Read Zotung Chin 1 SAMUEL 24 Bible Online

1 SAMUEL 24 - Zotung Chin bible

1 SAMUEL 24

¹Saul tuh Filistin hae a deehuinaw hae kyate he yn ki tuh, “David tuh En-gedi ramkaw kya a um,” cite a hopya hae.

²Tetuh Saul nynh Israel hae balyn kya-e popaw ccungccaw thong thum kha ko hae zah, David te a ccungccaw hae kha ccung khylan Sathaw Lungpi langkhe a cceih.

³Laanpi pe umpaw tuukhia kya thua zah, tuin kyakhe lungkarung ccangkheit a um; Saul tuh toiku lan a tee. David te a ccungccaw hae tuh lungkarung alungkhu lang adianaw kyakhe a haung hae.

⁴David a ccungccaw hae nynh, “ ‘Na rhawpaw kha na kuih kya kae pya cih zah, ahoy na ci hawte a tungvaw na cyih cih,’ cite BAWIPAW nynh ae hopyapaw nin tuh hynh-e nin hynh nynh athua vae,” a cipya hae. Te David nynh cceih zah Saul angkiccua apaki kha zya a aw.

⁵Saul angkiccua apaki kha a awpya keiccuze David tuh nyalangte ngaesikuh zah,

⁶a ccungccaw hae kyakhe, “BAWIPAW nynh chitui thuhpaw ka bawipaw tuh BAWIPAW kya-e chitui thuhpaw athua keiccuze a tungvaw ka kuih hangnua lanpaw kha BAWIPAW nynh yn khee vae sah,” a cipya hae.

⁷Tuhcite David nynh a ccungccaw hae kha pe biate hopah hae zah Saul tuk lanpaw kha kaw-ua khyh hae. Te Saul tuh thokuh zah lungkarung kyate pou zah a cceih.

⁸Tukoute David mah thokuh zah lungkarung kyate pou zah Saul a nulang te, “Ka bawipaw siapharan!” cite a ko. Saul nynh a nulang he a do tuh, David nynh laekhu kya bakhung zah sawtuanaw a pya.

⁹David nynh Saul kha, “ ‘David nynh nang kha vawsawnaw pya lan a zuaku,’ cite a ho hae paw bya kha pawccemou na ngae?

¹⁰Atunin mawkhe lungkarung kya BAWIPAW nynh nang kha ka kuih kya yn pya cipaw kha na mit nynh a muih vae; abang nynh nang chia lanpaw kha yn tuhou hae zemah, nang kha kae haang. ‘Ka bawipaw tuh BAWIPAW nynh chitui thuhpaw athua keiccuze ka kuih ka hangnua lan khyh,’ ka ci.

¹¹Apang, dotua, ka kuih kya umpaw na angkiccua apaki hynh dotua; na angkiccua apaki tuh ka aw zah namaw kha kae chia khyh keiccuze, ka kuih kya hoyleinaw thuasah, cyiseinaw thuasah um khyh cipaw kha ccaerarih lan na nyh cih zah na muih cih. Ka hiinnaw chia lan nae ccung salamah na tungvaw ka sei khyh.

¹²Nang te kae laku kya BAWIPAW nynh bya oun pia vae sah! BAWIPAW nynh na tungvaw kya phu yn lawpah vae sah; thuasalama ka kuih nynh nang kha ae rawse lan khyh.

¹³Langmawlya e phungtangbya kyaze, ‘Ccungccaw hoyleipaw kyate hoyleinaw a pou,’ cite a um; thuasalama ka kuih nynh nang kha ae rawse lan khyh.

¹⁴Israel siapharan nynh hum kha mou rawse zah a pounua? Hummou na deehui? Ui chihpaw tou? Uili tou?

¹⁵Tukeiccuze BAWIPAW tuh byapiatu thua sah lah, nang te kae laku kya byapae vae sah. Oun dopah sah lah, ka byathan hynh pankhaete na kyate yn luesah vae sah,” a cipya.

¹⁶Tuhcite David nynh Saul kha bya a hopah koute, Saul nynh, “Ka ccapaw David, tuh-e roi tuh namaw roi athua tou?” a cipya. Saul nynh a roisaw zah a rah.

¹⁷Aning nynh David kha, “Nang tuh kae laeze na dinghua; pawccecize kae nynh athahpaw te kae liaru zemah nang nynh tuh ahoypaw te nae liaru.

¹⁸BAWIPAW nynh kae hynh na kuih lungkhu yn nung ccyh lyaze kae hynh nae chia khyh keiccuze, ka tungvaw ahoy lante nae ccuepenawpaw kha atunin nae langsahpya vae.

¹⁹Ccungccaw nynh a rhaw kha a muih ze khyndadyh lante a cciasah cih zawtou? Tukeiccuze atunin ka tungvaw na cyipaw hanlan hynh BAWIPAW nynh hoynaw khate ae sangru vae sah.

²⁰Atu tuh nang tuh siapharan lang na tang ccaccing cih zah, Israel peenaw tuh na kuih kya atyn cih cipaw ka ny.

²¹Tukeiccuze nang nynh ka ciihan hae kha na chia khyh nawlan hae te ka paaw puizia hae kyate ka min hynh na la the khyh nawlan BAWIPAW min te bya yn kinpakuh,” a cipya.

²²Tukeiccuze David nynh tuh-e tuh Saul kyakhe bya a kinpyaku. Te Saul tuh a inn lang a ki, thuasalama David te a ccungccaw hae tuh akhynnaw hmin langkhe a cceih hae.