Read Zou PIENCILNA 40 Bible Online

PIENCILNA 40 - Zou bible

PIENCILNA 40

¹Tam zaw a sawt loin Egypt kumpipa’ haitawi pa le moh-em pa in a pu uh Egypt kumpipa a lungthahsah uhi.

²A ulien nite ahi haitawi makaipa le moh-em makaipa tungah Pharaoh lungthah a,

³Joseph kikhumna thong sung, inncing mangpa’ inn sungah ama gel a khum hi.

⁴Inncing mangpa in Joseph’ et dingin ama gel ap hi; tuale ama in ama gel a kem a, thong sungah ama gel bakhat sung kikhum hi.

⁵Thong sunga kikhum Egypt kumpipa’ haitawi pa le moh-empa in zan khatin a ni gelin mang a man tuoh vua, a mang uh a tuom tuoh le a mang’ khietna uzong a tuom tuoh ahi hi.

⁶Zingmawngin ama gel kungah Joseph a pei ciengin a lunggim-a om ama gel a va mu ta hi.

⁷Tuaci’n a pu’ inn sunga ama tawh a kikhumton Pharaoh’ uliente kungah, “Bang dinga tuni-in damai na hi uh ahei?” a ci hi.

⁸Ama gel in, “Mang ka man vua, tuate khie thei ding mi koima a om sih hi,” a ci uhi. Tuale Joseph in ama gel kungah, “Mang khieh theina Pasien-a’ hi lo amah? Kei kungah tuate ei gen un, kang thum hi,” a ci hi.

⁹Tuaci’n Joseph kungah haitawi makaipa in a mang gen a, ama in, “Ka mangin ka mai-ah lenggui khat a om a,

¹⁰tua lenggui tungah a bazam thum om hi. Ang sel behin ang paa pai a, a bawhte lengga min hi pai hi.

¹¹Ka khut sungah Pharaoh’ hai a om hi. Lenggate ka la a, tuate a tui hlawhin Pharaoh khut sungah tua hai ka koi hi,” a ci hi.

¹²Tua ciengin Joseph in ama kungah, “A khietna tam bang ahi hi: A bazam thumte ni thum ahi hi;

¹³ni thum sungin Pharaoh in na lu hing phong ding a, na za-ah ang koikia ding hi; nang in ama’ haitawi na hi lai-a na bawl ngai bang lienin ama khut sungah Pharaoh’ hai na koikia ding hi.

¹⁴Ahi vangin na tungah thu ang hoi leh kei ei mangngil sin; hepina tawh Pharaoh’ kungah ka thu ei genpiehin kei tungah hing migi inlen, tuaci’n tam mun panin kei ei ladawh in,” a ci hi.

¹⁵Bangzieh ahei ci le, a tahtahin kei pen Hebrew-te’ gam pana ei na kigu ka hi hi. Amate in tami thong miel sunga ei khum valia nadingun bangma ka bawl sih hi,” a ci hi.

¹⁶Moh-em makaipa in Joseph mang khieh a hoi lam ahi hi, ci-a a mu ciengin ama in Joseph kungah, “Kei zong mang khat ka man hi: Ka lu tungah mohlaw thum om a,

¹⁷tua law tungta pen sungah Pharaoh adingin a ki-emsa an namkim om a, ahi vangin ka lu tunga law sung panin vate in tuate a ne uhi,” a ci hi.

¹⁸Joseph in dawng a, “A khietna tam bang ahi hi: Law thumte, ni thum ahi hi;

¹⁹ni thum sungin Pharaoh in na lu hing phong ding a- nang tung panin! - sing dawn khatah hing khai-in vate in na sa a ne ding uhi,” a ci hi.

²⁰A ni thum ni, Pharaoh’ suo ni-in ama’ nasemte zosie adingin pawi khat bawl a, tuale ama in nasemte lahah a haitawi makaipa’ lu le a moh-empa’ lu a phong hi.

²¹Ama in haitawi makaipa pen ama’ haitawina mun ma-ah koikia a, Pharaoh’ khut sungah a hai a koi hi;

²²ahi vangin Joseph’ khiet bangin ama in moh-em makaipa a khailia hi.

²³Ahi vangin haitawi makaipa in Joseph phawh kha nawn lo a, ama a mangngil ta hi.