Read Zou PIENCILNA 12 Bible Online

PIENCILNA 12 - Zou bible

PIENCILNA 12

¹TOPA in Abram kungah, “Na gam, na be na phung le na pa’ inn nuasie inlen, kang lah ding gamah pei in.

²Minam lien khatin kang bawl ding a, thupha hing pie-in, na min ka liensah ding a, tuaci’n midangte adingin thupha na hi ding hi.

³Nang thupha ang piete thupha pie-in, nang ang samsiete ka samsie ding hi; nang tungtawnin leitung minam zosie in thupha a ngalaw ding uhi,” a ci hi. [34]

⁴Tuaci’n TOPA gensa bangin Abram pei a, Lot in zong a zui hi. Haran pan a peikhietin Abram kum sawm sagi le nga a pha hi.

⁵Abram in a zi Sarai, le a sangampa’ tapa Lot, a kholsa a nei a lam teng, le Haran-a a sila nei teng zawpi-in, Canaan gam lam a zotpi hi. Canaan gam a tun ciengun,

⁶Abram in tua gam nawhin Shechem mun, Moreh gangpi sing[35] lahah a tung hi.

⁷Tua ciengin Abram tungah TOPA kilang a, tuale ama kungah, “Na suonlehlahte[36] tungah tam gam ka pie ding hi,” a ci hi. Tua ahi ziehin ama in a kunga a kilang TOPA adingin maitam khat a lam hi.

⁸Tua mun panin Bethel nisuona lam muol tungah kituon a, nitumna lam Bethel, nisuona lam Ai khuo kikalah a puonbuh a sung hi. Khum munah TOPA adingin maitam khat a lam a, ama in TOPA’ min loin thu a ngen hi.

⁹Negeb gam lam zuonin khuolzin kia dingin Abram kipan a, tua mun a tun dongin a banbanin a pei hi.

¹⁰Khum hun lai-in Canaan gamah kielpi a tung hi. Tuaci’n kielpi a siet huoi ziehin Egypt gamah a pem dingin Abraham a peisuh hi.

¹¹Egypt gam a lut kuonin a zi Sarai kungah, “Nang pen numei melhoi khat na hi hi;

¹²Egypt-te in ang mu cieng ule amate in, ‘Tam nu ama’ zi ahi hi,’ ang ci ding uhi; tua bepin kei ei thatin nang ang hinkhawi ding uhi.

¹³Nang vang tawh kei ei kihinkhawi-in ei na kihoi bawl nadingin ka sangamnu-in hing kigen in,” a ci hi.

¹⁴Egypt gamah Abram a tun bepin Egypt-te in a zi a et ule melhoi a sa mama uhi.

¹⁵Tuale Pharaoh’ vaisaite in ama nu a mu ciengun, Pharaoh mai-ah a phat uhi. Amate in Pharaoh’ inn sungah tua numei a peipi uhi.

¹⁶Tua nu ziehin kumpipa in Abram a limbawl hi; tuaci’n ama in tuute, bawngtangte, laatangte, numei le pasal silate, laanute, le kalaoh-te a pie hi.

¹⁷Ahi vangin TOPA in Abram’ zi Sarai ziehin Pharaoh le a innkuonpite tungah gimna lienpi a tungsah hi.

¹⁸Tuaci’n Pharaoh in Abram hlanin ama kungah, “Kei bang nei law ahiei? Ama na zi ahi lam bang dinga nei gen lo ahiei?

¹⁹Bang dinga ama, ‘Ka sanggam nu hi,’ na ci-a ka zi dinga nei lahsah ahiei? Tu-in na zi tanah om hi. Ama zawpi inlen pei in,” a ci hi.

²⁰Ama tawh kisai-in Pharaoh in a mite thupie a, amate in a zi le a neisa teng tawh lampi-ah a hla uhi.