Read Zou PIENCILNA 47 Bible Online

PIENCILNA 47 - Zou bible

PIENCILNA 47

¹Tuaci’n Joseph pei-in Pharaoh kungah, “Ka pa le ka sanggamte, a tuuhonte, a bawnghonte ule a neisa zosie utawh Canaan gam panin ang pei uhi; tu-in Goshen gamah a om uhi,” a ci hi.

²Ama in a sanggamte lahah mihing nga zawpi-in Pharaoh kungah a peipi hi.

³Pharaoh in a sanggamte kungah, “Na nasep uh bang ahiei?” a ci hi. Amate in Pharaoh kungah, “Ka pu ka pate uh ma bangin na nasem kote tuucing ka hi uhi,” a ci uhi.

⁴Amate in Pharaoh kungah, “Tam gamah pemta dinga ang pei ka hi uhi; azieh pen Canaan gamah kielpi a natsiet ziehin khum munah na nasemte’ gantate neh ding hampa lohing a om nawn sih hi. Tu-in Goshen gamah na nasemte ei tengsah in, kang thum uhi,” a ci uhi.

⁵Tua ciengin Pharaoh in Joseph kungah, “Na kungah na pa le na sanggamte ang tung zo ta uhi.

⁶Nangma mai-ah Egypt leitang a om hi. Gam hoipen munah na pa le na sanggamte tengsah in; Goshen leitangah amate tengsah in; amate lahah mi pilvang a om lam na thei leh ka ganhingte kem dingin koi in,” a ci hi.

⁷Tua ciengin Joseph in a pa Jacob zawpi-in Pharaoh’ mai-ah laa a, tuale Jacob in zong Pharaoh thupha a pie hi.

⁸Pharaoh in Jacob kungah, “Kum bang za na pha tai?” a ci hi.

⁹Jacob in Pharaoh kungah, “Leisiet ka pemta hinkhuo khu kum za le kum sawmthum ahi hi; ka nuntah hun pen tomin hamsa hi. Kum sawtveipi pemta a na hi sung uh ka pate’ kumte tawh tekah thei ding ahi sih hi,” a ci hi.

¹⁰Tua ciengin Jacob in Pharaoh thupha a pie a, Pharaoh’ opna panin a pei hi.

¹¹Pharaoh’ thupieh bangin Joseph in amau’ nei dingin Egypt gama leitang hoipen ahi Rameses leitang pie a, tua sungah a pa le a sanggamte a tengsah hi.

¹²Joseph in a pa, a sanggamte, le a pa’ innkuonpi zosie a ne ding za tawh kituohin an a va hi.

¹³Tu-in ahile kielpi a natsiet seng ziehin gam zosie-ah an om nawn lo hi. Kielpi ziehin Egypt gam le Canaan gam a vulnaang gawp uhi.

¹⁴Egypt gam le Canaan gam sunga antang lei nadinga a khel uh sum kinga zosie Joseph in a kaikhawm hi; tuale Joseph in Pharaoh’ inn ah tua sum teng a puoh hi.

¹⁵Egypt gam le Canaan gam sunga sum zosie a tawp sieng zaw ciengin Joseph kungah Egypt mi zosie a pei vua, “An ei pie in! Bang dingin na muna-ah si ding ka hi uh ahei? Azieh pen ka sum teng uh tawp sieng zo hi,” a ci uhi.

¹⁶Joseph in dawng a, “Na sum uh a tawp sieng tah leh na ganhonte ei pie un. Keima in an kang pie ding a, na gante utawh i kikhel ding hi,” a ci hi.

¹⁷Tuaci’n amate in Joseph kungah a ganhonte a peipi uhi; tuale Joseph in sakolte, tuuhonte, bawnghonte, le laate khelna-in amate an a pie hi. Tua kumin amate an pie a, a ganhon zosie utawh a khelpieh hi.

¹⁸Tua kum a tawp zaw, a kumkia ciengin a peikia vua, “Ka sum uh a tawp lam ka pu kungah kang pha thei sih uhi. Ka ganta zosie ulah ka pu-a’ ahi ta hi. Ka pumpite ule ka mun ka gamte uh ci simlo ka pu’ muna-ah bangma om nawn lo hi.

¹⁹Nangma’ muna-ah kote le ka gam uh a siton ding ka ta uh amah? Koma le ka leitang uh an tawh ei khel in. Koma, ka leitang utawh Pharaoh’ sila ka hi ding uhi; kielsi loin ka hin nading ule ka gam uh a hawmsuo lo nadingin khaici ei pie in,” a ci uhi.

²⁰Tuaci’n Joseph in Pharaoh adingin Egypt gam zosie a lei hi. Amate tungah kielpi a natsiet ziehin Egypt mi zosie in a logamte uh a zuamang uhi; tuale leitang teng Pharaoh-a’ a suoh hi.

²¹Mihingte ahile, ama in Egypt mongkhat panin mong khat dongin amau’[169] sila-in bawl hi.

²²Ama in siempute’ leitang beh lei lo hi; bangzieh ahei cile siempute in Pharaoh kung panin a kiciengtan za an a nga vua, Pharaoh in a pieh an tawh amate a luhing thei uhi; tua ahi ziehin amate in a leitangte uh a zua sih uhi.

²³Tua ciengin Joseph in mite kungah, “Tu-in noma le na leitang uh Pharaoh adingin ka lei zo hi. Tam sungah note dingin khaici a om hi; leitang tungah vaw un.

²⁴Anlah hun ciengin Pharaoh tungah nga-a-khat na pie ding vua, nga-a-li pen khaici ding, noma le na innkuonpite le na tate an neh dingin na tang ding uhi,” a ci hi.

²⁵Amate in, “Ka hinna uh nei hun zo hi; ka pu uh lungdam heh, Pharaoh’ sila ka hi ta ding uhi,” a ci uhi.

²⁶Tuaci’n Pharaoh in nga-ah-khat nei ding hi, a ci pen, tuni donga a om, Egypt leitang tawh kisai-in Joseph in ngaina kip khatin a bawl hi. Siempute’ leitang beh Pharaoh-a’ suoh lo hi.

²⁷Tua ahi ciengin Egypt gam sung Goshen leitangah Israel teng hi; tua sungah neisa tampi nei-in suonlehlah tampi a pha uhi.

²⁸Egypt gamah Jacob kum sawm le kum sagi sung teng hi; tuaci’n Jacob’ khan kum za le sawmli le sagi ahi hi.

²⁹Israel a si ding hun a nai ciengin ama in a tapa Joseph hlanin a kungah, “Na mitmu-in maipha ka nga leh ka phei nei-ah na khut hing koi inlen, thuman thutah tawh nei bawl nadingin hing kiciem in. Egypt gamah ei vui poma sin.

³⁰Ka pu ka pate tawh ka lupton ciengin Egypt gam panin ka luong ei puo inlen, amau’ kivuina hanah ei vui in,” a ci hi. Ama in dawng a, “Na gen bangin ka bawl ding hi,” a ci hi.

³¹Ama in, “Ka kungah hing kiciem in,” a ci hi; tuale a pa kungah ama kiciem hi. Tua ciengin ama’ lupna khawhlung ah Israel a kunsuh hi.