Read Zotung Chin 1 SAMUEL 14 Bible Online

1 SAMUEL 14 - Zotung Chin bible

1 SAMUEL 14

¹Nin kheit tuh Saul ccapaw Jonathan nynh a rhawtuk-uccaw a ccyngtu ccangvaepaw kha, “Rang, khuhlang raw e Filistin rhawkaw hae kalan cceih sih,” a cipya. Thuasalama a paaw kha hopah khyh.

²Saul tuh Gibeah khua atelang e Migron khua kya umpaw ccalee ku kaw khe a um; amaw kya umpaw rhawkaw hae tuh za taruh loukaw acih hae,

³Shiloh khua kya umpaw BAWIPAW ranpibawi Eli ccapaw Finehas a ccapaw Ikhabod a unopaw Ahitub ccapaw Ahijah tuh ranpibawi angki ccyng zah a umbua. Jonathan a cceih vae cipaw kha ccungccaw hae nynh nyh khyh hae.

⁴Jonathan nynh Filistin rhawkaw hae kalan ccia lan a paccynkunaw laansi kyakhe voi ning mawte chialungsakan hae um zah, ccangkheit min tuh Bozez thua zah, ccangpaw ccangkheit min tuh Seneh nynh thua.

⁵Chialungsakan ccangkheit tuh thahlang khe Mikmash khua lang hawi zah, ccangpaw ccangkheit tuh alia langkhe Geba khua lang a hawi.

⁶Jonathan nynh a rhawtuk-uccaw a ccyngtu ccangvaepaw kha, “Rang, khuh-e vingdungawkuh lei hae paw rhawkaw hae kalan cceih sih; BAWIPAW nynh aening hanlan rya poh oun lawpah kho; pawccecize ccungccaw alung liate thuasah, azya liate thuasah BAWIPAW khumnaw kha humhung nynh mah khee kho lan khyh,” a cipya.

⁷A rhawtuk-zunghe ccyngtu nynh, “Na lung nynh a ry hawte cyih ccaleih. Na kya mang ka um; na tuanaw hawte nynh ka tuanaw tuh athuabua,” a cipya.

⁸Tetuh Jonathan nynh, “Khuh-e ccungccaw hae kalan ccia lan zah langsapyaku lan hae.

⁹Minmin nynh, ‘Nae kalan kae thua maw cia oun la ngaw oh,’ a ci hae ze, ah umnaw hmin kya thadyn lan zah minmin kalan ccia lei lan.

¹⁰Thuasalama minmin nynh, ‘Kae kalan oun cceih oh,’ a ci hae ze, ccia lan; pawccecize BAWIPAW nynh minmin kha aening kuih kya oun pya vae. Tuh-e tuh aening elang muihsahnaw athua cih,” a cipya.

¹¹Tukeiccuze parouh mawte Filistin rhawkaw hae kalan khe a langsapyaku hae; te Filistin hae nynh, “Dotua oh, Hebru hae tuh a rekunaw hae akhunaw kyate oun pou vae hae,” a ci hae.

¹²Rhawkaw hae nynh Jonathan te a rhawtuk-zunghe ccyngtu kha ko hae zah, “Kae kalan rang oh, hankhakheit kae muihsah cih oh,” a cipya hae. Jonathan nynh a rhawtuk-zunghe ccyngtu kha, “Ka nulang te yn zui; pawccecize BAWIPAW nynh minmin kha Israel kuih kalan a pya vae hae,” a cipya.

¹³Te Jonathan tuh a kuih a ccu te vawthung zah, a rhawtuk-zunghe ccyngtu nynh a nulang te a zui. Filistin hae tuh Jonathan malang khe khuliakuh hae zah, a nulang te a rhawtuk-zunghe ccyngtu nynh a chia hae.

¹⁴Jonathan te a rhawtuk-zunghe ccyngtu nynh masaty a chia hae paw kyatuin, ekah angankuh loukaw akopaw laephi kyakhe, lu kuin loukaw a chia hae.

¹⁵Ryahmin kya, loo kya te ccungccaw balyn kyakhe siikunaw a um; rhawviatu rhawkaw hae te thiingtu hae heize a thyngkuh hae; innrysuekuh zah siikunaw pipi lang a tang.

¹⁶Benjamin ram, Gibeah khua e Saul rhawviatu hae nynh do hae zah, nulang malang phiariphiarae a ccue hae paw Filistin hae kha a muih hae.

¹⁷Saul nynh a kya umpaw rhawkaw hae kha, “Milu ria oh, hummou aening kyate a pou, dotua oh,” a cipya hae. Milu a ria hae tuh, Jonathan te a rhawtuk-uccaw ccyngtupaw um vae khyh hae.

¹⁸Saul nynh Abijah kha, “Pachia thingkua kha hynhlang yn lah,” a cipya. Pawccecize tuin ccyh lya tuh Pachia thingkua tuh Israel hae kya a cceihbua.

¹⁹Saul nynh ranpibawi a hopya lyakhe, Filistin hae ryahmin kya ngaluin-ngaluin ccaepaw roi tuh houhouh athan; Saul nynh ranpibawi kha, “Na kuih kha sawbung tua,” a cipya.

²⁰Saul te a kya umpaw ccungccaw balyn tuh sueluakuh hae zah rhawtuknaw kalan a cceih hae; Filistin hae tuh mimaw te mimaw thaloi te baekuh hae zah, lungmuanaw pipi a um.

²¹Langmaw lyaze Filistin hae kya um hae zah minmin ryte ryahmin kalan a cceihkheih hae paw Hebru hae mah Saul te Jonathan ryte a umkheih hae paw Israel hae kalan maekuh hae zah a umbua vae hae.

²²Tuhawte, Efraim muaram kya a rekuh hae paw Israel hae balyn nynh Filistin hae a ccue vae hae cipaw he a thae hae tuh, rhawtuknaw kya panbua hae zah Filistin hae kha thawte a deehui bua hae.

²³Tuhcite BAWIPAW nynh Israel kha tuin nin kya taenaw a pya. Rhawtuknaw tuh Beth-aven khua khunglang po athua, Saul ryte um hae paw rhawkaw hae tuh ria hae zah mih balynte thong haw loukaw acih hae. Rhawtuknaw tuh Efraim muaram lang cia apazaekuh.

²⁴Saul nynh tuin nin khe tuaty leite rya a lawsei. Rhawkaw hae tungvaw thyalawnaw kha rae zah, “Ka rhaw hae kha phu ka law maw hae, zete ccyh athua maw looh a aepaw miakaw tuh thyalawnaw mue sah,” a ci. Tukeiccuze rhawkaw hae tuh looh ae khyh hae.

²⁵Rhawkaw hae balyn nynh khoibu kha thuanua hae zah, laekhu kya khoitui a um.

²⁶Rhawkaw hae nynh ramkaw a thua hae tuh, khoitui tuh accaw cciamang; thyalawnaw kha a ri hae keiccuze mih kuih kha mih khalang lungkhu lang pukuh khyh hae.

²⁷Thuasalama a paaw nynh rhawkaw hae kya thyalawnaw bya a hopaw kha Jonathan nynh nyh khyh; tukeiccuze a kuih te a ccyngpaw hoitang dung khate khoidaw kha sua zah a kuih te he a ae tuh a mit a ccaethya hua.

²⁸Rhawkawpaw lu kheit nynh, “Na paaw nynh rhawkaw hae kha thyalawnaw te tynkaring lan hopah hae zah, ‘Atunin looh aepaw miakaw tuh thyalawnaw mue sah,’ a ci. Tukeiccuze rhawkaw hae tuh mih thawzya vae,” a cipya.

²⁹Tetuh Jonathan nynh, “Ka paaw nynh ram hynh vawsaw a pya; e khoitui ccapyh ka taangtua keiccuze ka mit accaethyapaw hynh dotua oh.

³⁰Rhawkaw hae nynh mih rhaw hae kya-e luadepaw uccaw kha atunin rythyte a ae hae ze, pawcih baban mou ahoyhua cih; atu tuh Filistin hae kha patae ah theih kho vae khyh oh,” a ci.

³¹Tuin nin kya Filistin hae kha Mikmash khua kyate Aijalon khua kyacia a chia hae, rhawkaw hae tuh myarya mih thawzya;

³²tukeiccuze rhawkaw hae nynh luadepaw uccaw kha ccianua hae zah tuu hae, tangnuapaw hae te vaetuataw hae kha lah hae zah laephi kya a theih kou hae te, rhawkaw hae nynh sachii ryte a aede hae.

³³Te tuh-e kong tuh Saul kyakhe, “Dotua, rhawkaw hae nynh chiise ryte aede hae zah BAWIPAW kya a sei hae,” cite a hopya hae. Te Saul nynh, “Nanning tuh nae lungzi vae khyh; hynhlang ka malang hin lungtungpi ccangkheit oun tou oh,” a cipya hae.

³⁴Saul nynh, “Rhawkaw hae laku lang la cceih oh lah, minmin kyakhe, ‘Ccungccaw balyn nynh mih tangnuapaw khyhze mih tuu kha oun cciakhae hae sah lah, e kyahin theih hae sah lah, ae hae sah; chiise ryte aedete BAWIPAW kya sei nan oh,’ cite hopah oh,” a cipya hae. Tukeiccuze tuh-e khuazi khe rhawkaw hae balyn nynh mih tangnuapaw hae kha oun cciakhae hae zah tuin kyakhe a chia hae.

³⁵Te Saul nynh BAWIPAW hanlan silawhang kha a duapya; tuh-e tuh BAWIPAW elang a duapyapaw masaty silawhang nynh thua.

³⁶Te Saul nynh, “Khuazi khe Filistin hae kha deehui oh sih lah, awkhua khuadae cia minmin kha theih oh sih; lu kheit san haang nan oh sih,” a cipya hae. Minmin nynh, “Ahoy na ci hawte cyih ccaleih,” a ci hae. Thuasalama ranpibawi nynh, “E kyahin Pachia kalan naekuh hin oh sih,” a ci.

³⁷Tukeiccuze Saul nynh Pachia kha ngia zah, “Filistin hae kha ka deehui cih hae tou? Minmin kha Israel hae kuih kalan na pya cih hae tou?” a ci. Thuasalama tuin nin kya Pachia nynh byakhung khyh.

³⁸Saul nynh, “Ccungccaw cciakhaetu hae balyn, hynhlang rang oh; e seinaw hynh atunin pawtemou yn tho cipaw kha ccungtua oh sih.

³⁹Pawccecize Israel a khumtu BAWIPAW tuh a hiin thyhte, tuh-e seinaw tuh ka ccapaw Jonathan tungvaw a um lanze heize, aning tuh a chih ccaccing cih!” a ci. Thuasalama ccungccaw hae balyn laku kya bya a khungrupaw lu kheit san um khyh.

⁴⁰Saul nynh Israel hae balyn kyakhe, “Nanning tuh san kheit kya na um cih oh zah, kae te ka ccapaw Jonathan tuh san kheit kya kae um cih,” a cipya hae. Ccungccaw hae nynh Saul kha, “Ahoy na ci hawte cyih ccaleih,” a cipya hae.

⁴¹Te Saul nynh, “Pou BAWIPAW , Israel Pachia, pawccemou atunin na ryalahtu hynh bya nae khung khyh? E cyiseinaw hynh ka tungvaw thuasah, ka ccapaw Jonathan tungvaw thuasah a um ze, pou BAWIPAW , Israel Pachia, Urim kha oun pya; thuasalama e cyiseinaw hynh na ccungccaw Israel hae tungvaw a um ze, Thummim kha oun pya,” a ci. Te ccungthydungnaw tuh Jonathan te Saul tungvaw khe ccah zah ccungccaw hae tuh a lue hae.

⁴²Te Saul nynh, “Kae te ka ccapaw Jonathan laku kya ccungthydungnaw kha rae oh,” a ci. Te Jonathan kya accah.

⁴³Tetuh Saul nynh Jonathan kha, “Pawmou na cyisei, yn hopah,” a cipya. Jonathan nynh, “Ka ccyngpaw hoitang dung khate khoitui beihtaraw kha ka taangtua; hein kya mang ka um, ka chih cih,” a cipya.

⁴⁴Saul nynh, “Pachia nynh ka tungvaw tuhcite cyih sah lah, tuhlaeze mah cyih vae sah; na chih ccaccing cih, Jonathan!” a cipya.

⁴⁵Te ccungccaw hae nynh Saul kha, “Israel tungvaw kya hynh-e taenaw lepaw a raepaw Jonathan tuh tou a chih cih? Tuh-e tuh cyihkuh nan sah! BAWIPAW tuh a hiin thyhte, a lu kya-e a sangrua ccangkheit sanmah laekhu lang ccah lan khyh; pawccecize aning tuh Pachia ryte atunin rya a lahkheih hae,” a cipya hae. Tuhcite ccungccaw hae nynh Jonathan kha shawkhaw hae zah chih khyh.

⁴⁶Te Saul nynh Filistin hae kha deehui leite a kitaw hae; Filistin hae tuh mih umnaw hmin lang a cceih hae.

⁴⁷Saul nynh Israel hae siapharan lang he a tang te, a pepan e a rhaw hae balyn—Moab hae, Ammon hae, Edom hae, Zobah siapharan hae te Filistin hae kha rhaw a tuk hae; rhaw a tuknaw miakaw kya minmin kha a tae hae.

⁴⁸Rawthungte rhawtuk zah Amalek hae kha a chia hae, Israel hae kha minmin a luadetu hae kuih kyate a luesah hae.

⁴⁹Saul ccapaw hae tuh Jonathan, Ishvi te Malkhishua nynh thua hae; a ccanung hae lu ning min tuh: atawccanung min tuh Merab cikuh zah, asoihuanung min tuh Mikhal acikuh.

⁵⁰Saul a zu min tuh Ahinoam cikuh zah Ahimaaz ccanung nynh thua. A rhawkaw hae bawipaw min tuh Abner cikuh zah Saul a paaw uno Ner ccapaw nynh thua;

⁵¹Saul a paaw tuh Kish thua zah, Abner paaw Ner tuh Abiel ccapaw nynh thua.

⁵²Saul a hiin lungkhu balyn tuh Filistin hae kha thawte a tuk hae; Saul nynh athawsaepaw te arawthungpaw a muihpaw miakaw kha a rhawkaw lang a khang hae.