Read Zou PIENCILNA 39 Bible Online

PIENCILNA 39 - Zou bible

PIENCILNA 39

¹Tu-in Egypt ah Joseph kipeipi suh a, khum muna a peipi suh ahi Ishmael-te kung panin Egypt mi, Pharaoh’ ulien inncing galkapmangpa Potiphar in ama na lei hi.

²Joseph tawh TOPA a omton a, a lawcing mi khat a suoh hi; Egypt mi a pupa’ inn ah ama a om hi.

³TOPA in ama ompi a, a khut tawh a bawlsa zosie mavangsah hi, ci-in a pupa in a mu hi.

⁴Tuaci’n Joseph in a mai-ah maipha nga-in ama’ na a sem hi; ama in a innsungah a makai-in koi a, a neisa zosie a uhsah hi.

⁵A a innsung le a neisa zosie tungah vaisai-a a koi huna kipan Joseph ziehin TOPA in Egypt mipa’ innsung thupha a pie hi; innsung hitale lo sung hitale ama’ neisa zosie tungah TOPA’ thupha a tung hi.

⁶Tuaci’n ama in a neisa vannuoi Joseph khut sungah a ap sieng hi; khum munah a an neh ding simlo bangma lunghimawna a nei sih hi. Joseph ngaihbaangin melhoi hi.

⁷Hun khat zaw ciengin a pupa’ zi in ama zawlmit ha a, “Kei ei luppi in,” a ci hi.

⁸Ahi vangin ama in a niel a, a pupa’ zinu kungah, “En in, kei ziehin inn sungah ka pupa in lunghimawna kici bangma nei nawn loin a nei vannuoi ka khut sungah koi zo ta hi.

⁹Tami inn sungah ama kei sanga a lienzaw ahi tuon sih a, nang ama’ zi na hi ziehin nang khat ci simlo kei kung panin ama in a keptuom bangma khat beh a om sih hi. Tua ahi ziehin kei in bangci bangin tam bang gitlona lienpite bawlin Pasien tungah maw thei ding ka hei?” a ci hi.

¹⁰Ama in ni khat zaw ni khat Joseph a zawl vangin, ama tawh lupton ding hitale ama tawh opton ding hitale a thukim sih hi.

¹¹Ahi vangin ni khat, a nasep sem dingin ama inn sungah a lut a, tua inn sungah midang koima khat beh a op lo laitahin,

¹²tua nu in ama a puonin man a, “Ei luppi in!” a ci hi. Hinanle tua nu khut sungah a puon nuasie-in inn pulamah a taimang hi.

¹³A khut sungah a puon nuasie-in inn pulamah ama a tai khu tua nu in a mu bepin,

¹⁴a innkuonpite hlanin amate kungah, “En un, eite ei simmaw dingin ka pasal[153] in Hebrew mi khat i lah vuah ang tut hi! Kei tawh a lumton dingin ama ang lut a, kei zong nahpitahin ka kiko pai hi;

¹⁵ka aw sangsahin ka kiko a zah bepin ama in ka gei-ah a puon nuasie-in inn pulamah a taimang ta hi,” a ci hi.

¹⁶A pu inn a tun masangsie-in tua nu in a puon a kemcing hi.

¹⁷Tua nu in ama kungah tua thu ma a gen a, “Kei ei no dingin i lah vua nang tut Hebrew nasempa ang lut a, ahi vangin

¹⁸ka aw sangsahin ka kiko bepin ama in ka gei-ah a puon nuasie-in inn pulamah a taimang hi,” a ci hi.

¹⁹“Na nasempa in kei ei bawl dan tam bang ahi hi,” ci-in a zinu in ama kunga a thugen teng a pupa in a zah ciengin a hangzah gawp hi.

²⁰Tuale Joseph’ pupa in ama manin kumpipa’ thongkiete kikoina thong sungah ama a khum hi; tua thong sungah ama a om hi.

²¹ahi vangin Joseph tawh TOPA a omton a, ama tungah a itna kip a lah hi; ama in thongcing pa’ maipha a ngasah hi.

²²Thongcing pa in thong sunga om thongkie mi zosie Joseph’ et dingin ap a, khumi muna kisem zosie ama sepsa vive ahi hi.

²³TOPA in ama a oppi ziehin Joseph’ etna sunga a om poma thongcing pa in donin zong a nei vet sih hi; tuale a bawl na khat popo ah TOPA in a dau a peisah hi.