Read Zou PIENCILNA 23 Bible Online

PIENCILNA 23 - Zou bible

PIENCILNA 23

¹Sarah kum za le sawmni le sagi sung a nungta hi; tam pen Sarah’ khankum ahi hi.

²Sarah pen Canaan leitang Kiriath-arba (tua pen Hebron) munah a si hi. Sarah ziehin Abraham da-in a kap hi

³A misi kung panin Abraham dingdawhin Hit-te kungah,

⁴“Kei pen note lahah ang teng khuolmi le pemta ka hi bo hi; ka muna panin ka misi ka vui thei nadingin a han ding mun khat ei pie un,” a ci hi.

⁵Hit-te in Abraham kungah,

⁶“Ka pu aw, ko thu ei ngai in; kote lahah nang a thahat ulien na hi hi. Ka hante uh na deina penpen-ah na misi vui lel in; na misi vui nading han koima’n ang hlaw vawt sih ding hi,” a ci uhi.

⁷Abraham dingin tua gammi ahi Hit-te lamah a kun hi.

⁸Ama in a kung vuah, “Ka muna panin ka misi vui ding nei phal uleh ka thugen ei ngai unlen, Zohar’ tapa Ephron kungah

⁹ama’ neisa Machpelah leihawm ka tanh dinga ei pieh nadingin ei ngetpieh un; tua khu ama’ logei-a om ahi hi. Misi vui nading muna ka nei dingin a man ding cingtaha ka pieh dingin ama in na muna vuah kei tungah ei piesah un,” a ci hi.

¹⁰Tua laitahin Hit-te lahah Ephron a to hi. Hit mi Ephron in khuopi tunkota ang lut Hit-te zosie’ zah dingin Abraham dawng a,

¹¹“Hi lo hi, ka pu aw, na ngai in; ka lo nang kang pie a, tua sunga om ka leihawm zong nang kang pie hi; ka mipite mai-ah nang kang pie hi; na misi vui lel in,” a ci hi.

¹²Tua ciengin tua gam mite’ mai-ah Abraham a kunsuh hi.

¹³Ama in tua gam mite’ zahin Ephron kungah, “Pha na saha ahile ka thugen ngai in! Lo man kang pie ding hi; khum sungah ka misi ka vui thei nadingin kei tung panin a man sang in,” a ci hi.

¹⁴Ephron in Abraham a dawngkia a,

¹⁵“Ka pu aw, ka thugen ngai in; leitang beh khat in ngun shekel zali man hi. Nang le kei kikalah tua pen bang hi lel ahei? Na misi kivui lel in,” a ci hi.

¹⁶Ephron tawh Abraham a thukim uhi; tuale Abraham in Ephron adingin Hit-te’ zaha a gensa, tua hun laitaha sumbawlte tena tawh kituohin ngun shekel zali a te hi.

¹⁷Tuaci’n Mamre nisuona lam Machpelah-a om Ephron’ lo, a sunga om a lo le leihawm tawh, tua mun zosie-a om lo sunga singkung zosie, le lo gam kimvela a po singkung zosie tawh,

¹⁸Hit-te mai le a khuopi tunkota ang lut mi zosie’ mai-ah a tanh dingin Abraham tungah kipie hi.

¹⁹Tam zaw ciengin Canaan gama om Mamre (tua pen Hebron) lam a kinga ahi Machpelah lolai-a leihawm sungah Abraham in a zi Sarah a vui hi.

²⁰Lo le a sunga leihawm pen Hit-te tung panin si vuina zah dingin Abraham tungah kipie hi.