Read Zou PIENCILNA 19 Bible Online

PIENCILNA 19 - Zou bible

PIENCILNA 19

¹Nitah lamin Sodom ah vantungmi ni tung a, Sodom khuo kulkotpi ah Lot na to hi. Lot in tua gel a galmu bepin a dawn dingin ding a, a mai tuolah kunin,

²“Ka pute aw, hing thum ing. Na nasempa’ inn lamah hing kihei-in hing gieh ta unlen, na keng uzong sil un; tua ciengin zingmawng tungin thobai-in na maban uh na zom na ding uhi,” a ci hi. Ama gel in, “Hilo hi; ko pen khuolai tuol-awnga gieh ding ka hibo uhi,” a ci uhi.

³Ahi vangin ama in nahpi-in ama gel a hlo hi; tuaci’n ama kungah ama gel kihei-in a inn sungah a lut uhi; tuale ama gel adingin pawi khat a bawlpieh a, tol saw lo anlum emin a ne uhi.

⁴Ahi vangin a lup masangun tua khuosung mite, Sodom khuomite, a teh a khangin mi zosie in tua inn a imtawm uhi;

⁵amate in Lot a hlan vua, “Tuzan na kunga zin hing tungte hei-ah a om ta uh ahei? Amate ka luppi thei nadingun ka kung vuah hing peipi in,” a ci uhi.

⁶Lot zong kotkhah panin tua mite kungah pei-in a kot lekha a,

⁷“Ka sanggamte aw, hing thum ing. Tam bangin gitlo gamtat sih un.

⁸En un, pasal tawh lumton nai lo ta ngahnu ni ka nei hi; note kungah tua gel hing puoh vangin na nop bangbangun ama gel tungah kigamtat ta un; tam mite bangma law sih beh un, azieh pen ka innhlim bel a ang lut ahi bo uhi,” a ci hi.

⁹Ahi vangin amate in a dawngkia vua, “Nuakin vawi!” a ci uhi. Tuale amate in, “Tam mipa ta sungah pemta khat a ang tung hi lel bo a, thukhen dan a ang kinei viel amah! Tu-in amate sangin nang kang khelbawl zaw ding uhi,” a ci uhi. Tua ciengin Lot a phul tentun vua, kotkhah phukeh dingin a nai tehteh uhi.

¹⁰Ahi vangin inn sunga mite in a khut uh zahin inn sungah Lot kaiphitin amate tawh kot a kikhalu uhi.

¹¹Tuale inn kotkhah-a om pasalte, a gol a neu-in kotkhah a mu lo nadingun amate in a mit uh a tawsah hi.

¹²Tua zaw ciengin mite in Lot kungah, “Tam sungah adang koi a om lai ei? Mahte, tapate, tanute ahi sihle tam khuopi sungah mi khatpo na nei leh tam panin pusuopi in.

¹³Bangzieh ahei cile TOPA mai-ah a mite kimawsahna awging lien luo mama a, a susie dingin TOPA in kote ei sawl zo ahi ziehin tam mun a susie ding ka hi ta uhi,” a ci uhi.

¹⁴Tuaci’n Lot pei-in a tanute a kinunpi ding amah dingte kungah, “Ding unlen, tam mun panin peidawh ta un; azieh pen TOPA in tam khuopi a suhsiet ding ahi ta hi,” a ci hi. Hinanle amahte adingin ama pen a ciemmui tawh a kibang lel hi.

¹⁵Zingmawng phalvah ciengin vantung mite in, “Tho inlen, tam sunga a om na zi le na tanu nite la in. Tua ahi sihle khuopi danpiehna sungah no zong na sigam ding uhi,” ci-in Lot kungah genin a pausawl uhi.

¹⁶Ahi vangin ama a onton lai hi; tuaci’n TOPA in ama a hepi ziehin vantung mite in ama, a zi le a tanu nite a bantang ah kai-in a pusuopi vua, khuopi pulamah a nuasie uhi.

¹⁷Amate in[61] pulam a tut zaw ciengun, “Na hinna uh taipi un; kinua hei sih unlen, zanglei mun khatpo ah zong khawl vawt loin muol tungah kitai pai un, ahi sihle na sigam sieng ding uhi,” a ci hi.

¹⁸Lot in amate kungah, “Hilo hi, ka pute aw;

¹⁹en un, na mitmu-un na nasempa in maipha ka nga zo a, ka hinna nei hutdam nadingun kei tungah migitna lienpi nei lah zo ta uhi; ahi vangin muol tungah ka taizo sih a, gimna in ei nua phahin si ding ka zau hi.

²⁰En un, tai nading khopin khum khuopi a nai a, khuopi neu khat ahi hi. Khum tahah ei taisah un; khuopi neu khat hi lel lo amah? Tua hile suohta bep vang!” a ci hi.

²¹Ama in tua pa kungah, “Hoi mama hi, tam maipha zong nang kang pie a, na khuopi gen pen ka lumlet sih ding hi.

²²Kinaw inlen khum munah tai in. Azieh pen khumtah na tun masangsie ken bangma ka bawl thei sih hi,” a ci hi. Tua ahi ziehin khum khuopi pen Zoar[62] kici hi.

²³Zoar-ah Lot a tun ciengin leitungah ni suoh zo hi.

²⁴Tua ciengin van panin TOPA in Sodom le Gomorrah khuopite tungah kaat le meikuong a zusah hi;

²⁵ama in khuopite, zanglei zosie, khuopi sunga a teng mi zosie le leitunga po bangkim a lumlet hi.

²⁶Ahi vangin a nua-a om Lot’ zi a kinua hei le cikhuom a suoh hi.

²⁷TOPA mai a dinnasa munah zingmawng tungin Abraham a pei hi;

²⁸ama in Sodom, Gomorrah le zanglei muncin teng a ensuh leh meikhuh pana a khu bangin leitang pan meikhu kitung valuh pi a mu hi.

²⁹Pasien in zanglei tunga om khuopite a suhsiet ciengin Abraham a phawh a, Lot’ tenna khuopite a lumlet ciengin tua a lumletna panin Lot a peikhiesah hi.

³⁰Zoar ah a ten ngam lo ziehin Zoar panin Lot peito-in a tanu nite tawh muol tungah a teng hi, azieh pen Zoar ah ama teng ngam lo hi; tuaci’n suonghawm sung khatah a tanu nite tawh a teng uhi.

³¹A tanu tapen in a naunu kungah, “I pa lah vuoi ta a, tuale leitung ngaina banga i kiluppi ding pasal khat zong leitungah a om sih hi.

³²Hing pei in, i pa lenggazu tekham vai, i pa tungtawnin suonlehlah i kepcing thei nadingin ama tawh lumton vai,” a ci hi.

³³Tuaci’n ama gel in khum zanin a pa uh lenggazu a tekham uhi; tuale a unu pei-in a pa tawh a lumton hi. A pa in a tanu a lup lam le a thawkia lam a thei sih hi.

³⁴A zing ni-in a unu in a naunu kungah, “En in, zani zanin i pa tawh ka lumton hi; tu zanin zong ama zu tekham vai. Tua ciengin i pa tungtawnin suonlehlahte i kepcing nadingin va pei inlen, ama tawh va lumton ta’n,” a ci hi.

³⁵Tuaci’n khum zanin zong a pa uh zu a tekham uhi; tuale a naunu pei-in ama tawh a lumton hi; a pa in a tanu a lup lam le a thawkia lam a thei sih hi.

³⁶Tua bang danin a tanu tegel a nipi-un a pa utawh a kigai uhi.

³⁷A unu in tapa khat nei a, a min Moab phuo hi; ama pen tuhun Moab-te’ pienna pa ahi hi.

³⁸A nau in zong tapa khat nei a, a min Benammi ahisah hi; ama pen tuhun Ammon-te’ pienna pa ahi hi.