Read Zou PIENCILNA 28 Bible Online

PIENCILNA 28 - Zou bible

PIENCILNA 28

¹Tua ciengin Isaac in Jacob hlanin ama thupha pie a, tuale thuhilin, “Canaan numeite tawh na kinung sih ding hi.

²Paddanaram-a na nu’ pa Bethuel’ inn ah thakhatin pei in; khum muna na nu’ sanggampa Laban’ tanute khat zi-in va la ta’n.

³Mi honpi khat na suo thei nadingin Vanglien Pasien[87] in nang thupha hing pie hinlen, hing ciphasahin tampi hing phasah taheh.

⁴Pasien in Abraham a piehsa, tu-in pemta banga na tenna leitang na nei thei nadingin ama in Abraham’ thupha nangma le na suonlehlahte tungah hing pie taheh,” a ci hi.

⁵Tua bangin Isaac in Jacob a peisah hi; tuale Jacob le Esau’ nu Rebekah’ sanggampa Aram mi Bethuel’ tapa Laban opna Paddanaram-ah ama a pei hi.

⁶Tu-in Isaac in Jacob thupha pie zo a, khum tah panin Paddanaram-ah zi la dinga a sawl lam le thupha a piehin, “Canaan numeite na tenpi sih ding hi,” ci-in ama thuhil a,

⁷Jacob in nu le pa thu mangin Paddanaram ah a pei zo lam Esau in a thei hi.

⁸Tuaci’n Canaan numeite in a pa Isaac a lungkimsah lo lam uh zong Esau in a thei hi.

⁹Ishmael kungah Esau pei a, a neisa a zite banah Abraham’ tapa Ishmael’ tanu, Nebaioth’ sanggamnu Mahalath a zi-in a la hi.

¹⁰Jacob in Beer-sheba khuo nuasie-in Haran lam zuonin a pei hi.

¹¹Mun khatah ama tung a, ni tumzo ahi ziehin tuanah a zan gie hi. Tua munah suongtum khat la a, tangkhamin nei-in a lum hi.

¹²Ama in mang man a, tua a mangin leitungah kalei[88] khat kidaw-in a dawn in van holto hi; tua kalei tungah Pasien’ vantung mite kato kumsuhin a om uhi.

¹³A gei-ah[89] TOPA ding a, “Kei pen na pu Abraham’ Pasien le Isaac’ Pasien, TOPA ka hi hi; nang le na suonlehlahte tungah a tunga na lupna leitang kang pie ding hi;

¹⁴na suonlehlahte lei-a leivui za-in a tam ding vua, nitumna lam, nisuona lam, leilu lam le leitaw lamah na kizel ding uhi; nang le na suonlehlahte tungtawnin leitung minam zosie in thupha ngalaw[90] ding uhi.

¹⁵Nang hing ompi-in na peina po-ah kang cing ding a, tam gamah kang peipikia ding hi, ci thei in; bangzieh ahei cile na tunga kang ciemsa thute ka bawl sieng masangin nang kang nuasie sih ding hi,” a ci hi.

¹⁶Tua ciengin a kimutna panin Jacob a khanglo a, “Tam munah TOPA om tahtah a, ken lah ka thei kha vawt sih hi!” a ci hi.

¹⁷Tuale ama zau a, “Tami mun bangza taha zau huoi ahiei! Tami khu Pasien’ inn lo adang hi lo a, tami khu vantung lutna kotpi ahi hi,” a ci hi.

¹⁸Tuaci’n zingmawngin Jacob thobai a, ama in a tangkham-a a zah suongtum la-in khuomin phut a, a tungah sathau a sungsuh hi.

¹⁹Ama in khum mun a min Bethel[91] a hisah hi; ahi vangin a masa-in khum khuopi’ min Luz ahi hi.

²⁰Tua ciengin Jacob in kiciemna khat bawlin, “Pasien in kei ei ompi a, tami ka peina lampi-ah ei kemin neh ding an le sil ding puonte ei pieh a,

²¹ka pa’ inn lumah lungmuong taha ka tunkia leh, TOPA khu ka Pasien ahi ding a,

²²khuoma ka phu tami suongtum zong Pasien’ inn ahi ding hi; kei nei pieh zosie tungah sesawm- suo-sekhat pel loin nangma kang pie ding hi,” a ci hi.