Read Zou PIENCILNA 48 Bible Online

PIENCILNA 48 - Zou bible

PIENCILNA 48

¹Tami zaw ciengin Joseph kungah, “Na pa a cina hi,” ci-in kigen hi. Tuaci’n ama in a tate ni, Manasseh le Ephraim a zawpi hi.

²Jacob kungah, “Na tapa Joseph na kungah hing tung ta,” a kici ciengin ama in[170] a tha sanin lupna tungah a to hi.

³Jacob in Joseph kungah, “Canaan gam Luz khuo-a ka kungah Vanglien Pasien[171] hing kilahin thupha ei pie a,

⁴ama in keima kungah, “Nang kang ciphasah ding a, tampi-in kang khangsah ding hi; mi honpi khat kang suohsah ding a, nang zaw cienga na suonlehlahte in a nei zing dingin tam leitang ka pie ding hi,” ei ci hi.

⁵Tua ahi ziehin Egypt gam nangma kung kang tun masanga Egypt gam sunga a suoh na tapa nite tu-in keima-a’ ahi hi; Reuben le Simeon-te ma bangin Ephraim le Manasseh zong keima-a’ hi ding hi.

⁶Tuate zaw cienga a pieng ta le naute pen nangma-a’ hi ding hi. Amau’ gouluona tawh kisai-in a sanggamte’ minin amate kiciemte ding hi.

⁷Azieh pen Paddan panin ka pei lai-in Canaan gam Ephrath khuo tun kuon, Canaan gam lamkalah ka da ka kaa nadingin Rachel in ei na sisan a, Ephrath (tua pen Bethlehem) peina lampi-ah ama ka vui hi,” a ci hi.

⁸Jacob in Joseph’ tate a mu bepin, “Tam naupangte koi-a’ ahiei,” a ci hi.

⁹Joseph in a pa kungah, “Pasien in tam sunga ei pieh ka tapate ahi hi,” a ci hi. Ama in, “Thupha ka pieh thei nadingin hepina tawh ka kungah hing peipi in,” a ci hi.

¹⁰Tu-in Jacob a khangham ziehin ama in khuo a mu thei ta sih hi. Tuaci’n Joseph in ama kungah amate a peipi hi; tuale ama in amate tawpin a kawipom hi.

¹¹Israel in Joseph kungah, “Na maitang mu dingin ka kinem vawt sih hi; Pasien in tam sungah na tate zong ei musah hi,” a ci hi.

¹²Tua ciengin Joseph in ama gel a pa’ khup[172] panin ladawhin lei lam nga-in a kunsuh hi.

¹³Joseph in Ephraim’ zietlam khut, Jacob’ veilam khutah, Manasseh’ veilam khut, Jacob’ zietlam khutah a nipi-in ama gel kai-in ama lam nehin a peipi hi.

¹⁴Ahi vangin Jacob in a khut zahin a naupa Ephraim’ lu tungah ngam a, Manasseh a suoh masa pen ahi ziehin a khut kipaipe sahin a lu tungah a veilam khut ngam hi.

¹⁵Ama in Joseph thupha pie a, “Ka pu ka pa Abraham le Isaac in ama’ mai-ah a na peina Pasien, tuni dong ka hinkhuo vannuoi-ah ka tuucingpa ahi Pasien,

¹⁶sietna zosie panin ei tankhie vantungmi in naupangte thupha pie taheh; amate sungah keima’ min le ka pu ka pate ahi Abraham le Isaac’ minin kilo hinlen; amate mihonpi khatin leitungah pung ta uheh” a ci hi.

¹⁷A pa in Ephraim’ lu tungah a zietlam khut a koi pen Joseph in a mu ciengin lung kim lo hi; tuaci’n ama in a pa’ khut la dawh a, Ephraim’ lu tung panin Manasseh’ lu tungah koipieh hi.

¹⁸Joseph in a pa kungah, “Tua bang hi lo hi, ka pa aw! Tam pa a suoh masa zaw ahi ziehin na zietlam khut ama’ lu tungah koi in,” a ci hi.

¹⁹Ahi vangin a pa in a niel a, “Thei ing, ka ta aw, ka thei hi; ama zong mi nam khat suohin a lien ding hi. Ahi vangin ama sangin a naupa a lienzaw ding a, ama’ suonlehlahte minam honpi khat suoh ding uhi,” a ci hi.

²⁰Tuaci’n khum ni-in ama in amate thupha pie a, Note’[173] min tawh Israel-te thupha kipie ding a, ‘Ephraim le Manasseh bangin Pasien in note[174] hing bawl taheh,’ a ci ding uhi,” a ci hi. Tuaci’n ama in Manasseh mai-ah Ephraim a koi hi.

²¹Tua ciengin Jacob in Joseph kungah, “Kei a si ding ka hi ta a, ahi vangin Pasien in nang hing ompi-in na pu na pate’ leitangah ang peipikia ding hi.

²²Tu-in ka namsau le ka thalpi tawh Amor’ mite khut tung pana ka na lah ahi tanh[175] lah panin na sanggamte sangin tanh[176] khat a tamzaw-in kang pie hi,” a ci hi.