Read Zotung Chin RUTH 4 Bible Online

RUTH 4 - Zotung Chin bible

RUTH 4

¹Boaz tuh koikua kalan cceih zah a haung, te Boaz nynh a la ho boi paw, anaekuh huapaw puiziapaw tuh yn cceih. Tukeiccuze Boaz nynh, “Ka ban, yn cciatua; hein kya haungtua,” a cipya. Te aning nynh yn cceih zah a haung.

²Te Boaz nynh khua lungkhu e piccan hae lu haw kha ko hae zah, “E kya haungtua oh,” cipah hae zah, a haung hae.

³Tetuh Boaz nynh anaekuh huapaw puiziapaw kha, “Moab ram kyate yn kipaw Naomi nynh aening puiziapaw Elimelek loohmin kha a zua.

⁴Tukeiccuze tuh-e kong tuh nang kha hopya lan cite ka tua zah kae hopya: Tuh-e loohmin tuh, hein kya a haung hae paw malang te ka minphuin hae kya-e piccan hae malang hin reku tua. Tuh-e loo tuh na shaw ry ze shawkuh; thuasalama na shaw ry khyh ze, ka ny nawlan yn hopya tua; pawccecize namaw laelan a shawkuh lanpaw humhung mah um vae khyh, nang koute tuh kamaw hynh nynh ka um vae,” a cipya. Tukeiccuze tuh-e paw nynh, “Ka shaw cih,” a ci.

⁵Tetuh Boaz nynh, “Noami kuih kyate tuh-e loohmin he na re nin khe, michipaw min kha a rho kya tynsah nawlan, michipaw zu, Moab minphuinnung Ruth kha mah na rebia vae,” a cipya.

⁶Tetuh anaekuh huapaw puiziapaw nynh, “Kamaw rho kha a rohsei cih keiccuze tuh-e loohmin tuh ka shaw kho vae lan khyh. Kae nynh ka shaw kho vae khyh keiccuze ka kya-e shawnaw kaw kha lawkuh ccavae,” a cipya.

⁷Langmawlya Israel hae kyaze uccaw shawnaw te rulaekunaw konglang phungzae tuh hynhte nynh thua: nawccawnaw kha tynsah nawlan, lu kheit nynh a phanah kha khahkuh zah ccangpaw lu kheit kha a pya; e hynh Israel hae kya ccaekia tynsahnaw zia nynh thua.

⁸Tukeiccuze anaekuh huapaw puiziapaw nynh Boaz kha, “Namaw elang rekuh,” cite hopah zah, a phanah kha a khahpyaku.

⁹Tetuh Boaz nynh piccan hae te ccungccaw balyn kyakhe, “Elimelek uccaw balyn kha thuasah, Khilion te Mahlon uccaw balyn kha thuasah Naomi kuih kyate kae nynh ka re vae cipaw atunin a nyhtu ccaekia hae tuh nanning hynh nynh na thua oh.

¹⁰Michipaw min tuh a puizia hae kyate thuasah, a puinaw khua koikua kyate thuasah zosah leite, michipaw min tuh a rho kya tynsah nawlan, Mahlon zu, Moab minphuinnung Ruth kha mah ka zu lang ka re vae; atunin nanning tuh ccaekia hae nynh na thua oh,” a ci.

¹¹Tetuh koikua kya um hae paw piccan hae te ccungccaw balyn nynh, “Kaening tuh ccaekia hae nynh kae thua. Israel ciihan a thadynsah hae paw nopi hae lu ning Rachel te Leah hawte, na inn lang yn cceih cih paw nopinung kha BAWIPAW nynh rae vae sah. Efrathah kya na laan na sui ua sah lah, Bethlehem kya na minthaan vae sah;

¹²BAWIPAW nynh e liaccanung kyate ae pya lanpaw ccaawno hae liate, na ciihan tuh Tamar nynh Judah a saahpyapaw Perez ciihan hawte thua vae sah,” a ci hae.

¹³Tuhcite Boaz nynh Ruth kha umkhae zah a zu lang a tang vae. Pynkheihlan a ihkheih hae te, BAWIPAW nynh ccaawpoinaw kawpya zah ccapaw lu kheit a saah.

¹⁴Te nopi hae nynh Naomi kha, “Atunin anaekuhpaw puizia leite ae nung khyh zah, ae cciataw leipaw BAWIPAW tuh thehoyte um sah; a min tuh Israel hae kya thaan vae sah!

¹⁵Aning tuh na hiinnaw ae thawsahthuitu te na taw vae te ae do-oihtu athua cih; nang kha ae sungsah zah ccapaw lu sari laeze na hanlan a hoyhuanung na monung nynh ccapaw a saah vae,” a cipya hae.

¹⁶Naomi nynh imua kha lah zah a by kya a pom, te imua ngawtu lang a tang.

¹⁷Innpaw hae nopi hae nynh imua kha a minphu hae zah, “Naomi hanlan ccapaw lu kheit a pui vae,” a ci hae. Minmin nynh imua kha Obed cite min a phu hae; aning tuh Jesse a paaw lang yn tang, Jesse tuh David paaw nynh thua.

¹⁸E hae tuh Perez ciihan hae nynh thua hae: Perez tuh Hezron paaw,

¹⁹Hezron tuh Ram paaw, Ram tuh Amminadab paaw,

²⁰Amminadab tuh Nahshon paaw, Nahshon tuh Salmon paaw,

²¹Salmon tuh Boaz paaw, Boaz tuh Obed paaw,

²²Obed tuh Jesse paaw, Jesse tuh David paaw nynh thua.