, ccamua ccung khylan loo ccangpaw kalan cceih nan, e hmin hynh poutaw nan, ka liaccaw hae kyahin tyty umbua.

⁹A rue cciamang hae paw loo kha do lah, mih nulangte zuikuh bua. Nang kha ae theihrya khyh nawlan hae, ccangvae hae kha kaw ka pya vae hae. Tui na haw ze, ang a umnaw langkhe cceih lah, ccangvae hae nynh a the hae paw tui kha na neih cih,” a cipya.

¹⁰Ruth nynh laekhu kya bakhung zah, “Kae tuh minphuin ccangpaw mang ka thua pite, nang nynh kae hynh peki lan ciate, pawccemou na malang maehoynaw hynh ka mue?” a cipya.

¹¹Boaz nynh amaw kha, “Na vawpaw a chih koute na ninnung hanlan na cyipyapaw balyn kha thuasah, na nung na paaw te na puinaw ram kha cciatawte na ny boi leipaw minphuin hae kalan nae cciapaw kha thuasah pong yn hopya vae hae.

¹²BAWIPAW nynh na cyisahnaw hanlan lasung ae pya sah lah, a sake kaw kya reku khylan nae ccianuapaw BAWIPAW , Israel Pachia nynh accingpaw lasung kha ae pya vae sah!” a cipya.

¹³Te Ruth nynh, “Ka bawipaw, na malang maehoynaw po ka mue vae sah, pawccecize kae tuh na ryalahtu hae laku e lu kheit ka thua khyh zemah, lungtangnaw nae pya zah hoyte bya nae beih,” a cipya.

¹⁴Looh ae ccyh lyakhe Boaz nynh Ruth kha, “Hynhlang yn cceih lah, e sanlou hae hynh yn aebua, misutui ariapaw kya na sanlou kha yn loihkuh bua,” a cipya. Tukeiccuze loohruetu hae pe khe a haungbua, te Boaz nynh thoupaw ccathae kha a pyalang, Ruth nynh phe byn lan a ae koute, beihtaraw alae ung.

¹⁵Ccamua ccungku lan he a thokuh tuh, Boaz nynh a ccangvae hae kyakhe, “Loohcce hae kya-e kha heize khuinkuh sah, pe nan oh.

¹⁶Loohcce hae kya-e abang kha aning hanlan nae kuih te zuupah oh lah, a ccungku ccaw cciatawpah oh, aning kha pe nan oh,” a cipya hae.

¹⁷Tukeiccuze Ruth nynh zete cia loo lungkhu khe a ccungku. Te a ccungkupaw looh kha tin zah barli ephah ccangkheit loukaw acih.

¹⁸Tuh-e looh tuh phu zah khua lungkhu lang a tee; aning nynh ccung zah a muepaw looh myarya lungpaw kha a ninnung nynh a muih. A byn koute alaepaw looh kha mah poh thuaa zah a ninnung kha a pya.

¹⁹A ninnung nynh amaw kha, “Atunin teimou ccamua na ccung? Teimou rya na law? Nang ae nyhpaw ccungccapaw tuh hythuanaw ccou vae sah,” a cipya. Tukeiccuze a ninnung kha rya a lawnaw ccungccapaw kong kha hopah zah, “Atunin rya ka lawnaw ccungccapaw min tuh Boaz a cikuh,” a cipya.

²⁰Naomi nynh a monung kyakhe, “A hiinpaw tungvaw thuasah, a chihpaw tungvaw thuasah a thawccinaw apaekuh leipaw BAWIPAW nynh aning kha hythuapya vae sah!” a cipya. Te Naomi nynh bua hopah zah, “Tuh-e ccungccapaw tuh aening puizia thua zah, ah naekuh hua oh paw vaeccaw nynh thua,” a cipya.

²¹Moab minphuinnung Ruth nynh, “Tuh-e paw nynh kae kha, ‘Ka ryalahtu hae nynh ka looh a rue kou mawlaezung hae, mih pe khe umbua,’ cite heize yn hopya,” a ci.

²²Naomi nynh a monung Ruth kha, “Ka ccanung, tuh-e paw a liaccaw hae ryte na cciakheih oh paw tuh ahoyhua, tuhkhyhze tuh ccangpaw loo kya ae theihryasei cih hae,” a cipya.

²³Tukeiccuze Boaz a liaccaw hae kyakhe umbua zah, barli te chanvuih ruepaw athang mawlaezung ccamua kha a ccungkuh; te a ninnung kya a umbua.