Read Zou PIENCILNA 24 Bible Online

PIENCILNA 24 - Zou bible

PIENCILNA 24

¹Tu-in Abraham vuoi-in a kum a tam mama ta hi; tuale TOPA in sil bangkimah Abraham thupha a pie hi.

²Abraham in a neisa zosie tunga vaihawm, a inn sunga a tapen a nasempa kungah, “Ka phei kawmah na khut hing koi in.

³Van le lei Pasien, TOPA tawh kang kiciemsah ding a, ka tenpi Canaan-te’ tanute lahah ka tapa’ zi ding na la sih ding a,

⁴ka pienna gama ka tanaute kungah pei-in ka tapa Isaac’ zi ding na va la zaw ta ding hi,” a ci hi.

⁵A nasempa in a kungah, “Numei nu in tam gamah ei zui nuom kha lo ding hi. Tuale na pienna gamah na tapa ka peipikia diei mah?” a ci hi.

⁶Abraham in ama kungah, “Khum munah ka tapa na son peipikia vawt lo ding thu thei siem in.

⁷Ka pa’ inn pan le ka pienna gam panin kei ei ladawhin, ‘Na suonlehlahte tungah tam gam kang pie ding hi,’ ci-in ei hopi-in kei tunga ang kiciem TOPA vantung Pasien in na mai-ah ama’ vantung mite hing sawlin nang in ka tapa’ zi ding khat na la ding hi

⁸Ahi vangin numei in ang zui nuom vawt sih leh, tami ka kiciemna panin nang na peng ding hi. Khum gamah ka tapa na peipi vawt sih ding hi,” a ci hi.

⁹Tuaci’n a pu Abraham’ phei kawmah a nasempa in a khut koi-in tam thu tawh kisai-in ama kungah a kiciem hi.

¹⁰Tua ciengin nasempa in a pupa’ kalaoh sawm kai a, ama kung panin a deitel letsong namkim la-in a pei hi; tuale ama dingin Aram-naharaim gam Nahor khuopi-ah a pei hi.

¹¹Ama in Khuopi pulam tuikhuh gei-ah kalaohte a bawhsah hi; tua hun pen nitah lam hi a, numeite tui tawi dinga a pusuo hun tah ahi hi.

¹²Ama in, “Ka pu Abraham Pasien TOPA aw, tuni-in lawcinna ei pie inlen, ka pupa Abraham tungah itna kip hing lah in.

¹³Tuikhuh gei tam sungah kei ka ding a, khuopi ngahnute tui tawi dingin ang kuon uhi.

¹⁴Keima in, ‘Tui ka dawn thei nadingin na tuibeel hing ngasuh in,’ ka ci ciengin, ‘Dawn inlen na kalaohte zong tui hing dawnsah vang,’ ei ci penpen nu khu na nasempa Isaac dinga na sesa numei hing hisah ta’n. Tami tawh ka pupa tungah itna kip na lah lam ka thei ding hi,” a ci hi.

¹⁵A thugen a man masangin Abraham sanggampa Nahor in a zi Milcah tawh a nei a tapa Bethuel’ tanu Rebekah in a liengko tungah tuibeel puo-in a pei hi.

¹⁶Ama ngaibaang mama a, koima tawh a lumton ngai nai lo ngahnu bih khat ahi hi. Tuikhuh ah tua nu kumsuhin a tuibeel dimin a peito hi.

¹⁷Tua ciengin ama dawntuo dingin nasempa tai pai a, “Hepina tawh na beel sung panin tui themkhat ei dawnsah in,” a ci hi.

¹⁸Tua nu in, “Ka pu aw, dawn in,” a ci a, a khut tungah a beel ngiemsuhsahin a dawnsah hi.

¹⁹A dawn ding tui a pieh zaw ciengin tua nu in, “Na kalaohte in zong a kham masangun a dawn ding uh tui va tawi ta vang,” a ci hi.

²⁰Tuaci’n ama in ganhing tuipiehna kuong sungah tui nawsunin a beel guohsahin tui tawi dingin tuikhuhah taikia-in a kalaoh zosie adingin tui a tawi hi.

²¹Mipa in a khuolzinna TOPA in a lawcingsah zo ta amah, a lawcingsah sih ahei ci a thei nadingin sip dide-in tua nu a kaihlit khinkhian hi.

²²Kalaohte in tui a dawn zaw uh ciengin, mipa in tua nu adingin shekel lang a gih kham nahba khat, le a khuta a but ding shekel sawm a gih kham taucien ni la-in pie a,

²³tuale ama in, “Nang koi’ tanu na hiei, ei gen in. Na pa’ inn ah ka zangie nading uh ko adingin innkhan a om diei?” a ci hi.

²⁴Tua nu in ama kungah, “Milcah in Nahor tawh a nei a tapa Bethuel’ tanu ka hi hi,” a ci hi.

²⁵Tua nu in, “Butu le gan an ding tampi le gie nading mun zong ka nei uhi,” cibe lai hi.

²⁶Mipa lu kunin TOPA bie a,

²⁷ama in, “Ka pupa tunga a itna kip le a muonhuoina a taisan lo ka pupa Abraham’ Pasien, TOPA in thupha nga taheh. Kei ka hileh ka pupa’ sanggamte inn zotna lampi-ah ama in ei peipi zo hi,” a ci hi.

²⁸Tua ciengin tua numei tai-in tam thu teng a nu’ innkuonpite kungah a gen hi.

²⁹Rebekah in sanggam pasal khat nei a, a min Laban ahi hi; Laban zong tuikhuha mipa kungah a tai pai hi.

³⁰Ama in nahba le a nau nu’ khuta tauciente mu a, “Mipa in tam bangin ang gen hi,” ci-in a sanggamnu Rebekah’ thugen a zah behin mipa kungah ama a peipai hi; tuale tuikhuh-a kalaohte gei-ah ama na ding hi.

³¹Ama in, “Hing tum in, TOPA’ thupha piehpa aw, bang dingin a pulamah ding den na hei? Inn ka puo zo ta a, kalaohte adingin mun a om hi,” a ci hi.

³²Tuaci’n inn sungah mipa a lut hi; tuale Laban in kalaoh vante suo-in kalaohte neh ding butu le ganhingte an pie a, ama’ keng le a zawpite’ keng sil nading tui zong a pie hi.

³³Tua ciengin a mai-ah neh ding an kilui hi; ahi vangin ama in, “Ka thu ka genzaw masangin an ka ne sih ding hi,” a ci hi. Ama in, “Hing gen in,” a ci hi.

³⁴Tuaci’n ama in, “Kei, Abraham’ nasempa ka hi hi.

³⁵TOPA in nahpi tahin ka pupa thupha pie a, ama mihau khat ahi ta hi; Pasien in ama tungah tuuhon, bawnghon, ngun le kham, sila pasal le sila numei, kalaohte le laate tampi pie zo hi.

³⁶Ka pu’ zi Sarah in a vuoi nua-in ka pupa tawh tapa khat nei hi; ama in a neisa zosie ama a pie hi.

³⁷Ka pupa in ei kiciemsah a, ‘A gam vua ka tenna Canaan-te’ tanute ka tapa’ zi dingin na la sih ding hi.

³⁸Ahi vangin ka pa’ innkuon, ka tanaute kungah pei-in ka tapa ading zi khat na la ding hi,’ ei ci hi.

³⁹Keima in ka pupa kungah, “A numei in ei zui nuom lo kha thei ding hi,’ ka ci hi.

⁴⁰Ahi vangin ama in keima kungah, ‘A thu ka man TOPA in nang tawh a vantungmi sawlin na peina-ah ang lawcingsah na ding hi. Nang in ka tanaute le ka pa’ innsung panin ka tapa adingin zi khat na la ding hi.

⁴¹Ka tanaute kunga na pei leh ka kiciemna pan na peng ding hi; amate in tua nu nang pie vateh sih nan uleh ka kiciemna panin na peng veve ding hi,’ ei ci hi.

⁴²“Tuni-in tuikhuh ah pei-in, ‘Ka pupa Abraham Pasien, TOPA aw, tu-a ka peina lampi-ah ei lawcingsah in!

⁴³Tuikhuh gei tam sungah keima ka ding hi; tui tawi dinga ang pei ngahnu nu kungah, “Ka dawn dingin na tuibeel sunga tui themkhat ei saw in, kang thum hi,” ka ci ding a,

⁴⁴tuale ka kungah, “Kidawn in, na kalaohte ading zong nang sawpieh vang,” ei ci nu khu ka pupa’ tapa dinga TOPA in a sesa numei hing hisah in,’ ka ci hi.

⁴⁵“Ka lungsim sunga ka thunget a man masangin a liengko tungah a tuibeel puosa-in Rebekah ang pusuoh hi; tuikhuh ah ama peisuhin tui a tawi hi. Tuale ama kungah, ‘Tui ei dawnsah in,’ ka ci hi.

⁴⁶Tua nu in a liengko tunga om tuibeel ang khiesuh pai a, ‘Dawn aw, na kalaohte zong tui hing pie vang,’ ei ci pai hi. Tuaci’n ka dawn a, ama in kalaohte zong tui a pie hi.

⁴⁷Tua zaw cieng in tua nu kungah, ‘Nang koi tanu na hiei?’ ci-in ka dong hi. Tua nu in, ‘Nahor in Milcah tawh a nei a tapa Bethuel’ tanu ka hi hi,’ ei ci hi. Tuaci’n a nahkuo-ah nahba ka basah a, a khutah taucien ka bunsah hi.

⁴⁸Tua ciengin lukunin TOPA ka bie a, a tapa ading ka pupa sanggampa’ tanu ka nga nadingin lampi mana keima ei pui ka pupa Abraham’ Pasien, TOPA ka phat hi.

⁴⁹Tua ahi ciengin tu-in ka kiziet hei ding le ka kivei hei ding ka thei nadingin ka pupa tungah muonhuoi tah le a mantahin na gamtat ding uleh ei gen un; na gamtat sih ding uleh zong ei gen un,” a ci hi.

⁵⁰Tua ciengin Laban le Bethuel in dawng a, “Tam thu TOPA kung pana ang pei ahi hi. Nang kungah a sie ahi a, a pha ahi zongin kang gen thei sih uhi.

⁵¹En in, na mai-ah Rebekah om hi. Ama la-in pei unlen, TOPA in ang gensa bangin ama na pu tapa’ zi hisah in,” a ci uhi.

⁵²Abraham’ nasempa in tam thu a zah ciengin TOPA mai leilahah a kunsuh hi.

⁵³Tuale nasempa in ngun le kham kizepnate le puonte lakhie-in amate tungah Rebekah a pie hi; ama in a naupa le a nu zong a manham kizepnate a pie hi.

⁵⁴Tua ciengin ama le a zawpite in an ne tui dawnin a om vua, khumnah a zan gie uhi. Zingmawng a thaw ciengun ama in, “Ka pupa kungah ei peisahkia ta un,” a ci hi.

⁵⁵A sanggampa le a nu in, “A tawmpen ni sawm sung beh khat ko tawh ngahnu nu hing omsah lai un; tua ciengin hing peisah na va ung,” a ci uhi.

⁵⁶Ahi vangin ama in, “TOPA in ka khuolzinna ei lawcingsah zo ta ahi ziehin, ei kihehsah nawn da un; ka pupa kung zuonkia dingin ei peisah ta un,” a ci hi.

⁵⁷Amate in, “Ngahnu nu hlanin ama dong vai,” a ci uhi.

⁵⁸Tuale Rebekah a hlan vua, “Tampa na zui pai ta diei mah?” a ci uhi. Ama in, “Zui vang,” ci pai lien hi.

⁵⁹Tuaci’n amate in zong a sanggamnu uh Rebekah le a cing nu, Abraham’ nasempa le a mite tawh a peisah uhi.

⁶⁰Tuale amate in Rebekah thupha pie-in ama tungah, “Kote’ sanggamnu aw, a tul tampite’ nu hi ta’n len; na suonlehlahte in a galte uh’ tunkotte luo ta uheh!” a ci uhi.

⁶¹Tua ciengin Rebekah le a nasem numeite a ding dawh vua, kalaohte tungah tuongin mipa a zui uhi; tua bangin nasempa in Rebekah zawpi-in a lampi-ah a pei hi.

⁶²Tu-in Beer-lahai-roi panin Isaac pei-in Negeb gamah a teng hi.

⁶³Nitah lamin gamlaha pei[70] dingin Isaac a pusuoh hi; a khuodah leh ama in kalaoh ang peite a mu hi.

⁶⁴Tuale Rebekah khuodahin Isaac a mu ciengin a kalaoh tung panin naw kumsuh a,

⁶⁵a nasempa kungah, “Khum gamlaha eite ei dawn dinga ang pei pa koi ahiei?” a ci hi. Nasempa in, “Ka pupa ahi hi,” a ci hi. Tuaci’n ama in a maituom la-in a kikhu hi.

⁶⁶Tuale a nasempa in Isaac kungah a sepnasa zosie a gen hi.

⁶⁷Tua ciengin Isaac in a nu Sarah’ puonbuh sungah tua nu a tumpi hi. Ama in Rebekah la-in ama pen a zi a suoh hi. Ama in tua nu a it hi. Tuaci’n a nu si zaw ciengin Isaac a hlamuong hi.