Read Zou PIENCILNA 26 Bible Online

PIENCILNA 26 - Zou bible

PIENCILNA 26

¹Abraham hun lai-a kielpi masa banah tu-in gam sungah kielpi khat a tung hi. Gerar ah Philistia Kumpipa Abimelech kungah Isaac a haw hi.

²Isaac[77] kungah TOPA kilahin, “Egypt gamah peisuh sin; nang kang lah ding gamah teng in.

³Tam gamah pemta bangin teng inlen, nang hing ompi-in thupha kang pie ding hi; bangzieh ahei cile nang le na suonlehlahte tungah tam gam kang pie ding a, na pa Abraham tunga ka ciemsa kiciemna ka tungsah ding hi.

⁴Na suonlehlahte vana aasi bangin tampi ka phasah ding a, na suonlehlahte tungah tam gam teng zosie ka pie ding hi; na suonlehlahte ziehin leitung minam zosie in thupha a ngalaw ding uhi.

⁵Azieh pen Abraham in ka thumangin ka sawlna, ka thupiehnate, ka thukipte le ka thukhamte a zui hi,” a ci hi.

⁶Tuaci’n Gerar ah Isaac a teng hi.

⁷Khum muna mite in a zi vai a dawh uh ciengin ama in, “Ama ka sanggamnu ahi hi,” a ci hi. Azieh pen, “Rebekah pen ngaibaangin tua gam mite in ama ziehin ei that kha va uh,” ci-in ngaisun ahi ziehin, “Ka zi ahi hi,” a ci ngam sih hi.

⁸Khum munah Isaac sawtveipi a op zaw ciengin Philistia Kumpi Abimelech in a tawlet pan a khuodah leh Isaac in a zi Rebekah a no laitah a mu hi.

⁹Tuaci’n Abimelech in Isaac hlanin, “Na zi tahtah hi mawh lo amah! Tuale bang dinga, ‘Ka sanggamnu hi,’ na ci ahei?” a ci hi. Isaac in ama kungah, “Ama ziehin silaw kha vang ci-a ka ngaisut zieh ahi hi,” a ci hi.

¹⁰Abimelech in, “Ko tunga nang bawl tami khu bang ahiei? Mite khatpo na zi tawh na lumton thei mai ding a, tua hile ko tunga khielna ei tun na hi ta ding hi,” a ci hi.

¹¹Tuaci’n Abimelech in mi zosie galgih a, “Tampa ahi a, a zinu ahi zongin a khoi kha poma kithat ding hi,” a ci hi.

¹²Isaac in tua leitangah khai tu a, tua kum ma-in a za zakhat a la hi. TOPA in thupha pie a

¹³tua pa mihau khat a suoh hi; mihau mama khat a suo dongin a nei a lam a kibelap semsem hi.

¹⁴Ama in tuuhon, bawnghon, le innkuon tampi nei a, Philistia-te in ama a eng uhi.

¹⁵(A pa Abraham hun lai-a a pa’ nasemte in a na taw uh tuikhuh zosie tu-in Philistia-te in lei vua-in a khacip sieng uhi.)

¹⁶Abimelech in Isaac kungah, “Ko kung panin pei ta un; nang pen ko adingin vang lien ta luo teh,” a ci hi.

¹⁷Tuaci’n khum mun panin Isaac pei-in Gerar kuom sungah phuol satin khum sungah a teng hi.

¹⁸Isaac in a pa Abraham’ hun lai-a kitosa tuikhuhte a topha kia hi; azieh pen Abraham a si zaw ciengin Philistia-te in tuate a khacip sieng uhi; tuale ama in a pa na phuosa minte ma a phuokia hi.

¹⁹Ahi vangin Isaac’ nasemte in tua kuom sungah tuikhuh to-in tuisam luonna khat a mu vua,

²⁰Gerar gancingte le Isaac’ gancingte kihau-in “Tuikhuh ko-a’ hi bo,” a kici uhi. Tuaci’n ama in tua tuikhuh Esek[78] ci-in min phuo hi. Azieh pen amate le Isaac kisel hi.

²¹Tua ciengin tuikhuh adang khat a tokia vua, tua vai-ah zong a kihaukia leuleu uhi; tuaci’n ama in tua tuikhuh’ min Sitnah[79] ahisah hi.

²²Khum mun panin ama kituonin tuikhuh adang khat to a, tua vai-ah a kihau nawn sih uhi. Tuaci’n ama in tua tuikhuh’ min Rehoboth[80] hisah a, “Tu-in TOPA in eite adingin mun ei bawlpieh zo a, tam gamah i pung ding uhi” a ci hi.

²³Khum mun panin Beer-sheba ah ama peito hi.

²⁴Tuale khum ni zan ma-in ama kungah TOPA kilah a, “Keima na pa Abraham’ Pasien ka hi hi; zau sin, azieh pen ka nasempa Abraham ziehin nang kang ompi a, nang thupha hing pie-in na suonlehlahte tampitah kang phasah ding hi,” a ci hi.

²⁵Tuaci’n ama in khum munah maitam khat lamin TOPA bie a, khum mun ma-ah a puonbuh a sung hi. Khum munah Isaac’ nasemte in tuikhuh khat a to uhi.

²⁶Tua ciengin Gerar panin a thudawhpi pa Ahuzzath le a galkapmangpa Phicol tawh ama kungah Abimelech haw hi.

²⁷Isaac in a kung vuah, “Note in kei ei muda-in na kung pan vua nei nawmang uh hi napi-in bang dingin kei kunga hing haw na hi uh ahei? “ a ci hi.

²⁸Amate in, “TOPA in nang ang ompi lam cien tahin ka mu zo ta uhi. Tuaci’n nang le ko kikalah kiciemna khat om leh ka ci vua, tuale nang tawh thuciemna khat bawl vai-in,

²⁹tuaci’n kote in nang hing sukha vawt loin na tungah sil hoi bawl ding ci simlo note bangma hing law lo a, lungnuom taha kang peisah tehteh bangin, nang in zong kote tungah sietna nang bawl sih ding hi. Tu-in nang pen TOPA’ thupha pieh na hi hi,” a ci uhi.

³⁰Tuaci’n amate adingin pawi khat bawlpiehin an ne tui dawnin a om uhi.

³¹Zingmawngin amate thobai-in khatlekhat kiciemna a bawl uhi; Isaac in a lampi vuah amate hla a, ama kung panin lungnuomin a pei uhi.

³²Khum ni ma-in Isaac’ nasemte pei-in a tawsa uh tuikhuh tawh kisai-in ama kungah a gen vua, “Tui ka mu ta uhi!” a ci uhi.

³³Ama in tua pen a min Shibah[81] phuo hi; tua ziehin tuni dongin tua khuopi’ min Beer-sheba[82] kici hi.

³⁴Esau kum sawmli a phah ciengin Hit mi Beeri’ tanu Judith le Hit mi Elon’ tanu Basemath a zi-in a la hi;

³⁵ama gel in Isaac le Rebekah’ hinkhuo gentheisah mama uhi.