Read Zou PIENCILNA 30 Bible Online

PIENCILNA 30 - Zou bible

PIENCILNA 30

¹Rachel in Jacob tawh ta a nei lo lam a kimu bepin ama in a sanggamnu a eng hi; tuale ama in Jacob kungah, “Ta ei neisah in, tua ahi sih mawh leh kisi ta vang!” a ci hi.

²Rachel tungah Jacob lungthah mama a, tuale ama in, “Na naubu a khahtan thei dingin Pasien’ muna om ka hi son amah?” a ci hi.

³Tua ciengin ama in, “Ka nasem numei Bilhah tanah om hi; ama in ka phei tungah ta suohin ama ziehin ken zong ta ka nei thei nadingin ama luppi in,” a ci hi.

⁴Tuaci’n ama in Jacob kungah a nasem numei Bilhah a zi dingin a pie hi; tuale Jacob in tua nu a luppi hi.

⁵Bilhah gai-in Jacob tawh tapa khat nei hi.

⁶Tua ciengin Rachel in, “Pasien in kei thu ei khen zo a, ama in ka aw zong za zo-in tapa khat ei pie zo hi,” a ci hi; tua ahi ziehin ama in a min Dan[99] phuo hi.

⁷Rachel’ nasem numei Bilhah gaikia-in Jacob tawh tapa a nina nei hi.

⁸Tua ciengin Rachel in, “Nahpitaha kibuonna tawh ka sanggamnu buonin[100] ka zo ta hi,” a ci hi; tuaci’n ama in a min Naphtali phuo hi.

⁹Leah in a tathang zo ahi lam a kithei ciengin ama in a nasem numei Zilpah la-in a zi dingin Jacob a pie hi.

¹⁰Tua ciengin Leah’ nasem numei Zilpah in Jacob tawh tapa khat a nei hi.

¹¹Tuale Leah in, “Kampha!” ci a, tuaci’n a min Gad[101] phuo hi.

¹²Leah’ nasem numei Zilpah in tapa a nina nei hi.

¹³Leah in, “Lungdam sam ing e! Azieh pen numeite in kei mi lungdamnu ei ci ding uhi,” a ci hi; tuaci’n ama in a min Asher[102] phuo hi.

¹⁴Mangbu lah hun laitahin lolai-ah Reuben a vahkawi leh zawldei-ai kungte mu a, a nu Leah kungah tuate a puoh hi. Tua ciengin Rachel in Leah kungah, “Hepina tawh na tapa’ zawldei-ai themkhat ei pie vawi” a ci hi.

¹⁵Ahi vangin Leah in, “Ka pasal nei lahpieh thuneu na sa amah? Ka tapa’ zawldei-ai zong ei lahpieh lai ding na mah?” a ci hi. Rachel in, “Ahi leh na tapa’ zawldei-ai man dingin nang tawh tuzanin ama ang lumton thei ding hi,” a ci hi.

¹⁶Nitahin a lo panin Jacob vai a tun ciengin a dawn dingin pusuoh a, “Ka kunga nang lup kul ding hi. Azieh pen ka tapa’ zawldei-ai tawh nang kang thapsa ahi hi,” a ci hi. Tuaci’n khum zanin ama tawh a lumton hi.

¹⁷Tuale Pasien in Leah’ ngetna ngai a, ama gai-in Jacob tawh tapa a ngana nei hi.

¹⁸Leah in, “Ka pasal tungah ka nasem numei ka pieh ziehin Pasien in ka thaciel[103] ei piezo ta hi,” a ci hi; tuaci’n a min Issachar phuo hi.

¹⁹Tuale Leah gaikia a, Jacob tawh tapa a guhna nei hi.

²⁰Tua ciengin Leah in, “Pasien in kei moken hoi khat ei pie zo hi. Tu-in ka pasal in kei ei patawi[104] ding hi. Azieh pen ama tawh tapa guh ka nei ta hi,” a ci hi; tuaci’n ama in a min Zebulun phuo hi.

²¹Tua ciengin ama in tanu khat nei a, a min Dinah phuo hi.

²²Tua ciengin Pasien in Rachel phawh a, Pasien in ama’ thu ngai-in a naubu a honpieh hi.

²³Ama gai-in tapa khat nei a, “Pasien in ka zalatna a lamang ta hi,” a ci hi;

²⁴tuale ama in a min Joseph[105] phuo a, “TOPA in tapa dang khat ei piehbe heh!” a ci hi.

²⁵Rachel in Joseph a nei zaw ciengin Jacob in Laban kungah, “Ka inn le ka gamah ka pei thei nadingin kei ei sawl in.

²⁶Nang kunga ka thalawsa ka zite ka tate ei pie inlen ei peisah in, azieh pen na na kang seppieh lam na thei hi,” a ci hi.

²⁷Ahi vangin Laban in ama kungah, “Tua banga thu nei gensah leh, ka aisanna tung panin nang vang tawh TOPA in kei thupha ei piezo hi, ci ka thei hi.

²⁸Na thaman ding hing gen inlen kang pie ding hi,” a ci hi.

²⁹Jacob in ama kungah, “Na na bang ka ci sep a, ka khut sungah na gante bang hing cipun ahei ci nang mama in na thei hi.

³⁰Azieh pen kei ang tun masangin na gantate tawmno khat ahi a, tuate tampitahin a khang hi; tuale ka kiheina muncin tengah TOPA in nang thupha ang pie hi. Ahi vangin tu-in ka innkuonpite ading zong bang cih ciengin vaihawm ta ding ka hei?” a ci hi.

³¹Ama in, “Nang bang kang pie diei?” a ci hi. Jacob in, “Bangma zamtawng ei pie sin; tami nei bawlpieh ding po leh na tuuhonte va-in kang cinpieh ding hi:

³²Na tuuhon zosie lahah ei vahsah inlen, tuate lah panin tuu a puong zosie, a pawl zosie, tuuno a vom zosie, le keelte lah panin a pawl le a puong zosie ei pieh in; tua teng ka thaman hi taheh.

³³Tuaci’n mailam hunah ka thamante en dinga nang pei ciengin ka thumanna kei adingin teci ahi ding hi. Keel lahah a puong lo le a pawl lo poma le tuuno lahah a vom lo poma, kei kunga a kimu khah leh, guhin kisim pailien ding hi,” a ci hi.

³⁴Laban in, “Hoi e! Na cisa bangin hi taheh,” a ci hi.

³⁵Ahi vangin Laban in khum ni-in keeltang a dung pawl le a bem pawlte, keelpi a puong le a pawlte, a ci tunga themkhat a kang pawl tapo ladawhin a tapate a cingsah hi;

³⁶tuale Jacob in Laban’ tuuhon a omlai teng a cin laitahin ama in ama le Jacob kikal nithum khuolzinna munah tua ganhonte peipi hi.

³⁷Tua ciengin Jacob in hieng sing, zuonmuot sing, le theiba panin a ba thate sat a, a hawte khe siengin a sunga a kangte a kidawhsah hi.

³⁸Ama in tuipiehna kuong sunga gantate mai-ah a haw kikhesa singbate koi hi. Tam pen gantate tui dawn dinga a peina uh tuidawnna mun ahi hi. Tui dawn dinga amate a pei ciengun a kizangmat vua,

³⁹tuale singbate mai-ah gantate kizangmatin, tuaci’n gantate in a dung pawl, a puong le a pawl tate a nei uhi.

⁴⁰Jacob in tuunote khenkhie a, tua gantate Laban’ gantate lahah a dungpawl le a vomcip teng lam a ngasah hi; tuale ama’ tan ding teng tuom koi-in Laban’ tuuhonte tawh koiton lo hi.

⁴¹Ganta thahatte a zangmat hun sielin, singbate lahah a kizangmat thei nadingun Jacob in tuuhonte masanga gan tuipiehna kuong sungah singbate koi hi.

⁴²Ahi vangin ganta zawngkhalte mai-ah tua singbate koi lo hi; tuaci’n ganta zawngkhal teng pen Laban-a’ suohin ganta thahat teng pen Jacob-a’ a suoh hi.

⁴³Tua ci bangin mipa nahpitahin hau a, ama in ganta honpi, sila numei, sila pasal, kalaohte le laa tampitah a nei hi.