Read Zou PIENCILNA 42 Bible Online

PIENCILNA 42 - Zou bible

PIENCILNA 42

¹Egypt gamah an a op lam Jacob in a thei ciengin a tapate kungah, “Bang dinga khatlekhat hici kigum-et giagua mawh na hi uh ahei?

²“Egypt gamah an om hi, ci thu ka za hi; puhsi lo-a i hin thei nadingin peisuh unlen khum sungah an va lei ta un,” a ci hi.

³Tuaci’n an lei dingin Joseph’ tapa sawmte Egypt ah a peisuh uhi.

⁴Ahi vangin Jacob in a sanggamte tawh Joseph’ sanggampa Benjamin zawhsah lo hi, azieh pen ama tungah sietna a tun khah ding a zausah hi.

⁵Tua ahi ciengin Canaan gamah kielpi a tun ziehin Israel’ tapate zong an lei dinga pei mite tawh Egypt gamah a peiton uhi.

⁶Tu-in Joseph pen tua gam uhpa ahi a, gammi zosie tunga an zuapa ama ahi hi. Joseph’ sanggamte pei-in a maitang uh leilam ngatin a mai-ah a kun uhi.

⁷Joseph in a sanggamte a mu ciengin a thei a, hinanle geltate bangin bawlin a na khauh hopi hi. Ama in, “Hei pana hing pei na hi vuoi?” a ci hi. Amate in, “Canaan gam pana an lei dinga ang pei ka hi uhi,” a ci uhi.

⁸Joseph in a sanggamte a thei vangin amate in ama a thei ta sih uhi.

⁹Amate tawh kisai a mang matte Joseph in a phawh hi. Ama in a kung vuah, “Note pen thukante na hi uhi; gam sung gitnat lona en dinga ang pei hi ngel uteh!” a ci hi.

¹⁰Amate in a kungah, “Hi vawt sih ung ka pu aw; na silate an lei dinga ang pei ka hi bo uhi.

¹¹Ka unpi-un pa khat’ hlah ka hi bo vua, mi citah ka hi bo uhi; na nasemte thukante ka hi vawt sih uhi,” a ci uhi.

¹²Ahi vangin ama in a kung vuah, “Hi lo hi, gam sung gitnat lona en dinga ang pei hi bo uteh!” a ci hi.

¹³Amate in, “Kote, na nasemte sanggam pasal sawm le ni ka hi vua, Canaan gama mipa khat’ tate ka hi uhi; tu laitahin a tum pen ka pa uh tawh om a, hinanle khat pen om nawn lo hi,” a ci uhi.

¹⁴Ahi vangin Joseph in amate kungah, “Na kung vua kang gensa bang tehteh ahi hi; note, thukan ma hi bo uteh!

¹⁵Kang ze-et dan ding pen tam bang ahi hi: Pharaoh a hin ma bangin na nautum pen uh tam sunga ang pei sih poma leh tam mun panin na pei thei sih ding uhi!

¹⁶Note lah panin khat pei unlen na sanggampa uh hing zawpi ta un. Na sung vuah thuman a om amah, om lo ahei ci-in a kimu nading, na thugente uh a kikantel thei nadingin thong sungah no adang teng om tadi un; tua ahi sihle Pharaoh a hin ma bangin thukante na hi valon uhi,” a ci hi.

¹⁷Ama in thong sungah a unpi-un ni thum sung a khumcip hi.

¹⁸A ni thum ni-in Joseph in amate kungah, “Pasien ka zatah ziehin tam bangin gamta un, tua hile na hing ding uhi:

¹⁹Mi citah na hi uleh ang kikhumna uh tam munah na sanggamte uh khat omsah un. Na innkuonpite uh’ kieldo nadingin no adang teng in an puo-in pei ta unlen,

²⁰ka kungah na nau tumpen uh hing peipi un. Tua bang hi leh na thu gen uh a man hi ding a, na si sih ding uhi,” a ci hi. Tua banga bawl dingin amate a thukim uhi.

²¹Amate khatlekhat in, “Kasai, eite i hi leh i sanggampa uh tunga i bawl mawna dan a lokia i hi ta uhi; ama in eite kunga ang thum lai-in a lungkhamna i mu vua, hinanle a thu i ngai sih uhi. Tua ahi ziehin i tung vua tami lungkhamna ang tung ahi hi,” ci-in a kiho uhi.

²²Tua ciengin Reuben in amate dawng a, “Na kung vuah tua naupang pa bawlsiet lo ding hing gen hi lo ka mah? Ahi vangin ka thu nei mang sih uhi. Tuaci’n tu-in eite tungah ama’ sisan phu ang kingen ahi ta hi,” a ci hi.

²³Kamphen khat tungtawnin amate a hopi ziehin Joseph in amau’ ham a tel lam a thei sih uhi.

²⁴Tuale amate kung panin ama kihemin a kap hi. Tua ciengin peikia-in amate a hopi hi. Ama in Simeon tuom teelin a muna vuah khau tawh a khisah hi.

²⁵Tua ciengin Joseph in a ip dimun antang guonpieh a, a ip sung ciet vuah a sum uh koi piehkia-in, a khuolzinna vua a neh ding uh lam-an zong a guonpieh nadingun thu a pie hi. Amate dingin tam bangin kibawlpieh hi.

²⁶Amate in a laate uh antang puosahin a dingkhie uhi.

²⁷Amate lahah khat in giena mun vuah a laa an pie dingin a ip a hong leh a ip gongah a sum mu hi.

²⁸Ama in a sanggamte kungah, “Ka sum na kikoikia hi. Ka ip sungah om ei!” a ci hi. Tam thu ziehin lungkia-in citunin khatlekhat a ki-en vua, “Pasien in eite tunga ang bawl tami khu a bangci thu ahi tai?” a kici uhi.

²⁹Canaan gama a pa uh Jacob kung a tun ciengun, amate in a tung vua thu pieng zosie a sut vua,

³⁰“Tua gam a uhpa in ei khauh hopi a, tua gam thu a kandapin ei ngawh hi.

³¹Ahi vangin kote in a kungah, “Ko mi citah ka hi vua, thukante ka hi sih uhi.

³²Pa khat’ hlah sanggam pasal sawm le ni ka hi vua, ka sanggam uh khat a om nawn sih a, a tum pen tu laitahin ka pa utawh Canaan gamah a om hi,” ka ci uhi.

³³Tua ciengin tua gam a uhpa, tua mipa in ka kung vuah, ‘Mi citah na hina uh tam tawh kithei ding hi: Na sanggamte uh khat ka kungah nuasie unlen, na innkuonpite’ kiel do nadingin antang guong unlen, na lampi vuah pei un.

³⁴Na nautum pen uh keima kungah hing peipi ta unlen, note pen thukante hi loin mi citahte na hi zawh lam uh keima in kang thei ding hi. Tua ciengin na sanggampa uh kang suohta sah ding a, gam sungah sum na bawl thei ding uhi,’ ei ci hi,” ci-in a gen uhi.

³⁵Amate in a ip uh a buh sieng ciengun a van ciet vuah a sumip ciet uh na om mawh hi. Amate le a pa un a sum kitunte a mu ciengun a patau uhi.

³⁶Tuale a pa uh Jacob in a kung vuah, “Ka tate nei taansah zo ta uhi: Joseph lah om ta lo, Simeon lah om ta lo, tu-in Benjamin a peipi lai ding na hi uhi. Kei tunga tam teng zosie pi ang pieng ahi ta khula!” a ci hi.

³⁷Tua ciengin Reuben in a pa kungah, “Na kungah ama kang tutkia sih tah leh ka tapa tegel kitha ta’n. Ka khut sungah ama hing koi in. Na kungah ama kang tutkia ding hi,” a ci hi.

³⁸Ahi vangin ama in, “A sanggampa si a, ama beh om ta bo ahi ziehin note tawh ka tapa a peisuh sih ding hi. Na khuolzin nading uh lampi-ah ama in sietna bang lo khat hing tuoh kha mawh leh note in Misikhuo-ah dana tawh ka samkang na tun ding uhi,” a ci hi.