Read Zou PIENCILNA 31 Bible Online

PIENCILNA 31 - Zou bible

PIENCILNA 31

¹Laban’ tapate in, “Jacob in i pa-a’ zosie la zo ta hi; ama in i pa tawh kisai tami hauna zosie nga zo hi,” a ci uh Jacob in a za hi.

²Laban in masanglai bangin maipha tawh ama a don nawn lona lam Jacob in mu hi.

³Tua ciengin TOPA in Jacob kungah, “Na pu na pa le na tanaute’ gamah kilekia in, nang kang ompi ding hi,” a ci hi.

⁴Tuaci’n Jacob in mi sawlin a ganhon opna gamlahah Rachel le Leah hlansah a,

⁵a kung vuah, “Na pa un masanglai bangin maipha tawh kei ei don lo lam ka mu hi. Ahi vangin ka pa’ Pasien in kei ei ompi hi.

⁶Ka tha nei zosie tawh na pa uh’ na ka sep lam na thei uhi;

⁷ahi vangin na pa un kei ei solin ka thaman sawmvei khel a, hizongle kei ei bawlsiet ding Pasien in phal lo hi.

⁸Ama in, ‘A pawl teng na thaman ding hi heh,’ a ci leh ganhon zosie in ta a pawl ngentang a nei uhi. Tuale ama in, ‘A dung pawl teng na thaman hi heh,’ a ci leh ganhon zosie in ta a dungpawl a nei uhi.

⁹Tam bangin Pasien in na pa’ ganhonte la-in kei ei pie hi.

¹⁰“Ganhonte zangmat hunin ka khuodah leh keelpi tunga kikhap keeltang zosie a dungpawl, a bempawl, a puonga a opna khu ka mangin ka mu hi.

¹¹Tua ciengin Pasien’ vantungmi in ka mangin ka kungah, ’ Jacob,’ ei ci-a, tuale keima in, “Tanah om ing!’ ka ci hi.

¹²Ama in, ‘Dahto inlen en in, keelpi tunga kikhap keeltang zosie dungpawl, bem pawlin puong uhi; bangzieh ahei cile na tunga Laban gamtat zosie ka mu zo ta hi.

¹³Kei pen nang in khuom khat sathau nu-in kei tungah kiciemna nang bawlna mun Bethel[106] Pasien ka hi hi. Tu-in tam gam nuasie pailien inlen na pienna gamah kilekia in,’ ei ci hi,” a ci hi.

¹⁴Tua ciengin Rachel le Leah in ama dawngin, “I pa’ inn sungah ei dinga a kinuasie tanh le luo khat beh a om ei mah?

¹⁵Ama in ei gel pen gamdangmi banga ei ngaituo hi lo amah? Azieh pen ama in eite ei zua zo a, ei dinga ei kipie sum zang mang zo hi.

¹⁶Pasien in i pa tung pana a lahpieh neisa zosie eite le i tate-a’ ahi hi; tua ahi ciengin tu-in Pasien in na kunga ang gen popo bawl in,” a ci hi.

¹⁷Tuaci’n Jacob tho a, kalaoh tungah a tate le a zite a tuongsah hi;

¹⁸tuale ama in a ganhon zosie, a nei a lam zosie, Paddanaram gam sunga a nei a ganhon zosie hawi-in a pa Isaac’ tenna Canaan gam zuonin a pei hi.

¹⁹Tuumul heu dingin Laban a kuon laitahin Rachel in a pa’ innsung pasien-te na gu hi.

²⁰Tuale Jacob in a tai sawm lam ama kungah gen loin Aram mi Laban sol hi.

²¹Tuaci’n a neisa vannuoi tawh ama tai hi. Ama in a kipatna-ah Euphrates[107] gun kanin Gilead gam muoltung lam a manaw hi.

²²A ni thum ni-in Jacob a tai lam Laban kungah kigen hi.

²³Tuaci’n ama in a sanggamte zawpi-in ama a phah masangsie Gilead muoltung gamah ni sagi sung a del hi.

²⁴Ahi vangin Aram mi Laban kungah zanlai a mangin Pasien pei-in ama kungah, “Jacob kungah thupha ahi a, thusie ahi zongin kamteng khat zong na gen lo nadingin kidawm in,” a ci hi.

²⁵Laban in Jacob a nuaphah hi. Tu-in Jacob in Gilead muoltung gamah a puonbuh na lam a, Laban in Gilead muoltung gamah a sanggamte tawh giephuol a sat uhi.

²⁶Laban in Jacob kungah, “Na bawl bang ahei? Kei nei sol a, ka tanute zong namsau lahsanin galmat bangin na peipi zo ta hi.

²⁷Bang dingin kei ei solin bangma ei gen loin na daptai mawh na hei? Tawm le lyre tumin guolnopna late tawh hing hla buong sam ding hi veng maw.

²⁸Tuale bang dingin ka tanute le ka tapate tawh mangpha pai-in ei kitawpsah beh lo na hei? Na mot gamtat mama hi.

²⁹Nang bawlsietna khop ding thu ka nei hi; ahi vangin zani zanin na pa’ Pasien in ei hopi a, ‘Jacob kungah thupha ahi a, thusie ahi zongin kamteng khat zong na gen lo nadingin kidawm in,’ ei ci hi.

³⁰Na pa’ inn na ngai seng zieha a pei ding hi nan lacin bang dinga ka pasien-te na guh mawh ahei?” a ci hi.

³¹Jacob in Laban dawng a, “Ka kung panin pauhat thu tawh na tanute nang kaidawh khah ding ka zau zieh ahi hi.

³²Hinanle na pasien-te na muna penpen koikoi hitaleh kihinkhawi lo ding hi. I sanggamte muna-ah ka kunga om nang-a’ teng kawh inlen kilah in,” a ci hi. Rachel in tua pasien-te[108] a guh lam Jacob in a thei sih hi.

³³Tuaci’n Jacob’ puonbuh sungah Laban lutin, tuale Leah’ puonbuh, le a nasem numei gel’ puonbuhte sungah zong lut a, ahi vangin ama in tuate a mu sih hi. Leah’ puonbuh panin ama pei-in Rachel’ puonbuh sungah a lut hi.

³⁴Tua laitahin Rachel in innsung pasien-te la-in kalaoh phaw kawmah koi-in a tungah a to hi. Laban in puonbuh sung teng zosie long a, ahi vangin tuate a mu sih hi.

³⁵Tuale ama in a pa kungah, “Na mai-ah kang din thei lo ziehin ka pu lungthah sin. Numei’ ngaina nin ka nei zieh ahi bo hi,” a ci hi. Tuaci’n ama in a sui vangin innsung pasien-te a mu sih hi.

³⁶Tua ciengin Jacob lungthah a, Laban phawhsie gawpin, “Ka tatkhielna bang ahiei? Tamza taha nei del nadingin ka mawna bang ahiei?

³⁷Ka van zosie na lonsieng vangin na innsung van bang teng ahiei na mu? Ei gel kikalah amate in thu a khen thei nadingun kei sanggamte le nang sanggamte mai-ah tuate hing koi in.

³⁸Tami tam kum sawmni sung nang tawh kang om zo ta hi; na tuupite le na keelpite a tatol om loin na ganhonte lahah tuutang sa ka ne sih hi.

³⁹Gamsate’ thasate zong na kungah kang puoh ngai vateh sih hi; kei mama in tua bang supnate ka thuoh hi; sunlai-a kigute hile zanlai-a kigute hile kei nei losah hi.

⁴⁰Kei pen tu-a bang ka hi hi. Sunlai-in nisa in ei katum a, zanlai-in khuovot in ei tawpkangin ka kimu thei sih hi.

⁴¹Tami kum sawmni sung na inn ah ka om hi. Na tanu nite ziehin kum sawm le li sung nangma’ na semin kum guh sung na ganhonte ka cing a, ka thamante sawmvei na khel hi.

⁴²Ka pa’ Pasien, Abraham’ Pasien, le Isaac’ Giinpa[109] kei lamah ang om lo khat hi leh, khut guoha nei sawlmang tahpi ding ahi hi. Pasien in ka gentheina le ka khut tawh ka sepnate mu a, zani zanin nang ang phawhsie hi,” a ci hi.

⁴³Tua ciengin Laban in dawngin Jacob kungah, “Tanu teng keima’ tanu, naupang teng keima’ naupang, ganhon teng keima’ ganhon ahi a, khum na mu teng zosie khu keima-a’ ahi hi. Ahi vangin tam ka tanute tung ahi a, amate sunga pieng naupangte tungah ahi zongin tuni-in ken bang law thei ding ka hei?

⁴⁴Tu-in hing pei inlen nang le kei in thuciemna khat bawl vai; nang le kei kikalah teci hisah vai,” a ci hi.

⁴⁵Tuaci’n Jacob in suong khat la-in khuomin phut hi.

⁴⁶Tuale Jacob in a sanggamte kungah, “Suongte khawm un,” ci a, amate in suong la-in a lomin a cieng uhi; amate in tua suongcien gei-ah an a ne uhi.

⁴⁷Tua khu Laban in Jegar-sahadutha[110] ci-a, ahi vangin Jacob in Galeed[111] ci hi.

⁴⁸Laban in, “Tam suongcien pen tuni-in nang le kei kikala teci ahi hi,” a ci hi. Tua ahi ziehin ama in tua khu Galeed, ci-in minvaw a,

⁴⁹a khuom[112] pen Mizpah[113] ci hi. Azieh pen Laban in, “Ei tegel khatlekhat i opton lo ciengin TOPA in nang le kei kikalah ei cing tuoh taheh.

⁵⁰Ka tanute na bawlsiet a, ahi sihle ka tanute banah zi na lah be leh ei tawh koima a opton sih vangin nang le kei kikalah i teci Pasien ahi lam khu phawh in,” a ci hi.

⁵¹Tua ciengin Laban in Jacob kungah, “Keima in nang le kei kikala ka phusa tami suongcien le khuom en in.

⁵²Nangma ang susie dingin tami suongcien kalsanin na kungah kang pei lo nading, nang zong kei ei susie dingin tam suongcien kalsanin kei kunga nang pei lo nadingin tami suongcien teci ahi a, tami khuom zong teci ahi hi.

⁵³Abraham’ Pasien le Nahor’ Pasien - amate pate’ Pasien- in eite kikalah thu khen taheh,” a ci hi. Tuaci’n a pa Isaac’ Giinpa[114] tawh Jacob a kiciem hi.

⁵⁴Tuale Jacob in a sangna munah biehpiehna lui a, an ne dingin a sanggamte hlan hi; tuale amate in an a ne vua, zan tungtawnin muoltung gamah a taam uhi.

⁵⁵[115]Zingmawng tungin Laban tho a, a tute le a tanute tawpin thupha a pie hi; tua ciengin ama pei-in inn lamah a kilekia hi.