Read Zou PIENCILNA 32 Bible Online

PIENCILNA 32 - Zou bible

PIENCILNA 32

¹Jacob zong a lampi-ah peisuoh a, Pasien’ vantung mite in ama na dawn uhi;

²Jacob in tuate a mu bepin, “Tami khu Pasien’ giephuol ahi hi!” a ci hi. Tuaci’n ama in khum mun pen Mahanaim[116] ci-in min a phuo hi.

³Jacob in a sanggampa Esau opna mun Edom gam Seir leitangah kamtaite a masangah sawlin

⁴amate thu a hil a, “Ka pu Esau kungah tam bangin na va gen ding uhi: Na nasempa Jacob in, ‘Laban tawh pemta bangin ka teng a, tu dong ciengin ka om hi;

⁵tuale keima in bawngtang, laa, ganhon, sila pasal, sila numeite ka nei hi; na muna-ah maipha ka mu thei nadingin ka pu kungah a gen dingin kang sawl hi, ci hi,’ va ci un,” a ci hi.

⁶Jacob kungah kamtaite a kilekia vua, “Na pu Esau kungah ka va pei ta vua, tuale nang ang dawn dingin ama ang pei-in mihing zali ang zawpi hi,” a ci uhi.

⁷Tua ciengin Jacob nahpitahin zau-in a lungkham hi; tuale ama’ zawpite, ganhonte, bawnghonte, le kalaohte pawl ni-in khen a,

⁸“Esau ang pei-in pawlkhat a suhsiet leh, a kinuasie pawlkhat suohta ding hi,” ci-in a ngaisun hi.

⁹Tuale Jacob in, “Aw, ka pa Abraham’ Pasien le ka pa Isaac’ Pasien, ka kungah, ‘Na gam le na tanaute kungah kilekia in, na tungah sil hoi kang bawl ding hi,’ ei ci TOPA aw,

¹⁰na nasempa kunga nei lahsa itna kip le muontahna vannuoi lahah a neupen khat zong a tang dingin ka kilawm vawt sih hi; azieh pen keima in ka ciengkhut beh tawh tami Jordan ka kantan hi. Tu-in pawl ni ka suoh ta uhi.

¹¹Ka sanggampa’ khut, Esau’ khut sung panin ei hun in, ci-in kang thum hi, azieh pen ama ka giing hi; ama ang pei-in, kote zosie, nute, naupangte tawh ka unpi-un ei that thei ding hi.

¹²Hinanle nang in, ‘Na tungah sil hoi kang bawl ding a, na suonlehlahte tuipi senel za-in a tam sengin a kisim thei loin ka bawl ding hi,’ nei ci hi,” a ci hi.

¹³Tuaci’n khum zanin tua munah ama gieh a, a neisa lah panin a sanggampa Esau adingin letsong

¹⁴keelpi zani le keeltang sawmni, tuupi zani le tuutang sawmni

¹⁵kalaoh nawisuh sawmthum le a note, bawngpi sawmli le bawngtang sawm, laapi sawmni le laatang sawm a la hi.

¹⁶Ama in a nasemte khut sungah tam teng amau’ hon cietin pie a a nasemte kungah, “Ka masangah pei unlen ganhonte honkhat le honkhat kihalsah un,” a ci hi.

¹⁷Ama in a masapen pa kungah, “Ka sanggampa Esau tawh na kituo vua, ‘No koi-a’ na hi uh ahei? Hei-a haw sawm na hi uh ahei? Na masang vua om tuate koi-a’ ahei?’ ci-a ang dawh leh,

¹⁸note in, ‘Tam teng pen na nasempa Jacob-a’ ahi hi; tamte ka pu Esau kungah letsonga ang kihlah ahi hi; tua tham loin ama ka nua vuah om hi,’ ci-un,” ci-in thu a hil hi.

¹⁹Ama in tua ma bangin a ni na, a thumna, le gantahon a zuite zosie kungah, “Esau tawh na kituo ciengun a kibangin na gen ding vua,

²⁰note in , ‘Tua tham loin na nasempa Jacob ka nua vuah om hi,’ na ci ding uhi,” ci-in thu a hil hi. Azieh pen ama in, “Ka masanga a pei letsong tawh ama ka lungdamsah zo kha ding a, tua zaw ciengin a mai ka mu thei ding hi,” ci-in ngaisun hi.

²¹Tuaci’n a mai-ah letsongte a peisah hi; khum zanin giephuol ah ama a gieh hi.

²²Khum zan ma-in ama tho-in a zi nite, a nasem numei nite, le a tapa sawm le khatte zawpi-in Jabbok tanmun a kantan hi.

²³Ama in amate zawpi-in luigal a kaipi a, tua ma bangin a neisa zosie a galkaisah hi.

²⁴Ama guohin Jacob a om hi; tuale zingmawng khuovah dongin mi khat in ama a buon hi.

²⁵Tua mipa in Jacob a zaw lo lam a thei ciengin, ama in a khelgu a suhpieh hi; tua mipa tawh a kibuon ziehin Jacob’ khelgu a kilawi hi.

²⁶Tua ciengin ama in, “Khuovah ding hi ta, ei hla in,” a ci hi. Ahi vangin Jacob in, “Thupha nei pieh sih leh kang hla sih ding hi,” a ci hi.

²⁷Tuaci’n ama in a kungah, “Na min bang ahiei? “ a ci hi. Tuale ama in, “Jacob,” a ci hi.

²⁸Tua ciengin mipa[117] in, “Na min Jacob kici nawn loin Israel[118] kici ta ding hi, azieh pen Pasien le mite[119] tawh kibuonin na zo hi,” a ci hi.

²⁹Tua ciengin Jacob in ama dongin, “Hepina tawh na min ei gen in,” a ci hi. Ahi vangin ama in, “Bang dinga ka min nei dawh ahei?” a ci hi. Tua munah ama in Jacob thupha a pie hi.

³⁰Tuaci’n Jacob in tua mun Peniel,[120] ci-in a min phuo hi. “Bangzieh ahei cile kimaituo-in Pasien ka mu zo a, hizongle ei kihinkhawi hi,” a ci hi.

³¹A khelgu a kilawi ziehin ama khelbai a, Peniel a kantan laitahin ni a suoh hi.

³²Tua ziehin tuni dongin Israel-te in khelkom tunga a om khel thagui a ne sih uhi. Ama in Jacob’ khelkom, a khel thagui a suhpieh zieh ahi hi.