Read Zotung Chin 1 SAMUEL 19 Bible Online

1 SAMUEL 19 - Zotung Chin bible

1 SAMUEL 19

¹Saul nynh David chia lanpaw kong kha a ccapaw Jonathan te a ryalahtu hae kyakhe a hopya hae. Thuasalama Saul ccapaw Jonathan nynh David kha myarya a sungsah.

²Jonathan nynh David kha, “Ka paaw Saul nynh nang kha chia lan a paccynku; tukeiccuze awkhualan awkhua kya raeringkuh; muih kho leinaw hmin kya um lah reku tua.

³Ka cceih cih zah na umnaw loo kya ka paaw pe khe ka thadyn cih, te ka paaw kyakhe na konglang kha ka hopah cih; ka nypaw hankhakheit a um ze kae hopah cih,” a cipya.

⁴Jonathan nynh a paaw Saul kyakhe David a hoynaw kong kha hopah zah, “Siapharan nynh a ryalahpaw David tungvaw seinaw rae nan sah, pawccecize aning nynh na tungvaw sei khyh, rya a lawpaw hynh na hanlan ahoypaw cci nynh thua;

⁵a hiinnaw duaaku leite Filistin paw kha theih zah, Israel hae balyn hanlan myarya lepaw taenaw kha BAWIPAW nynh a rae. Tuh-e tuh na muih zah na lungtua; tukeiccuze akonglang um leite David kha chiate, seinaw a hoi leipaw ccungccaw tungvaw kya pawccemou seinaw na rae lanpaw tuh?” a cipya.

⁶Saul nynh Jonathan bya tuh ngae zah, Saul nynh, “BAWIPAW tuh a hiin thyhte, aning tuh chia thua lan khyh,” cite thyalawkute bya a kinku.

⁷Tukeiccuze Jonathan nynh David kha ko zah hynh-e konglang balyn kha a hopya. Te Jonathan nynh David kha Saul kalan cciakhae zah, langmaw hawte a kyakhe bua a um.

⁸Rhawtuknaw bua um zah David tuh Filistin hae kha tuk khylan a cceih. Aning nynh patae a chia hae keiccuze minmin tuh amaw malang te a ccue hae.

⁹Saul tuh a ccoi ccyngkute a inn lungkhu a haung lyakhe, BAWIPAW kyate yn thuapaw muisaw hoyleipaw tuh a tungvaw a thua; tuh ccyh lyakhe David tuh tintang palei a khua.

¹⁰Saul nynh David kha pang kya phang bingkuh lan ccoi te khoih lan a ccung; thuasalama Saul kha a lingku mang, tukeiccuze ccoi tuh pang kya a bingkuh. David tuh ccue zah, tuh-e khuazi kya phe a lue.

¹¹Saul nynh David kha awkhua khe chia lan paccyn zah, David kha ngaw khylan a inn langkhe locceihtu hae kha a sawnua hae. David zu Mikhal nynh amaw kha, “Atu khuazi kya na hiinnaw kha na khumku khyh ze, awkhualan tuh chia na thua cih,” a cipya.

¹²Tukeiccuze Mikhal nynh David kha thanlan-aw kyate rungsah bung zah, aning tuh ccue zah a lue.

¹³Mikhal nynh zohtuh ccangkheit kha lah zah a ikhung vawlan a nung; miaa ming te kuakuhpaw boei te a lu kha bong zah boei a thy.

¹⁴Saul nynh David ko lan locceihtu hae kha he a saw hae tuh, Mikhal nynh, “David a ccih,” a cipya hae.

¹⁵Saul nynh David do khylan locceihtu hae kha saw hae zah, “Aning kha ka chia ccaw, ikhung ryte ka kalan oun cciakhae oh,” a cipya hae.

¹⁶Locceihtu hae nynh he a tee hae tuh, miaa ming te kuakuhpaw boei te a lu bong hae paw zohtuh tuh ikhung vawlan khe a la um.

¹⁷Saul nynh Mikhal kha, “Pawccemou hynhte nae ling zah, ka rhawpaw tuh a lue ccaw cite na cciasah?” a cipya. Mikhal nynh Saul kha, “Aning nynh kae kha, ‘Yn ccia sah, tuhkhyhze nang kha kae theih cih,’ yn ci,” cite a hopya.

¹⁸Tuhcite David tuh ccue zah a lue; Ramah khua umpaw Samuel kalan cceih zah, Saul nynh a tungvaw a cyipaw balyn kha a hopya. Aning te Samuel tuh cceih hae zah Naioth khua kya a um hae.

¹⁹“David tuh Ramah khua pe Naioth khua kya nynh a um,” cite Saul kha a hopya hae.

²⁰Tetuh David kyng khylan Saul nynh locceihtu hae kha a saw hae. Profeh hae phu kya Samuel tuh lupi lang umte profehbya a ho cciamang hae paw kha locceihtu hae nynh he a muih hae tuh, Pachia muisaw tuh Saul a locceihtu hae tungvaw kya yn thua zah, minmin mah profehbya a hobua hae.

²¹Tuh-e kong tuh Saul kha he a hopah hae tuh, ccangpaw locceihtu hae kha saw hae zah, tuh-e hae mah profehbya a hobua hae. Saul nynh vae thumnaw locceihtu hae kha saw hae zah, tuh-e hae mah profehbya a hobua hae.

²²Tetuh amaw ccaccei tuh Ramah khua lang a cceih. Seku khua kya umpaw tuisung pi kya he a thua te, “Samuel te David tuh teimou a um hae?” cite a khia hae. Te lukheitpaw nynh, “Ramah khua pe e Naioth khua kya nynh a um hae,” a cipya.

²³Te Ramah khua pe e Naioth khua langkhe cceih zah, Pachia muisaw tuh Saul tungvaw yn thua. A ccia cciamang lyakhe, Ramah khua pe e Naioth khua a thua mawlaezung profehbya po a ho.

²⁴A boeining kha khahkuh zah Samuel malang khe profehbya a ho. Tuh-e nin ninlang te tuh-e khuazi zidae tuh a ccakaete a huekuh. Tukeiccuze, “Saul mah profeh lang a tangbua vae tou?” cite leih a ho hae.