Read Zou PIENCILNA 33 Bible Online

PIENCILNA 33 - Zou bible

PIENCILNA 33

¹Jacob khuodahin a en leh mi zali tawh ang zawhton Esau a mu hi. Tuaci’n ama in Leah, Rachel, le a nasem numei nite kungah a tate a khen hi.

²Ama in a masangah numei nasemte le a tate koi a, tua ciengin Rachel le Joseph a nukhia penin koi hi.

³A masang vuah ama pei-in a sanggampa kung a tun masangin sagi vei tuolah a kun hi.

⁴Ahi vangin ama dawn dingin Esau tai a, ama pomin ngawngkawi-in a nam vatuh a, tuaci’n a kap uhi.

⁵Esau a khuodahin numeite le naupangte a mu ciengin ama in, “Nang zawpi tamte khu koi ahi vuoi?” a ci hi. Jacob in, “Pasien in lungsietna tawh na nasempa a pieh tate ahi hi,” a ci hi.

⁶Tua ciengin nasem numeite le a tate in nehin a kun uhi;

⁷tua ma bangin Leah le a tate zong a kung nehin a kun uhi. A nukhia penin Joseph le Rachel in nehin a kun uhi.

⁸Esau in, “Ka kituopi tami a honte zosie bang na cinopna ahiei?” a ci hi. Jacob in, “Ka pu’ maipha sui na ding ahi hi,” a ci hi.

⁹Ahi vangin Esau in, “Ken zong a kicing tahin nei ing, ka sanggampa aw, nang’ neite nangma adingin kikep kon in,” a ci hi.

¹⁰Jacob in, “Hi lo hi; na maipha ka mu leh nei hepina tawh ka khut panin ka letsongte ei sanpieh in; bangzieh ahei cile na maitang ka mu khu Pasien’ maitang mu ka bang tahtah vawt hi. Azieh pen nang in tam bang angvanna tawh kei nei sangzo hi

¹¹Nei hepina tawh na kunga kang tawi ka letsong ei sanpieh in. Bangzieh ahei cile Pasien in ei lungsiet mama a, ka tulmaw zosie ka nei hi,” a ci hi. Tuaci’n ama in a kut tentun ziehin tuate a sanpieh hi.

¹²Tua ciengin Esau in, “I lampi zuonin khuolzin vai. Nangma tawh hing zawhton vang,” a ci hi.

¹³Hizongle Jacob in ama kungah, “Naupangte a hat lo lam ka pu in na thei a, tuuhonte, ganhonte, bawnghon le keel hon nawitep laite keima’ kep ding ahi hi; ni khat kinaw hawl seng leh ganhon zosie a si sieng ta ding hi.

¹⁴Na nasempa mai-ah ka pu na pei inlen, ka mai-a ganhonte kalsuon le naupangte kal tawh dan kituohin Seir-a ka pu kung kang tun dongin damdamin kang peipi ding hi,” a ci hi.

¹⁵Tuaci’n Esau in, “Kang zawpi mi pawlkhat kang nuasiepieh ding hi,” a ci hi. Ahi vangin Jacob in, “Kei tungah ka pu bang dinga hici migit sengseng na hei?” a ci hi.

¹⁶Tuaci’n khum ni-in Seir lamah Esau a kilekia hi.

¹⁷Hizongle Succoth[121] lamah Jacob khuolzinin ama adingin inn khat lam a, a ganhonte adingin hlamphengte a bawl hi; tua ahi ziehin khum mun pen a min Succoth, kici hi.

¹⁸Paddanaram pana peina lampi, Canaan gam sunga om Shechem khuopi-ah damle bitin Jacob a tung hi; tuale ama in tua khuopi mai-ah phuol a sat hi.

¹⁹Shechem’ pa Hamor’ tapate kung panin a puonbuh lamnasa leitang pen dangka[122] zakhat tawh a lei hi.

²⁰Ama in khum munah maitam khat tung a, a min El-Elohe-Israel[123] a phuoh hi.