Read Zou PIENCILNA 20 Bible Online

PIENCILNA 20 - Zou bible

PIENCILNA 20

¹Khum tah panin Negeb gam lamah Abraham khuol a zin a, Kadesh le Shur kikal Gerar ah a teng hi. Gerar ah pemta bangin a ten laitahin,

²Abraham in a zi Sarah pen, “Ka sanggamnu hi,” a ci le Gerar’ Kumpipa Abimelech in zong mi sawlin Sarah a lasah hi.

³Ahi vangin zan khat Abimelech’ mangah Pasien pei-in a kungah, “Zi dinga na lah numei ziehin a si ding na hi hi; azieh pen ama pasal neisa ahi bo hi,” a ci hi.

⁴Tua hunin Abimelech in tua nu kung neh nai lo hi; tuaci’n ama in, “TOPA, mawpeng minam khat a susie ding na hi amah?

⁵Amama in keima kungah, ‘Ama ka sanggamnu hi,’ ei ci hi lo amah? Tuale amama in zong, “Ama ka sanggampa hi,” ei ci hi. Tua ahi ziehin lungsim siengtho le khut siengtho tawh tam banga gamta ka hi bo hi,” a ci hi.

⁶Tua ciengin a mang sungah Pasien in, “A hi hi, lungsim siengtho tawh na bawl ahi lam ka thei hi; tua banah kei tungah nang maw lo nadinga nang ang kempa khu keima ka hi hi. Tua zieha ama kang khoisah lo ahi hi.

⁷Tua ahi ciengin tu-in tua mipa’ zi piekia in; azieh pen ama kamsang khat hi a, ama in nang thu ang ngetpieh ding a, tuaci’n nang na hing ding hi. Ahi vangin ama na piehkia sih leh nangma le na mite na unpi-un pel loin na si ding lam uh thei in,” a ci hi.

⁸Tuaci’n zingmawngin Abimelech a tho bai a, ama in a nasemte zosie hlanin tam thu teng a unpi-in a kung vuah a gen hi; tuale mite a zau mama uhi.

⁹Tua ciengin Abimelech in Abraham hlanin ama kungah, “Ko tungah bang hing bawl na hiei? Kei tung le ka kumpi gam tungah tam bang khielna lienpi nang tunsah nadingin nang tungah ken bangza-in mawna bawl ka hei? Keima tungah nang bawl dinga a kilawm lo nate nang bawlzo hi,” a ci hi.

¹⁰Abimelech in Abraham kungah, “Bang ngaisun a, tam na bawl ahiei?” a ci hi.

¹¹Abraham in, “Tam munah Pasien zatahna a om vawt sih ding a, ka zinu ziehin ei that ding uhi, ci-a ka ngaisut zieha tam ka bawl ahi hi.

¹²Tua banah ama ka sanggamnu tahtah ahi a, ka pa’ tanu hi-in, ahi vangin ka nu’ tanu ahi sih hi; tuale ama keima’ zi ang suoh hi.

¹³Pasien in ka pa’ inn panin ei pusuohsah ciengin keima in ama kungah, ‘Ka tunga nang bawl lo a phamaw na migitna tam ahi hi: I peina mun zosie-ah ama ka sanggampa ahi hi, ei ci’n,’ ka ci hi,” ci hi.

¹⁴Tua ciengin Abimelech in tuu le bawngtangte, sila numei le sila pasalte la-in Abraham a pie a, ama kungah a zi Sarah zong a piekia hi.

¹⁵Abimelech in, “Na mai-ah ka leitang a om hi; na nopna mun popo-ah teng in,” a ci hi.

¹⁶Ama in Sarah kungah, “En in, na sanggampa ngun tang tulkhat ka pie zo hi; tami khu na oppi mi zosie mai-ah na maw nei lo lam kipulahna ahi hi; na maw lo lam kilang kilkel hi,” a ci hi.

¹⁷Tua ciengin Abraham in Pasien kungah thu ngen hi; tuale Pasien in Abimelech damsah a, ama gel in ta a nei thei nadingin a zi le a sila numeite zong a damsah hi.

¹⁸Bangzieh ahei cile TOPA in Abraham’ zi Sarah ziehin Abimelech innkuon’ naubute zosie a khacip pieh hi.