Read Zou PIENCILNA 22 Bible Online

PIENCILNA 22 - Zou bible

PIENCILNA 22

¹Tam thu teng zaw ciengin Pasien in Abraham a zelah hi. Ama in a kungah, “Abraham!” a ci hi. Tuale ama in, “Tanah om ing,” a ci hi.

²Ama in, “Na it na tapa, na tapa neisun Isaac zawpi inlen Moriah gamah pei in. Khum muna nang kunga kang lah ding muoltung khatah meihal biehna-in ama ei pie in,” a ci hi.

³Tuaci’n zingmawngin Abraham thobai a, a laa phaw guongin a nasem tangval ni tawh a tapa Isaac a peipi hi; ama in meihal biehna-a zah dingin sing a tom a, ama dingkhie-in Pasien in ama a lahsa mun gamlatna dongah a pei hi.

⁴A ni thum ni-in Abraham a khuodah leh a gamlapi panin khum mun a galmu hi.

⁵Tua ciengin Abraham in a tangvalte kungah, “Laa tawh tanah na om un; naupangpa le kei khumnah ka va pei ding uhi; ko gel in Pasien ka va bie ta ding vua, tua ciengin na kung vuah kang peikia ding uhi,” a ci hi.

⁶Abraham in meihal biehna sing la-in Isaac puosah a, ama in mei le nam a puo hi. Tuaci’n ama gel a zawhton uhi.

⁷Isaac in a pa Abraham kungah, “Pa aw!” a ci hi. Tuale ama in, “Tanah om ing, ka ta aw,” a ci hi. Ama in, “Tanah mei le sing om napi meihal biehna ding tuuno hei sunga om ahiei?” a ci hi.

⁸Abraham in, “Pasien in meihal biehpiehna dingin tuuno ei pie ding hi, ka ta aw,” a ci hi. Tuaci’n ama gel a peiton uhi.

⁹Pasien’ lahsa munah a tun ciengun Abraham in tua munah maitam khat lamin sing a cieng hi. Ama in a tapa Isaac lep-ia in, maitam tunga singvum tungah a siel hi.

¹⁰Tua ciengin Abraham in a khut zahin a tapa that[67] dingin naam a la hi.

¹¹Ahi vangin TOPA’ vantungmi in vantung panin ama hlan a, “Abraham, Abraham!” a ci hi. Tuale ama in, “Tanah om ing,” a ci hi.

¹²Ama in, “Naupangpa tungah na khut nga sin. Ama bangma law sin. Azieh pen tu-in Pasien na giin lamtah ka thei ta hi, bangzieh ahei cile na tapa, na tapa khat na neisun kei adingin na it lo lam ka thei hi,” a ci hi.

¹³Abraham a khuodah leh hamphul lahah a ki-a awh tuutang khat a nua-ah na om hi. Abraham pei-in tua tuu man a, a tapa tangin meihal biehna-in a pie hi.

¹⁴Tuaci’n Abraham in tua mun pen “TOPA in ei sih hi,”[68] ci-in min vaw a, tuni dongin, “TOPA’ muol tungah ei kisih ding hi,” kici hi.[69]

¹⁵Van panin TOPA’ vantungmi in Abraham a ni veina hlan a,

¹⁶“Nang in tam thu na bawl zo a, na tapa neisun it lo na hi ziehin, “Kei mama kang kiciem hi,” TOPA in ci hi.

¹⁷“Nang thupha kang pie tahpi ding a, na suonlehlahte vana aasite le tuipi gei-a senel bangin tampi ka phasah ding hi. Nangma’ suonlehlahte in a galte uh’ tunkot a luo ding vua,

¹⁸ka thu na ngai ziehin na suon na hlahte ziehin leitung minam zosie in thupha a ngalaw ding uhi.

¹⁹Tua ciengin tangvalte kungah Abraham kinuale-in Beer-sheba ah a peiton uhi; tuale Beer-sheba ah Abraham a teng hi.

²⁰Tam teng zaw ciengin Abraham kungah, “En in, Milcah in zong na sanggamnu Nahor tawh tate nei hi:

²¹Uz a tapen, Buz a nau, Aram’ pa Kemuel,

²²Chesed, Hazo, Pildash, Jidlaph, le Bethuel-te ahi uhi,” ci-in kigen hi.

²³Bethuel pen Rebekah’ pa ahi hi. Milcah in Abraham’ sanggamnu Nahor tawh tapa giet nei hi.

²⁴Tua tham loin a meinu Reumah in Tebah, Gaham, Tahash, le Maacah-te a nei hi.