Read Zou PIENCILNA 35 Bible Online

PIENCILNA 35 - Zou bible

PIENCILNA 35

¹Pasien in Jacob kungah, “Dingin Bethel-ah peito inlen khum munah va teng in. Na sanggampa Esau kung panin na taimang lai-in na kunga ang kilah Pasien adingin khum munah maitam khat bawl in,” a ci hi.

²Tuaci’n Jacob in a innkuonpite le a zawpi zosiete kungah, “Na lah vua om gamdang pasien-te paimangin no le no kisiensuo unlen na puonsilte uh khel un;

³tua ciengin ka lungkham huna ei dawng, ka peina cintenga ei ompi Pasien adingin khum munah maitam khat ka bawl thei nadingin Bethel-ah peito vai,” a ci hi.

⁴Tuaci’n amate in a nei uh gamdang pasien-te zosie, le a bila a ba uh bilbate, Jacob tungah a pie uh hi. Jacob in Shechem khuo gei gangpi sing phungah tuate a phuol hi.

⁵Amate khuolzinin a pei laitahun koima in a nuadel lo nadingin Pasien kung panin a kimvel vua om khuopite tungah zauhuoina khat tung hi.

⁶Jacob le a zawpi mi zosie Canaan gam sunga om Luz (Bethel) ah a tung vua,

⁷ama in khum munah maitam khat lamin a min Elbethel,[125] phuo hi. Azieh pen a sanggampa kung panin ama a taimang lai-in tua mun ama kungah Pasien mama a kilang hi.

⁸Rebekah a cingnu Deborah si a, Bethel hlanglam gangpi sing nei khatah kivui hi. Tuaci’n khum mun Allonbakuth,[126] kici hi.

⁹Paddan-aram pan a pei ciengin Jacob kungah Pasien kilangkia a, ama thupha a pie hi.

¹⁰Pasien in ama kungah, “Na min Jacob ahi hi; Jacob ang kici nawn sih ding hi, na min Israel hi ta ding hi,” a ci hi. Tuaci’n ama Israel kici hi.

¹¹Pasien in ama kungah, “Keima Vanglien Pasien ka hi hi.[127] Pung inlen tampi pha in; na sung panin minam khat le minam honkhat pieng ding a, na sung panin kumpite pieng ding hi.

¹²Abraham le Isaac tunga ka pieh tua leitang nang kang pie ding a, nang zaw cienga na suonlehlahte tungah zong tua leitang ka pie ding hi,” a ci hi.

¹³Tua ciengin ama tawh a kihona mun panin Pasien a peito hi.

¹⁴Jacob in ama tawh a kihona munah suong khuom khat a phut hi; tuale ama in tua tungah dawn thei biehna a sung hi, tua tungah sathau zong a sung hi.

¹⁵Tuaci’n Jacob in Pasien tawh a kihona mun pen a min Bethel, a ci hi.

¹⁶Tua ciengin Bethel panin amate khuol a zin uhi; Ephrath panin a gamla sim lai mun a gei ciengun Rachel a nau suo hun tung a, takei-in a gim mama hi.

¹⁷Ama nu takei-in a thuohla mama laitahin naudom nu in ama kungah, “Zau sin. Azieh pen tu-in nang in tapa adang khat na nei ding hi,” a ci hi.

¹⁸Tua nu’ hlagau a peikhiet laitahin, (bangzieh ahei cile ama a si hi) tua nu in a min Benoni[128] ci-in phuo hi; ahi vangin a pa in ama’ min pen Benjamin[129] hisah hi.

¹⁹Tuaci’n Rachel si-in Ephrath (Bethlehem) zuotna lampi-ah kivui a,

²⁰Jacob in tua nu’ hankhuh ah khuom khat phut hi; tuni dongin khum muna om pen Rachel’ han muolsuong ahi hi.

²¹Israel in a khuolzin zom a, Eder tausang galkhat ah a puonbuh a lam hi.

²²Khum gamah Jacob a ten laitahin Reuben in a pa’ meinu Bilhah luppi hi; tua thu Israel in a za hi. Tu-in Jacob’ tapate sawm le ni ahi hi.

²³Leah’ tapate: Reuben (Jacob’ ta masa pen), Simeon, Levi, Judah, Issachar, le Zebulun ahi hi.

²⁴Rachel’ tapate: Joseph le Benjamin ahi hi.

²⁵Rachel’ nasem nu Bilhah’ tapate: Dan le Naphtali ahi hi.

²⁶Leah’ nasem nu Zilpah’ tapate: Gad le Asher ahi hi. Tam teng pen Paddan-aram gama a nei Jacob’ tapate ahi hi.

²⁷Abraham le Isaac pemta banga a tenna Mamre, ahi sihle Kiriath-arba (tua pen Hebron)-a om a pa Isaac kungah Jacob a va haw ta hi.

²⁸Tu-in Isaac’ khan kum pen kum za le kum sawmgiet ahi hi.

²⁹Tuale Isaac in a hu nukhia pen a sang hi; ama vuoi-in a kum tam a, a mite kungah a kigawm hi; a tapa Esau le Jacob in ama a vui uhi.