Read Zou PIENCILNA 21 Bible Online

PIENCILNA 21 - Zou bible

PIENCILNA 21

¹TOPA in a gensa bangin Sarah tungah bawl a, TOPA in a khapsa bangin Sarah adingin a bawl hi.

²Sarah gai a, Pasien in ama kunga a gensa hun a vuoi zaw-in Abraham in tapa khat nei hi.

³Abraham in Sarah tawh a nei a tapa’ min Isaac a phuo hi.

⁴Pasien in ama a thupiehsa bangin ni giet a phah ciengin Abraham in a tapa Isaac a tep a tanpieh hi.

⁵A tapa Isaac a suo hunin Abraham kum zakhat a pha hi.

⁶Tu-in Sarah in, “Pasien in kei adingin nuizat nading ei bawlpieh zo hi. A za tapo in ei nuipi ding uhi,” a ci hi.

⁷Ama in, “Sarah in nau nawi pie ding hi, ci-in Abraham kungah koi in gen ngai poma ding ahei? Hizongnanle a vuoi a teh zaw-in ama tawh tapa khat ka nei hi,” a ci hi.

⁸Tua naupang khangin nawi a tang hi; Isaac in nawi a tan ni-in Abraham in pawi thupi khat a bawl hi.

⁹Ahi vangin Abraham tawh a nei Egypt mi Hagar’ tapa in a tapa Isaac[63] a ciemmui bawlna Sarah in a mu hi.

¹⁰Tuaci’n ama in Abraham kungah, “A tapa tawh tami sila numei nu notmang dawh ta’n; bangzieh ahei cile tami numei’ tapa in ka tapa Isaac tawh gou luoton lo ding hi,” a ci hi.

¹¹Ama’ tapa zieha a pieng thu in Abraham lunggimsah mama hi.

¹²Ahi vangin Pasien in Abraham kungah, “Naupang le na sila numei ziehin lunggim sin; Sarah in na kunga ang gen popo a gen bangin bawl lel in, azieh pen Isaac tungtawnin nang adingin na suonlehlahte kisim ding hi.

¹³Tua sila numei’ tapa zong na cihlah ma ahi ziehin minam khatin ka bawl ding hi,” a ci hi.

¹⁴Tuaci’n zingmawngin Abraham a thobai a, an le savun tuithawl la-in Hagar a pie a, a liengko ah khaipiehin naupang tawh a sawlmang dawh ta hi. Tua nu pei-in Beer-sheba senel gamah a vah kawikawi hi.

¹⁵Savun thawl sunga tui a tawp ciengin ama in sawlbawh nei khatah tua naupang a sep dawh hi.

¹⁶Tua ciengin ama nu pei-in thalkap khat tan a gamlatna munah a tapa elngatin a to hi; azieh pen ama in, “Tua naupang’ si ei ensah sih un,” a ci hi. Naupang elngatin ama a to laitahin a aw neiza tawh awngin a kap vapo hi.

¹⁷Tua ciengin Pasien in naupang pa’ kaa a za hi. Van panin Pasien’ vantungmi in Hagar hlanin a kungah, “Hagar aw, bang in nang hing lungkhamsah ahei? Zau malmal sin; bangzieh ahei cile Pasien in naupang opna munah a kaana awging a za zo hi.

¹⁸Hing pei in, tua naupang phong inlen, na khut tawh tupom in, bangzieh ahei cile ama minam lien khat ka suohsah ding hi,” a ci hi.

¹⁹Tua ciengin Pasien in tua nu’ mit a honpieh a, tuikhuh khat a mu hi. Ama pei-in savun thawl-ah tui a dim a, naupang pa dawn dingin a pie hi.

²⁰Pasien in tua naupang ompi a, ama a khanglien hi; ama gamlahah teng a, thalkap siem khat a suoh hi.

²¹Paran gamlahah ama a teng hi; tuale a nu in ama adingin Egypt panin zi khat a lahpieh hi.

²²Khum hun laitahin Abimelech le a galkapmangpa Phicol in Abraham kungah, “Na sepna zosie-ah Pasien in nang ang ompi hi;

²³tua ahi ziehin tu-in nang in kei, ka suonlehlahte le ka neisa zosie tungah a man lopi-in ei bawl loin, na tungah thuman tawh kang gamtat bangin kei tung le pemta banga na tenna leitang tungah nang gamtat nadingin Pasien tawh ka kungah hing kiciem in,” a ci hi.

²⁴Tuale Abraham in, “Ka kiciem hi,” a ci hi.

²⁵Abimelech’ nasemte in a na lahpiehsa uh ahi tuikhuh tawh kisai-in Abraham in a lungkim lona teng Abimelech kungah a gen ciengin,

²⁶Abimelech in, “Tam koi pen bawl ci ka thei sih hi; nang in lah ka kungah nang gen sih a, tuni dongin tam thu ka za sih hi,” a ci hi.

²⁷Tuaci’n Abraham in tuute le bawngtangte la-in tuate Abimelech a pie a, ama gel in thuciemna khat a bawl uhi.

²⁸Abraham in tuuhon lah panin tuuno anu sagi a tuom koi hi.

²⁹Tuale Abimelech in Abraham kungah, “Tami na tuomkoi tuuno anu sagite, bang na cinopna ahiei?” a ci hi.

³⁰Ama in, “Tami tuikhuh pen keima tawsa ahina ka teci dingin tami tuuno anu sagite ka khut sung panin na sang ding hi,” a ci hi.

³¹Tua ziehin tua mun Beer-sheba[64] kici hi; azieh pen tua munah ama gel a nipi-un a kiciem uhi.

³²Beer-sheba ah thuciemna khat a bawl zaw ciengun a galkapmangpa Phicol tawh Philistia-te’ gamah Abimelech a kinuale hi.

³³Abraham[65] in Beer-sheba ah makeng kung khat suon a, khum munah Tawntung Pasien[66] TOPA’ min tawh thu a ngen hi.

³⁴Philistia-te’ gamah Abraham, pemta bangin sawt veipi a teng hi.