Read Zou PIENCILNA 38 Bible Online

PIENCILNA 38 - Zou bible

PIENCILNA 38

¹Khum hun lai-in a sanggamte kung panin Judah a peisuh a, Adullam mi Hirah kici pa khat kungah a teng hi.

²Khum munah Judah in Canaan mi khat’ tanu Shua mu hi; tua nu tawh ama kinungin a luppi hi.

³Tua nu gai-in tapa khat nei a, a min Er phuo hi.

⁴Tua nu gaikia-in tapa khat nei a, ama in a min Onan phuo hi.

⁵Tua nu in tapa khat nei leuleu a, a min Shelah phuo hi. Ama a pien laitahin Chezib gamah tua nu[149] a om hi.

⁶Judah in a ta masa Er adingin zi khat a lahpieh hi; tua nu’ min Tamar ahi hi.

⁷Ahi vangin TOPA muna-ah Judah’ ta masa Er khu a gilo a, TOPA in ama that hi.

⁸Tua ciengin Judah in Onan kungah, “Na sanggampa’ zi luppi inlen, tua nu tungah pasal’ sanggampa tavuon sem in; na sanggampa adingin suonlehlah piengsah in,” a ci hi.

⁹Ahi vangin Onan in tate pen ama ading ahi lo lam thei ahi ziehin a sanggampa’ zi a luppi sielin a sanggampa’ khang a kizop lo nadingin a bawtui tuolah a buosuh hi.

¹⁰TOPA muna ah ama’ gamtat a lungkimhuoi lo ziehin ama zong a that hi.

¹¹Tua ciengin Judah in a monu Tamar kungah, “Ka tapa Shelah a gol masangsie na pa’ inn ah meigongin va om in,” a ci hi. Azieh pen a sanggamte bangin ama zong a si ding a zau hi. Tuaci’n a pa’ inna om dingin Tamar a pei hi.

¹²Hun phabep khat zaw ciengin Judah’ zi, Shua’ tanu a si hi; Judah a dan a hun a ven ciengin[150] Adullam mi a guolpa Hirah tawh Timnah khuo-a ama’ tuumul heute kungah a peito hi.

¹³“Tuumul heu dingin Timnah ah na innpipa ang peito hi,” ci-in Tamar kungah a kigen ciengin,

¹⁴a meigong puonte suo-in a lu puon khu-in ama kituom a, Timnah khuo peina lampi gei-a om Enaim khuo lutna munah ama na to hi. Azieh pen ama in Shelah a khan kihlit lam a thei a, hizongle ama tawh a kinungsah tuom sih uhi.

¹⁵Judah in ama a mu bepin ama in a mai a na tuom ziehin numei pahtat ding khatin a ngaisun hi.

¹⁶Lampi gei ama kungah va pei a, a monu ahi lam a thei lo ziehin, “ Hing pei in, kei tawh lumton vai,” a ci hi. Khum nu in, “Kei nei luppi thei nadingin bang nei pie diei?” a ci hi.

¹⁷Ama in dawng a, “Ka ganhonte lah panin ganno khat hing puoh vang,” a ci hi. Tuale ama in, “Tuami nei puoh masangin vankhap khat nei pie diei mah?” a ci hi.

¹⁸Ama in, “Bang vankhap kang pie diei?” a ci hi. Tua nu in a dawng a, “Na seal le a awna khau le na khut sunga om na ciengkhut,” a ci hi. Tuaci’n ama in tua teng a pie a, ama tawh lumtonin tua nu a gai hi.

¹⁹Tua ciengin tua nu dingto-in a peikhie a, a kikhuna puon suodawhin a meigong puonte a silkia hi.

²⁰Numei nu tung panin vankhap lakia dingin Judah in Adullam mi a guolpa a ganno tawh a sawl ciengin ama in tua nu a mu zo ta sih hi.

²¹Ama in khuo mite kungah, “Enaim lam gei biehinnpi sunga numei pahtat nu hei sunga om ahiei ?” ci-in a dong hi. Amate in, “Tami munah numei pahtat koima om ngai sih,” a ci uhi.

²²Tuaci’n Judah kungah ama kilekia a, “Ama ka mu sih hi; tua banah khuo mite in, ‘Tami munah numei pahtat om ngai sih,’ ei ci bo vuh,” a ci hi.

²³Judah in a dawng a, “Ka vante ama-a’ bangin kem ta mai heh. Tua hi si leh ei kinuisan ding hi; ken tami ganno ka puoh a, nang in tua nu na mu lo lam na thei hi,” a ci hi.

²⁴Tua zaw hla thum bang ciengin Judah kungah, “Na monu a pahtat ahi bo hi; tham loin a pahtatna zieha gai ahi hi,” ci-in kigen hi. Tuale Judah in, “Kaiphit unlen ama kihaltum heh,” a ci hi.

²⁵Ama a kipusuopi laitahin ama in a innpipa kam vaihlah a, “Kei tam teng a nei pa tawh kigai ka hi hi,” a ci hi. Ama in, “Hepina tawh ciemte in, tami seal le a awna khau le ciengkhut, tam teng koi-a’ ahiei?” a ci hi.

²⁶Tua ciengin Judah in tua vante ama-a’ ahi lam a thei a, “Ka tapa Shelah tawh ka kinunsah lo lang kalsie ama pen kei sanga a thudih zaw ahi hi,” a ci hi. Ama pen tua nu tawh lumton kia nawn lo hi.

²⁷Tua nu a kinisuo hun a tun ciengin a naubu sungah takop a om hi.

²⁸Ama takei-in na a sah laitahin khat in a khut a dawhsah hi; tuale naudom nu in vau sandup khat la-in a khut tungah khi a, “Tami khu ang dawh masa ahi hi,” a ci hi.

²⁹Hizongle ama in a khut a nuakaih zaw lienin a sanggampa a suoh hi; tuale ama in, “ Nang adinga a vang na kibawltawm!” a ci hi. Tua ahi ziehin ama’ min Perez[151] kiphuo hi.

³⁰Tua ciengin a khut tungah vauzam dupsan kikhisa-in a sanggampa a suoh hi; ama’ min Zerah[152] kiphuo hi.