Read Zou PIENCILNA 41 Bible Online

PIENCILNA 41 - Zou bible

PIENCILNA 41

¹Tua zaw kum ni bih a cin ciengin Pharaoh in mang man a, a mangin Nile gun gei-ah a din laitahin,

²Nile gun panin a zol thau sepsop bawngpi sagi pusuoh a, phai lopate a mai uhi.

³Tua ciengin Nile gun sung panin a melsie le a gawngtam bawngpi dang sagi pusuoh a, Nile gun gei-a bawngpi dangte kungah a ding uhi.

⁴A melsie le a gawngtam bawngpi sagite in a thau a zol sepsop bawngpi sagite a netum uhi. Tuale Pharaoh khanglo hi.

⁵Tua ciengin ama kimu-in a ni veina mang a mankia hi; a tahsa a hoi buvui sagi kung khatah vui hi.

⁶Tua ciengin nisuona hui in a semdaang gawp buvui hawm sagi a po hi.

⁷Buvui hawmte in a tahsa buvui sagite a valtum hi. Pharaoh a khanglo a, tua pen a mang a na hi hi.

⁸Zingmawngin Pharaoh a lungkham hi; tuaci’n ama in Egypt mitphiel siem zosie le a mipil zosie hlansah hi. Pharaoh in amate kungah a mang gen a, hinanle Pharaoh kungah a mang khie thei koima a om sih hi.

⁹Tua ciengin haitawi makaipa in Pharaoh kungah, “Tuni-in ka khielnate ka phawhkia hi.

¹⁰Khatvei lai-in Pharaoh, a nasemte tungah lungthah a, kumpi inncing galkap mangpa’ inn sungah kei le an huon makaipa ei khum hi.

¹¹Ka ni gelin zan khat thu-in mang ka man gel a, ka mangte gel in khietna a tuom tuoh nei hi.

¹²Kumpi inncing galkap mangpa’ nasem Hebrew tangval khat tawh ka omton vua, ka mang uh ka gen ciengun ka mang om dan tuoh uh dung zui-in ei khiehpieh hi.

¹³Ama in ka tung vua ei khiehpieh ma bangin ang tung mintah hi; kei ka za-ah ei kikoikia a, an huonpa pen kikhailum hi,” a ci hi.

¹⁴Tua ciengin Pharaoh in Joseph hlansah a, ama thong mielpi sung panin mallang tahin kipeipi hi. Ama in a khamul heu-in a puon a khel zaw ciengin Pharaoh mai-ah a pei hi.

¹⁵Pharaoh in Joseph kungah, “Mang khat ka nei a, tua ka mang a khie thei koima a om sih hi. Nang in mang kigen khat na zah leh tua mang na khie thei hi, ci-in ei kigen ka za hi,” a ci hi.

¹⁶Joseph in Pharaoh a dawng a, “Ka pilna tawh mang khie thei ka hi sih hi. Pharaoh tungah Pasien in a hoi lamin hing dawng na va,” a ci hi.

¹⁷Tua ciengin Pharaoh in Joseph kungah, “Ka mangin Nile gun gei-ah ka ding hi;

¹⁸Nile gun panin a thau a zol sepsop bawngpi sagi ang pusuoh a, phai lopate a mai uhi.

¹⁹Tua ciengin a hepi huoi, a melsie mama le a gawngtam adang bawngpi sagi ang pusuoh kia hi. Egypt gam sung zosie-ah tam bang ganhing melsie ka mu ngai nai sih hi.

²⁰A gawngtam le a melsie bawngpite in amasa bawngpi thau a zol sepsop sagite a netum vua,

²¹ahi vangin tuate a neh zaw ciengun, koima in a neh lam uh a thei sih hi. Bangzieh ahei cile amate a thau tuom sih vua, amasa lai bangin melsie lai veve uhi. Tua ciengin ka khanglo hi.

²²A ni veina[154] ka kimukia a, ka mangin buvui hoi sagi kung khat tungah a vui ka mu hi.

²³Nisuona lam hui in semdaangin a gawtasah buvui hawm sagi ang po hi;

²⁴tua buvui hawmte in buvui hoi sagite a valmang hi. Mitphiel siemte kungah ka gen a, ahi vangin ka kunga ei gencien thei koima a om sih hi,” a ci hi.

²⁵Tua ciengin Joseph in Pharaoh kungah, “Pharaoh’ mang tegel pen khat ahi bo a, a khietna kibang ahi hi; Pasien in Pharaoh kungah a bawl dingte ang lah zo hi.

²⁶A hoi bawngpi sagite, kum sagi ahi a, a hoi buvui sagite pen kum sagi ma ahi hi. A mang khietna a kibang ahi hi.

²⁷Tuate zaw cienga ang pusuoh a gawngtam le a melsie bawngpi sagite khu kum sagi ahi a, nisuona lam huipi in a semdaang buvui hawm sagite pen kielpi kum sagi ahi hi.

²⁸Pharaoh kunga kang gen bangin Pasien in Pharaoh kungah a sil bawl ding ang lah zo hi.

²⁹Egypt gam sung zosie-ah kum sagi sung an kihau ding hi.

³⁰Tuate zaw ciengin kum sagi kielpi tung ding a, Egypt gam sunga hauna zosie kimangngil ding hi; tua kielpi in gam sung teng a netum ding hi.

³¹A nuazui kielpi a natsiet seng ziehin gam sung hau hunlaite a kithei kha ta sih ding hi.

³²Pharaoh’ mangmat a kithuop pen khu Pasien’ sesa hi, a cinopna hi a, Pasien in bakhat sungin ang tungsah ding hi.

³³Tua ahi ziehin tu-in Pharaoh in mi pilvang le misiem khat kitel inlen, Egypt gam sung vaisai dingin koi in.

³⁴Pharaoh in gam sungah makaite se inlen, an a kihauh kum sagi sungin Egypt leitanga pieng ante nga-a-khat la in.

³⁵Ang tung ding tami kum hoi sunga an zosie amate khawmsah inlen, neh dingin khuopite sunga Pharaoh’ uhna nei-a khuopite sungah kholsahin kemcingsah in.

³⁶Tua an pen kielpi zieha gam sung a siet lo nadingin Egypt gam sunga ang tung ding kum sagi kielpi dal nadinga a kikoicing an hi ding hi,” a ci hi.

³⁷Tami a thugel dan pen Pharaoh le a nasem zosie in hoi a sa uhi.

³⁸Pharaoh in a nasemte kungah, “ Ama sunga Pasien’ hlagau a opna, tam bang midang i mu zo ding uh amah?” a ci hi.

³⁹Tuaci’n Pharaoh in Joseph kungah, “Pasien in nang tungah tam teng zosie pi hing lah zo ahi ziehin, nang banga mi pilvang le mi siem koima dang a om sih hi.

⁴⁰Ka inn sungah na vaihawm ding a, ka mite zosie in na thupieh bangin a gamta ding uhi; kumpi topha tawh kisai-in ahileh nang sangin kei ka lienzaw beh ding hi,” a ci hi.

⁴¹Pharaoh in Joseph kungah, “En in, Egypt gam zosie-ah thunei vaihawmin kang koi zo hi,” a ci hi.

⁴²Pharaoh in a suoikaina khutsip a khut panin sutin Joseph bunsah a, puon hoi tawh zemin a ngawngah kham khainieng khat a awsah hi.

⁴³Ama in sakol leeng a nina pen tungah ama’ nei-a pa a tosah hi; tuale a masanga pei mite kiko-in, “Khupdin un!” [155]a ci uhi. Tua ahi ciengin Egypt gam zosie tungah ama a vaihawmin a pang hi.

⁴⁴Tua tham loin Pharaoh in Joseph kungah, “Keima Pharaoh ka hi a, Egypt gam sung zosie-ah nangma’ thu loin koima khut lehin vai a hawm thei sih ding hi,” a ci hi.

⁴⁵Pharaoh in Joseph min Zaphenath-paneah a phuo hi. Ama in On khuo siempu Potiphera’ tanu Asenath tawh a kinungsah hi. Tuaci bangin Joseph in Egypt gam sungah thuneina nga hi.

⁴⁶Egypt kumpipa Pharaoh’ nasemin a lut lai-in Joseph kum sawm thum pha hi. Pharaoh’ opna panin Joseph pusuohin Egypt gam zosie-ah a zin kawikawi hi.

⁴⁷An hau kum sagi sungin leitang in an tampi a piengsah hi.

⁴⁸Egypt gamah kum sagi an a kihau[156] sungin ama in an zosie khawm a, khuopite-ah a khol hi; tuale ama in khuopi zosie-ah a kima lote sunga a pieng ante a khol hi.

⁴⁹Tuaci’n Joseph in tuipi-a senel za-in antang tampi khol a, te zawh ding ahi lo ziehin ama in a te ding a khawl vawt hi.

⁵⁰Kielpi a tun masangin Joseph in On khuo siempu Potiphera’ tanu Asenath tawh tapa ni a nei hi

⁵¹Joseph in a tapa masa’ min Manasseh[157] hisah hi. Ama in, “Pasien in ka hamsatna zosie le ka pa’ innkuon zosie ei mangngilsah hi,” a ci hi.

⁵²A nina pen Ephraim[158] a phuo hi. “Ka hamsietna gam sungah Pasien in keima a pung dingin ei siem hi,” a ci hi.

⁵³Egypt gamah kum sagi sung anhau hun a tawp ta hi;

⁵⁴tuale Joseph’ gensa bangin kum sagi kielpi kipan hi. Gam zosie-ah kielpi a tun vangin Egypt gam sung tengah an a om hi.

⁵⁵Egypt gam zosie a kiel ciengin Pharaoh kungah an ngenin mite a kiko uhi. Pharaoh in Egypt mi zosie kungah, “Joseph kungah pei un; ama ci bangin gamta un,” a ci hi.

⁵⁶Gambup ah kielpi a tunkim bepin Joseph in ansalte[159] phetin Egypt-te a leisah hi, azieh pen Egypt leitangah kielpi a nasie mama hi.

⁵⁷Tua tham loin leitung zosie-ah kielpi nasie mama ahi ziehin antang lei dingin leitung mi zosie Joseph kungah a pei uhi.