Read Zou PIENCILNA 1 Bible Online

PIENCILNA 1 - Zou bible

PIENCILNA 1

¹A kipat cilin Pasien in vantung le leitung a siem[1] hi,

²leitung in limlemel nei loin a hawmpi ahi a, tuaci’n khuomiel in tuipi thuh tung teng khucipin tui tungah Pasien’ Hlagau[2] a gamta hi.

³Tua ciengin Pasien in, “Khuovah om heh,” ci hi; tuale khuovah om pai hi.

⁴Pasien in tua khuovah hoi a sa hi; tuale Pasien in khuovah le khuomiel a khenkhie hi.

⁵Pasien in tua khuovah “Sun” ci a, khuomiel “Zan” ci hi. Tuale nitah le zingmawng om a, a ni khatna ahi hi.

⁶Pasien in, “Tui le tui kikalah vanthamzawl khat om hinlen tui le tui khen heh,” a ci hi.

⁷Tuaci’n Pasien in vanthamzawl bawlin vanthamzawl tunga tuite le vanthamzawl nei-a tuite a khenkhie hi. Tua ma bangin a om pai hi.

⁸Pasien in vanthamzawl pen “Van” ci hi. Tuale nitah le zingmawng om a, a ni nina ahi hi.

⁹Pasien in, “Van nei-a om tuite mun khatah kikhawm hinlen, leigaw kidawh heh,” a ci hi. A ci bangin a pieng pai hi.

¹⁰Pasien in leigaw pen “Lei” ci a, tui kikhawmtuote pen “Tuipi” ci hi. Pasien in tua khu hoi a sa hi.

¹¹Tua ciengin Pasien in, “Leitang in singkung lopate posah hinlen, a tang nei singkungte, a ga sunga a tang om singga kungte, amau’ nam cietin leitungah po heh,” a ci hi. Tua ma bangin a pieng pai hi.

¹²Leitang in singkung lopate amau’ nam ciet tawh kizui-in, khaici a nei lopate le amau’ nam ciet tawh kizui-in a sunga tang a nei a ga singkungte piengsah hi. Tua khu Pasien in hoi a sa hi.

¹³Tuale nitah le zingmawng om a, a ni thumna ahi hi.

¹⁴Pasien in, “Sun le zan a khen dingin vanthamzawl ah khuovahte om heh; tuate khu khuohunte, nite le kumte ciemte nading hi hinlen,

¹⁵leitung a tanvah dingin vanthamzawl ah khuovah hi uheh,” a ci hi. A ci bangin a om pai hi.

¹⁶Pasien in khuovah gol ni bawl a, khuovah a golzaw pen sun a uh ding, khuovah a neuzaw pen zan a uh dingin bawl a, aasite zong a bawl hi.

¹⁷Leitung a tanvah ding,

¹⁸sun le zan tunga thunei ding, le khuovah le khuomiel a khen dingin Pasien in vanthamzawl ah tuate a koi hi. Pasien in tua khu hoi a sa hi.

¹⁹Tua ciengin nitah le zingmawng om a, a ni lina ahi hi.

²⁰Tuale Pasien in, “Tuite in hinna nei ganhing honpite piengsah hinlen, leitung vanthamzawl ah vate leng uheh,” a ci hi.

²¹Tuaci’n Pasien in tuipi ganhing golpite le hinna a nei a pia thei ganhing namcin le a leng thei va namcin amau’ namcietin a piengsah hi. Tua khu Pasien in hoi a sa hi.

²²Pasien in amate thupha pie a, “Cipha-in pungin tuipi sung dim unlen, leitungah vate pung uheh,” a ci hi.

²³Tuale nitah le zingmawng om a, a ni ngana ahi hi.

²⁴Pasien in, “Leitung in amau’ nam cietin hinna nei ganhingte piengsah heh. Amau’ nam cietin innsate, a bawhva ganhingte le gamsate pieng uheh,” a ci hi. Tua ma bangin pieng pai hi.

²⁵Pasien in gamsa, innsa le a bawhva ganhing zosie amau’ nam cietin a piengsah a, tua khu Pasien in hoi a sa hi.

²⁶Tua ciengin Pasien in, “Eima’ lim, eima’ mel sunin mihing[3] siem vai; amate in tuipi sunga ngate, vantunga vate, innsa, gamsa zosie, le leitunga[4] a bawhvate zosie tungah thu neisah vai,” ci hi.

²⁷Tuaci’n Pasien in ama’ lim sunin mihing[5] siem a, ama in Pasien’ lim bangin amate[6] a siem hi. Ama in pasal le numei a siem hi.

²⁸Pasien in ama gel thupha pie a, Pasien in ama gel kungah, “Cipha-in pung unlen leitung luodimin zo un; tuipi sunga ngate, vana leng vate, le leitunga gamta hinna nei zosie tungah thu nei un,” a ci hi.

²⁹Pasien in, “En un, na tung vuah leitung maitang cin tenga om, a tang nei kungno zosie le a ga sunga a tang nei singkung zosie kang pie zo hi; note in an-in tuate na nei ding uhi.

³⁰Tuale leitung ganhing zosie, vana va zosie, leitunga a bawhva zosie, hinna hu a nei zosiete tungah an dingin kunghing zosie kang pie zo hi,” a ci hi. Tua ma bangin a pieng pai hi.

³¹Pasien in a siemsa na vannuoi en a, hoi a sa mama hi. Tuale nitah le zingmawng om a, a ni guhna ahi hi.