Read Zou PIENCILNA 11 Bible Online

PIENCILNA 11 - Zou bible

PIENCILNA 11

¹Amasa-in leitung buppi in kamham khat le kamteng kibang a nei uhi.

²Nisuona lam panin a na lal vua,[32] Shinar gam sungah zanglei mun khat mu-in tua mun ah na teng uhi.

³Amate khatlekhat kiho-in, “Hing pei un, tehlei khengin halgaw vai,” kici uhi. Amate in suong tangin tehlei a zang vua, a tuhkip nadingin suongmeihol nai zang uhi.

⁴Tua ciengin amate in, “Hing pei un, eimahaw adingin khuopi khat le a khumvum in vantungte dong a ban ding tausangpi khat lam vai-in, i min than nadingin bawl vai; tua banga i bawl sih leh leitung buppi-ah i kithethang ta ding uhi,” a kici uhi.

⁵Mihingte’ lamsa khuopi le tausang en dingin TOPA a kumsuh hi.

⁶TOPA in, “En un, amate minam khat ahi vua, amate zosie in kamham khat a nei uhi; tam pen a sep ding uh a kipatna ahi nabo hi; amate adingin sep dinga a gelte uh bangma a pieng thei nawn sih ding hi.

⁷Hing pei un, kuonsuh vai-in khatlekhat a thugen uh a kithei lo nadingin khum munah a kamham uh va sawpawi ta vai,” a ci hi.

⁸Tuaci’n TOPA in leitung muncin tengah amate thezah sieng a, a khuopi bawl uh a khawl ta uhi.

⁹Tua ahi ziehin tam khuopi pen Babel kici hi. Azieh pen TOPA in khum munah leitung mi zosie’ kamham a sawpawipieh[33] hi; khum mun panin TOPA in leitung muncin tengah amate a thezah hi.

¹⁰Tam teng pen Shem’ suonlehlahte ahi uhi. Shem kum zakhat a cin, tuizin tun zaw kum ni ciengin ama in Arpachshad kici tapa khat a nei hi;

¹¹Arpachshad pien nua-in Shem kum zakhat pha ta a, tapate le tanu dangte zong nei hi.

¹²Arpachshad kum sawmthum le kum nga a phah zaw-in, Shelah kici tapa khat nei hi;

¹³Shelah pien nua-in Arpachshad kum zali le kum thum dam lai a, tanute le tapa dangte zong nei hi.

¹⁴Shelah kum sawmthum a phah zaw-in, Eber kici tapa khat nei hi;

¹⁵Eber pien nua-in Shelah kum zali le kum sawmthum dam lai a, tanute le tapa dangte zong nei hi.

¹⁶Eber kum sawmthum le kum li a phah zaw-in, Peleg kici tapa khat nei hi;

¹⁷Peleg pien nua-in Eber kum zali le kum sawmthum dam lai a, tanute le tapa dangte zong nei hi.

¹⁸Peleg kum sawmthum a phah zaw-in, Reu kici tapa khat nei hi;

¹⁹Reu pien nua-in Peleg kum zani le kum kuo dam lai a, tanute le tapate zong nei hi.

²⁰Reu kum sawmthum le ni a phah zaw-in, Serug kici tapa khat nei hi;

²¹Serug pien nua-in Reu kum zani le kum sagi dam lai a, tanute le tapa dangte zong nei hi.

²²Serug kum sawmthum a phah zaw-in Nahor kici tapa khat nei hi;

²³Nahor pien nua-in Serug kum zani dam lai a, tanute le tapa dangte zong nei hi.

²⁴Nahor kum sawm ni le kum kuo a phah zaw-in Terah kici tapa khat nei hi;

²⁵Terah pien nua-in Nahor kum za le sawm le kuo dam lai a, tanute le tapa dangte zong nei hi.

²⁶Terah kum sawm sagi a phah zaw-in Abram, Nahor, le Haran te nei hi.

²⁷Tu-in Terah’ suonlehlahte tam teng ahi hi. Terah in Abram, Nahor le Haran nei a, Haran in Lot nei hi.

²⁸Haran pen a pienna Chaldea gam Ur khuo-ah a pa Tera a si masangin a si hi.

²⁹Abram le Nahor in zi nei uhi; Abram’ zi min pen Sarai hi a, Nahor’ zi min pen Haran’ tanu Milcah ahi hi. Milcah le Iscah’ pa pen Haran ahi hi.

³⁰Tu-in Sarai ciing a, ta a nei thei sih hi.

³¹Terah in a tapa Abram le Haran’ tapa, a tupa ahi Lot, le a tapa Abram’ zi ahi a monu Sarai zawpi a, Canaan gam lam zuonin Chaldea gam Ur khuo panin a peiton uhi. Ahi vangin Haran a tun ciengun khum munah a teng uhi.

³²Terah’ khan sung kum zani le kum nga hi a, Haran-ah ama a si hi.