Read Zou PIENCILNA 3 Bible Online

PIENCILNA 3 - Zou bible

PIENCILNA 3

¹Tu-in TOPA Pasien bawlsa gamsa cinteng sangin gulpi a pilkhel pen ahi hi. Ama in numei kungah, “Pasien in, ‘Um sunga singga khat beh ne lo ding,’ ang ci amah?” a ci hi.

²Numei in gulpi kungah, “Um sunga singgate ka ne thei uhi;

³ahi vangin Pasien in, ‘Um laikima singga pen neh zong na neh lo ding uh, khoi zong na khoi lo ding uh ahi hi. Tua bang na bawl uleh na si ding uhi,’ ei ci hi,” a ci hi.

⁴Ahi vangin gulpi in numei kungah, “Na si sih ding uhi;

⁵bangzieh ahei cile tua singga na neh ciengun na mit uh kihongin a sie le a pha thei-in Pasien[11] tawh na kibah ding lamtah uh Pasien in thei hi,” a ci hi.

⁶Tuaci’n numei in tua singkung a mu ciengin neh dingin tuituohsa a, a mit zong a la mama hi. Tuale mi pilsah dingin tua singkung a deihuoi lam a mu ciengin tua nu in a ga loin a ne hi; tua nu in ama tawh a omton a pasal zong themkhat pie a, a pasal in zong a ne hi.

⁷Tua ciengin a nipi-un a mit uh kihong a, a guohtanga a op lam a kithei uhi; tuale ama gel in theina khui-in ama gel adingin puon a bawl uhi.

⁸Nitah lam nidai hunin um sungah TOPA Pasien peina huging ama gel in a za vua, tuale TOPA Pasien’ opna panin mipa le a zinu, umlai singkungte lahah a kiphuol uhi.

⁹Ahi vangin TOPA Pasien in mipa hlanin ama kungah, “Nang hei-a om na hei?” a ci hi.

¹⁰Ama in, “Um sungah na huging ka za a, ka guohtanga ka op ziehin zau-in ka kiphuol hi,” a ci hi.

¹¹Ama in, “Guohtanga na op lam koi hing gen ahiei? Ne si’n, kang ci tua singga na ne ta amah?” a ci hi.

¹²Mipa in, “Kithuopi dinga nei pieh numei in singga ei pie a, ka ne hai ta hi,” a ci hi.

¹³Tua ciengin TOPA Pasien in numei kungah, “Bang dinga hici gamtat na hiei?” a ci hi. Numei in, “Gulpi in ei sol a, ka ne hai ta hi,” a ci hi.

¹⁴TOPA Pasien in gulpi kungah, “Tam bangin gamta zo na hi ziehin, ganhing zosiete le gamsa zosiete lahah samsiet na thuoh ding hi; na awm tawh na kithol ding a, na hin sung tungtawnin leivui na ne ding hi.

¹⁵Nang le numei kikal le na suonlehlahte le tua nu suonlehlahte kikalah kilangneina ka omsah ding hi; ama in na lutang ang tuoncil ding a, nang in ama’ ketul na tuhpieh ding hi,” a ci hi.

¹⁶Ama in tua numei kungah, “Naupaaina-ah gimnate nasie tahin ka khangsah ding a, a thuohla pipi-in nau na suoh ding hi. Hinanle na pasal ma na lunggul bembom ding a, ama in nang tungah ang uh ding hi,” a ci hi.

¹⁷Tuale mipa[12] kungah, “Nang in na zi thugen mangin, ‘Na ne sih ding hi,’ ci-a kang thupieh singga ne zo ta na hi ziehin, nangma vangin leitang kisamsie hi; na hin sung tungtawnin gim le tawlin na semin an na ne ding hi;

¹⁸nang adingin ling le khaute hing po ding a, nang in gamlaha ante lohingte na ne ding hi.

¹⁹Lei-ah na peikia masangsie na maitangah opsakai-in an na ne ding hi, bangzieh ahei cile nang pen leivui pana ang kila na hi hi; nang leivui na hi a, leivui ma ah na peikia ding hi,” a ci hi.

²⁰Mipa in a zi pen mihing zosie’ nu ahi ziehin a min Eve[13] vaw hi.

²¹Tuale TOPA Pasien in mipa[14] le a zi adingin savun puon bawlpiehin ama gel a silsah hi.

²²Tua ciengin TOPA Pasien in, “En un, mipa pen eite khat tawh kibang a, a sie le a pha a thei ta hi; tu-in mipa in hinna singga lo hinlen hing ne kha mawh leh ang nungta den ta ding hi,” a ci hi.

²³Tua ahi ziehin TOPA Pasien in mipa pen a pienna leitang hlo dingin Eden um panin a sawl hi.

²⁴Ama in mipa a notmang hi; ama in hinna singkung zuotna lampi a cing dingin Eden um nisuona lamah meikuong namsau tawh Cherub-te a pangsah hi.