Read Zou PIENCILNA 13 Bible Online

PIENCILNA 13 - Zou bible

PIENCILNA 13

¹Tuaci’n Abram in a zi, a neisa zosie, le Lot tawh, Egypt panin Negeb gam lam a zuonto hi.

²Tu-in Abram in ganhing, ngun, le kham a hau mama hi.

³Negeb gam panin Bethel le Ai khuo kikala a puonbuh a lamcilna mun le,

⁴a maitam bawl masahna mun dongah ama pei a, khum munah Abram in TOPA kungah thu a ngen hi.

⁵Abram tawh a zawhton ahi Lot in zong tuuhon, ganhon, le puonbuhte a hau ta a,

⁶tuaci’n a ni gela a tenton thei nadingin leitang in ama gel a va zo nawn sih hi; azieh pen ama gel’ neisa tam sengin a tengton thei ta sih gel hi,

⁷tuale Abram’ gancingte le Lot’ gancingte kikalah kihauna a om ta hi. Tua gamah khum hunin Canaan-te le Perez-te a teng uhi.

⁸Tua ciengin Abram in Lot kungah, “Kei le nang kikal, na gancingte le ka gancingte kikalah kihauna kici omsah sih vai; bangzieh ahei cile ei tegel pen sanggam khat i hibo hi.

⁹Na mai-ah gam buppi om hi lo amah? Keima kung panin kikhen khie ta’n. Nang veilama na pei leh, kei zietlamah ka pei ding hi; nang zietlama na pei leh kei veilamah ka pei ding hi,” a ci hi.

¹⁰Lot in a kim a pam en a, tuale Jordan zanglei mun zosie in tui limtahin nga-in TOPA’ um tawh hitale, Zoar lama Egypt leitang tawh hitale kibang hi, ci-in a mu hi. Tam pen TOPA in Sodom le Gomorrah a suhsiet masang ahi hi.

¹¹Tuaci’n Lot in ama adingin Jordan zanglei zosie teel a, nisuona lam zuonin Lot a zin hi. Ama gel tam bangin khatlekhat a kikhen uhi.

¹²Zanglei-a khuopite lahah Lot tengin Sodom dongah a puonbuhte khinin a om laitahin, Canaan gamah Abram a teng hi.

¹³Tua laitahin Sodom mite pen migilo ahi vua, TOPA tunga mawna lien bawlte ahi uhi.

¹⁴Lot tawh ama a kikhen zaw ciengin TOPA in Abram kungah, “Tu-in na opna panin leilu lam, leitaw lam, nisuona lam, le nitumna lam ento in;

¹⁵azieh pen na mu gam zosie nang le na suonlehlahte[37] kang pie peisuoh ding hi.

¹⁶Keima in na suonlehlahte, leitung leivui za-in tampi ka phasah ding hi; tuaci’n mi khat in leitunga leivui a sim thei leh na suonlehlahte zong kisim thei ding hi.

¹⁷Ding inlen, leitang a dung a vai kantanin pei in. Azieh pen nang tungah tua gam kang pie ding hi,” a ci hi.

¹⁸Tuaci’n a puonbuh tuo-in Abram pei a, Hebron gamsung, Mamre gangpi singte[38] lahah a teng hi; ama in khum munah TOPA adingin maitam khat a lam hi.