Read Zou PIENCILNA 37 Bible Online

PIENCILNA 37 - Zou bible

PIENCILNA 37

¹A pa pemta banga a tenna Canaan gamah Jacob a teng hi.

²Tami pen Jacob’ innkuon tangthu ahi hi. Kum sawm le kum sagi pha ta ahi ziehin Joseph in a sanggamte tawh tuuhonte a cing hi; ama pen a pa’ zite tapate ahi Bilhah le Zilpah hu ahi hi; Joseph in amau’ hoi lona thu a pa kungah tut hi.

³Tu-in Israel in a teh zaw-a a nei tapa ahi ziehin a tapa dang teng sangin Joseph a itzaw a, ama ading puontuol bansau[146] khat a khuipieh hi.

⁴Ahi vangin a pa un a sanggam zosie teng sangin Joseph a it zawh lam a thei bepun ama a muda vua, hoitahin zong a hopi thei va-ia sih uhi.

⁵Joseph in khatvei mang khat a man a, a sanggamte kungah a mang a va gen taleh ama a muda semsem uhi.

⁶Ama in a kung vuah, “Tam ka mang mat ngai un:

⁷Eite in lolai-ah buphai i lomhen vua, tuale thakhatin ka buphai ang tho-in ang ding tang hi; tua ciengin tua kimah na buphaite uh ang kikhawm a, ka buphai mai-ah a kun uhi,” a ci hi.

⁸A sanggamte in ama kungah, “Kote ei uh tahtah ding na hi amah? Ko tunga uhna aana ang nei tahtah ding na hi amah?” a ci uhi. Tuaci’n a mang le a thugen teng ziehin ama a muda semsem uhi.

⁹Ama in mang adang khat mankia a, tuale ama’n zong a sanggamte kungah tua a mang a gen a, “En un, mang adang khat ka man hi. Ka mai-ah ni, hla, le aasi sawm le khatte a kun uhi,” a ci hi.

¹⁰Ahi vangin ama in a pa le a sanggamte kungah tua a mangmat a gen leh a pa in ama a phawhsie a, “Tami na mang mat khu a bangci mang bep ahiei? Na mai-ah kei le na nu le na sanggamte a tuolkun dinga ang pei tahtah ding ka hi uh amah?” a ci hi.

¹¹Tuaci’n a sanggamte in ama a haza vua, ahi vangin a pa in a lungsim sungah tam thu a ciemte hi.

¹²Tu-in a pa uh’ tuuhonte cing dingin Shechem gei-ah a sanggamte a pei uhi.

¹³Tuale Israel in Joseph kungah, “Shechem ah na sanggamte in tuuhonte cing hi lo uh amah? Hing pei in, amate kungah kang sawl ding hi,” a ci hi. Tuale ama in, “Tanah om ing,” a ci hi.

¹⁴Tuaci’n ama kungah, “Tu mama-in pei inlen, na sanggamte le tuuhonte a dam na vuoi mah va en tan; ka kungah ei genkia in,” a ci hi. Tuaci’n Hebron kuom panin ama a sawl hi. Shechem ah ama a tung a,

¹⁵gamlah ah a vahvaih mi khat in ama a mu hi; tua mipa in ama kungah, “Bang sui na hei?” ci-in a dong hi.

¹⁶Ama in, “Ka sanggamte sui ka hi hi,” a ci hi; mipa in, “A tuuhonte uh hei sunga a cin uh ahei, hepina tawh ei gen in,” a ci hi.

¹⁷Tua mipa in, “Pei zo ta uh, azieh pen, ‘Dothan-ah pei vai,’ a kici uh ka za hi,” a ci hi. Tuaci’n Joseph in a sanggamte a nua zui a, Dothan ah amate a mu hi.

¹⁸Amate in a gamlapi panin ama a galmu vua, ama kung a tun masangun ama tha na sawm uhi.

¹⁹“Tanah mangman pa hing pei ta ei,” ci-in khatlekhat a kiho uhi.

²⁰Tu-in hing pei un, ama thatin dum sung khatah khiesuh vai; tua ciengin gamsa khat in ama valtum ta ci vai-in, a mangmatte bang ang suoh ngel ei en phot vei,” a kici uhi.

²¹Ahi vangin Reuben in tua thu a zah ciengin ama in, “A hinna lahpieh lieng sih vai,” a ci a, tuaci’n amate khut sung panin ama a hunkhie hi.

²²Amate khut sung panin ama hunkhie-in a pa kungah tunpikia thei kha leng ci a ngaisutna tawh Reuben in a kung vuah, “Sisan suohsah sih un. Senel gama tami dum sungah ama khie unlen, ahi vangin ama tungah bangma na khut nga sih un,” a ci hi.

²³Tuaci’n a sanggamte kungah Joseph a tun ciengin a puontuol bansau[147] a na sutpieh uhi;

²⁴tuale ama kai-in dum sung khatah a khiesuh uhi. A dum pen a hawm ahi hi; a sungah tui om lo hi.

²⁵Tua ciengin amate an ne dingin a to uhi. A khuodah uleh Gilead panin a kalaohte utawh singnai, lingsi, le myrrh gimnamtuite, Egypt gama a puosuh dinga a pei Ishmael khuolzinte a mu uhi.

²⁶Tua ciengin Judah in a sanggamte kungah, “I sanggampa thatin ama’ sisan phuol leih i lemlaw uh bang pen ahei?

²⁷Hing pei un, Ishmael-te kungah ama zua vai. Ama tungah i khut nga sih vai, bang ding ahei cile ama i sanggampa, eima’ cilesa ahi bo hi,” a ci hi. Tuale a sanggamte a thukim uhi.

²⁸Midian sumbawlte in a nawh uh ciengin amate in Joseph kaito-in dum sung panin a domto vua, Ishmael mite kungah ngun shekel sawmni tawh a zua uhi. Tuale amate in Egypt gamah Joseph a peipi uhi.

²⁹Dum sungah Reuben peikia a, tuami dum sungah Joseph a op lo lam ama in a thei ciengin a puon a ehmal hi.

³⁰A sanggamte kungah kilekia-in, “Naupang pa om nawn lo hi; kei hei lamah ka kihei ta diei?” a ci hi.

³¹Tua ciengin amate in Joseph’ puon la-in keel khat a go vua, sisan lahah tua puontuol a die uhi.

³²Amate in a pa kungah tua puontuol bansaupi[148] a puoh vua, “Tam hing mu ung e; na tapa’ puontuol ahile ahi lo kivel aw,” a ci uhi.

³³Ama in a thei pai a, “Ka tapa’ puon ahi na khula! Gamsa gilo khat in ama netum zo hi; Joseph a ki-ehmal tahtah lah ahi ta’n,” a ci hi.

³⁴Tua ciengin Jacob in a puon ehmal a, la-ip puon a kawngah tengin ni tampi sung a tapa a kaa hi.

³⁵A tapate le a tanu zosie in ama henep ding a hanciem vangun ama kihenem zo lo hi; tuale ama in, “Hi lo hi, ka kaa kawmin ka tapa kung Misikhuo ah ka pei ding hi,” a ci hi. Tua bangin ama ziehin a pa a kap hi.

³⁶Tua kikal sungin Midian-te in Pharaoh khut nei-a uliente lahah khat ahi kumpi inncing galkapmangpa Potiphar kungah Joseph na zua uhi.