Read Zotung Chin 1 SAMUEL 1 Bible Online

1 SAMUEL 1 - Zotung Chin bible

1 SAMUEL 1

¹Efraim muaram kya Ramathaim-zofim khua khe ccungccapaw lu kheit um zah a min tuh Elkanah acikuh; aning tuh Jeroham ccapaw, Jeroham tuh Elihu ccapaw, Elihu tuh Tohu ccapaw, Tohu tuh Efraim phinpaw Zuf ccapaw nynh thua.

²Elkanah tuh zu zuning a hoi; lu kheit min tuh Hannah cikuh zah, ccangpaw lu kheit min tuh Peninnah acikuh. Peninnah tuh ccaaw a hoi, thuasalama Hannah tuh ccaaw hoi khyh.

³Elkanah tuh vaaw BAWIPAW kha beik khylan te silaw khylan a umnaw khua kyate Shiloh khua lang kum takyh a cceih. Eli ccapaw hae lu ning Hofni te Finehas tuh Shiloh khua kyaze BAWIPAW ranpibawi hae nynh thua hae.

⁴Elkanah nynh si a law nin khe, a zu Peninnah te a ccapaw hae te a ccanung hae balyn kha mih hanpaw raveih kha a pya hae;

⁵BAWIPAW nynh Hannah kha ccaawsaahnaw kaw a pya khyh zemah, Elkanah nynh a sungsah keiccuze ccoupaw leit ning kha a pya.

⁶BAWIPAW nynh ccaawsaahnaw kaw a pya khyh keiccuze a rhawnung nynh amaw kha a thinriasah khylan palei a ccyaku.

⁷Tuhcite kum kheit koute kum kheit palei acyihkuh; Hannah nynh BAWIPAW inn lang a ccia takyhte, Peninnah nynh leih a ccyaku. Tukeiccuze Hannah tuh rah zah looh mah leih ae khyh.

⁸A vawpaw Elkanah nynh, “Hannah, pawccemou na raw? Pawccemou na ae khyh? Pawccemou na ngaethya? Kae tuh nang na hanlan ccapaw lu haw laeze ka hoyhua khaw?” a cipya.

⁹Shiloh khua kya a ae a neih kou hae te, Hannah tuh thokuh zah BAWIPAW malang khe saw a sang. Ranpibawi Eli tuh BAWIPAW beikinn thuakawtung pe umpaw haungnaw kyakhe a haung.

¹⁰Hannah tuh a lungria myarya thae zah BAWIPAW kalan sawsang zah thawte a rah.

¹¹Hannah nynh hynh-e byakinkunaw hynh a rae: “Pou vaaw BAWIPAW , na seenung ka riathaenaw hynh muihpyate nae liathui zah, na seenung hynh ning leite, ccapise nae pya zetuh, a hiin lungkhu balyn amaw kha BAWIPAW kalan ka pya cih. Misutui te ruithyapaw atui kha neih lan khyh zah, a sang kha ngo thua lan khyh,” a ci.

¹²BAWIPAW malang saw a sang cciamang lyakhe, Eli nynh a mung kha phang a do.

¹³Hannah nynh roi accae lei lante saw a sang; a mung kyalya kha piasah zah, a roi tuh thae lan a um khyh keiccuze aruipaw nynh thua cite Eli nynh a tua.

¹⁴Tukeiccuze Eli nynh amaw kha, “Hohseciamou na rui ung cih? Na misutui kha ccaring nung ccavae,” a cipya.

¹⁵Thuasalama Hannah nynh, “Thua khyh, ka bawipaw, kae tuh myarya a lungriathaepaw nopinung nynh ka thua; misutui thuasah, ruithyapaw atui thuasah ka neih khyh, BAWIPAW malang khe ka thinlung kha nynh ka laee.

¹⁶Na seenung hynh nopi hoyleipaw lang yn ria nan, pawccecize myarya lepaw ka lungriathaenaw te ka ngaethyanaw kha nynh ka ho cciamang,” a cipya.

¹⁷Tetuh Eli nynh, “Ngaengante la cceih ccavae; Israel Pachia nynh na ngiakupaw kha ae pya vae sah,” a cipya.

¹⁸Te Hannah nynh, “Na seenung kae tuh na malang maehoynaw ka mue vae sah,” a cipya. Te nopinung tuh a umnaw lang cceih zah a vawpaw ryte ae hae neih hae zah, ngaethyanaw maesue hoi vae khyh.

¹⁹Minmin tuh awkhua takaw te tho hae zah BAWIPAW kha a beik hae; te Ramah khua umpaw mih inn langkhe a ki hae. Elkanah nynh Hannah kha ikhae zah BAWIPAW nynh Hannah kha a liathui.

²⁰Accyh yn zaw te, Hannah tuh ccaawpoi zah ccapaw kha a saah, tuh-e ccapaw tuh Samuel cite min a phu, pawccecize aning nynh, “Amaw tuh BAWIPAW kalan ka ngiakupaw nynh thua,” a ci.

²¹Elkanah te a innbyn hae balyn tuh kum takyh raepaw silawnaw kha BAWIPAW kalan rae khylan te bya a kinkupaw kha pya khylan a cceih hae.

²²Thuasalama Hannah tuh cceih khyh, pawccecize aning nynh a vawpaw kha, “Imua tuh BAWIPAW malang thuakhaete, tuin kya zungzae a um nawlan, mateitui phia athua koute palou ka cciakhae cih; aning tuh thyaasahpaw ccungccaw lang zungzae hanlan ka pya cih,” a cipya.

²³A vawpaw Elkanah nynh, “Ahoyhua na ci hawte cyih, mateitui na phia mawlaezung ngaw hing; BAWIPAW nynh a bya palia kha tynsah vae sah,” a cipya. Tukeiccuze nopinung nynh mateitui a phia mawlaezung um zah imua kha matei a zusah.

²⁴Imua kha mateitui he a phia te, kum thum acihpaw tangnuapaw sa kheit, chanvuih ephah ccangkheit te misutui ling kheit ryte imua kha cciakhae zah, Shiloh khua umpaw BAWIPAW inn kya a thuakhae; imua tuh a no ung.

²⁵Tangnuapaw kha theih hae zah, imua kha Eli kalan a cciakhae hae.

²⁶Te Hannah nynh, “Pou ka bawipaw! Na hiin thyhte, ka bawipaw, kae tuh hynh-e kya namaw malang thadynte BAWIPAW kalan saw a sangpaw nopinung kha nynh ka thua.

²⁷E imua hanlan saw ka sang zah ka ngiakupaw kha BAWIPAW nynh yn pya vae.

²⁸Tukeiccuze amaw tuh BAWIPAW kalan ka hohsaku vae; a hiin lungkhu balyn, aning tuh BAWIPAW kalan pya athua vae,” a ci. Te nopinung nynh BAWIPAW hanlan tuin kyakhe a cciataw vae.