Read Zotung Chin RUTH 3 Bible Online

RUTH 3 - Zotung Chin bible

RUTH 3

¹A ninnung Naomi nynh Ruth kha, “Ka ccanung, na hanlan ahoy nawlan khuasahkunaw kha kae ccungpya lan accan.

²Rya na lahkheih oh paw liaccaw hae bawipaw Boaz tuh aening puizia nynh thua. Atu khuazi kya huimin kyakhe barli kha paraw te a zaw cih.

³Nang nynh tui singkuh lah, chitui thuhkuh, te na boeining ahoy huapaw kha lawkuh lah, huimin kalan la cceih; a ae a nia kou mawlaezung pisepaw kha nysakuh nan.

⁴He a ih te, a inaw hmin kha la syntaw; te la ccianua lah, a ccu a bongkupaw boei kha la kalyng lah, la ihbua; te aning nynh na cyi lanpaw kha ae hopah cih,” a cipya.

⁵Ruth nynh, “Nae hopyapaw balyn kha ka cyih cih,” a cipya.

⁶Tukeiccuze Ruth nynh huimin langkhe cceih zah, a ninnung nynh a hopya thyhte a cyi.

⁷Boaz tuh ae zah a neih koute lungpawte ccathae apumkuhpaw pe i lan a cceih. Te Ruth tuh zyazyate cceih zah a ccu a bongkupaw boei kha kalyng zah a ihbua.

⁸Ziraccyng khe pisepaw tuh phe siikuh zah, he a paleihkuh tuh a ccu lia lang nopinung lu kheit a ih cipaw a ny!

⁹Boaz nynh, “Hummou na thua?” cite khia zah, “Na ryalahtu Ruth nynh ka thua; nang tuh ah naekuhpaw puizia na thua keiccuze na boei dung kha na ryalahtunung kae hynh yn thybua,” a cipya.

¹⁰Aning nynh, “Ka ccanung, BAWIPAW nynh hythua ae pya vae sah; nang tuh ccangvae a hoirumpaw thuasah, a ryachipaw thuasah zui leite, masaty lya na la raepaw laeze atu nyathya na raepaw hynh-e lungzinaw hynh ahoyhua.

¹¹Ka ccanung, rih nan, nae ngiapaw balyn kha kae cyipah cih, pawccecize nang tuh nopi hoypaw nynh na thua cipaw kha ka khuapi kya-e ccungccaw balyn nynh ae ny hae.

¹²Kae tuh ah naekuhpaw puizia nynh ka thua ccaccing, thuasalama kae laeze anaekuh huapaw puizia lu kheit a um ung.

¹³Atu khuazi tuh hein kya um hin, awkhualan khe anaekuhpaw puizia nynh cyipya lanpaw kha aning nynh ae cyipya ry ze ahoy; cyih ccaleih vae sah. Thuasalama anaekuhpaw puizia nynh cyipya lanpaw kha ae cyipya ry khyh zetuh, BAWIPAW tuh a hiin thyhte, anaekuhpaw puizia nynh cyipya lanpaw kha kae nynh kae cyipah cih. Awkhualan awkhua cia ih hin,” a cipya.

¹⁴Tukeiccuze awkhualan awkhua cia a ccu lia langkhe a ih, thuasalama lu kheit te lu kheit mitmae liaku kho ccyh athua mawkhe a thokuh vae; pawccecize tuh-e paw nynh, “Huimin kalan nopinung nynh yn thuapaw kha humhung nynh mah nyh nan sah,” a ci.

¹⁵Te Boaz nynh, “Na zingkupaw na boei kha yn ccyng lah, dawtua,” a cipya. Tukeiccuze Ruth nynh daw zah barli kha aning nynh tounawpaw te kaw taruh a ccaepah koute duapah zah Ruth tuh khualae lang a cceih vae.

¹⁶A ninnung kya a thua te, a ninnung nynh, “Ka ccanung, pawtemou acyiku?” cite a khia. Te pisepaw nynh a tungvaw a cyipyapaw balyn kha hopah zah,

¹⁷“Aning nynh, ‘Na ninnung kalan na kuih ccakaete ki nan,’ yn cipah zah, e barli hynh tounawpaw te kaw taruh yn pya,” a cipya.

¹⁸A ninnung nynh, “Ka ccanung, e uccaw hynh pawtemou athang cih cipaw na ny mawlaezung ngaw hin, pawccecize pisepaw nynh e uccaw hynh atunin a lyn mawlaezung haeungtaw lan khyh,” a cipya.