Read Zou PIENCILNA 49 Bible Online

PIENCILNA 49 - Zou bible

PIENCILNA 49

¹Tua ciengin Jacob in a tapate hlan a: “Ang tung ding hunte-ah na tung vuah bang teng ang pieng ding ci kang gen thei nadingin hing ki-im un, a ci hi.

²Jacob’ tapate aw, hing kikhawmin za unlen, na pa Israel’ thugen ngai un.

³Reuben, nang ka tapa tapen, ka thahatna le ka tacil, zalien pente tunga zalien pen le thunei pente’ tunga thunei pen na hi hi.

⁴Tuihuol bangin na sih ding a, tungnung pen zong na hi sih ding hi. Bangzieh ahei cile na pa’ lupna-ah na kato hi; nang[177] ka lupna tungah na ka a, ka lupna na buasah hi!

⁵Simeon le Levi, unau ahi hi; a namsaute uh pen tatsietna’ hiem ahi hi.

⁶Amau’ kikhopna-ah ei lutsah ngai sinlen; amate tawh ei kipawlsah sin. Bangzieh ahei cile amate lungthahin mi a that vua, amate in guolnop apmaina-in bawngtangte’ kapzahui a sattan pieh uhi.

⁷A lungthahna uh a zauhuoi a, a thangpaina uh a giinhuoi ziehin amate in samsiet nga ta uheh! Jacob sungah amate khenkhe-in amate Israel sungah ka thezah ding hi.

⁸Judah aw, na sanggamte in nang ang phat ding uhi; na galte’ ngawngah na khut a om ding hi; na mai-ah na pa’ tapate ang kun ding uhi.

⁹Judah, humpi khanglai ahi hi; ka ta aw, nangma in na samatsa na nehna panin na kipeito ta hi. Humpi apa bangin ama kize-in a lum hi. Humpi anu tawh a kibang ama koi in phong ngam ding ahei?

¹⁰Ama tungah sieh le kaih a tun masang, mite in ama’ thu a man masangin, Judah panin kumpi ciengkhut le ama’ keng kikala uhpa’ ciengkhut kikhin lo ding hi;[178]

¹¹Ama in lenggui-ah a sakolno khi-in, lenggui hoi penah a laano khi a, lenggazu sungah a puonte sawpin, lenggatui san sungah a puonsilte sawp hi;

¹²a mitte lenggazu sangin sanzaw a, a hate bawngnawi sangin kangzaw hi.

¹³Zebulun tuipi gei-ah teng ding a, tembaw khawlna mun suoh ding hi. Sidon khu ama’ gamgi hi ding hi.

¹⁴Issachar, a hat laa tawh kibang a, tuuhuong kikalah lum hi;

¹⁵ama in khawlna mun hoi khat le leitang nop tuoh khat mu hi. Tuaci’n ama in van puo dingin a liengko niemsah a, thona aana nasepna ah ama sila a suoh hi.

¹⁶Dan in Israel minam khat bangin a mipite thu a khen ding hi.

¹⁷Dan, lam gei-a gulpi hi ding a, lam dunga gul gunei hi ding hi. Sakol tunga tuong pa a thalpua nadingin ama in sakol’ ketul a tuhpieh hi.

¹⁸TOPA aw, keima in na hutdamna ka ngah hi.

¹⁹Misuomte in Gad sim ding a, ahi vangin ama in amau’ ketul a sim ding hi.

²⁰Asher’[179] a an tui ding a, ama in kumpi antuite a bawl ding hi.

²¹Naphtali, a kihla sakhipi ahi a, a melhoi sakhinote[180] a nei hi.

²²Joseph, singba gapha ahi a, ciatui gei-a po singba gapha hi-in, kul[181] tungah a bate a zam hi.

²³Thal kap siemte in nasie tahin ama a do vua, amate in thal tawh kapin ama a genthei bawl uhi.

²⁴Hinanle a thal nem ngai loin a bante[182] gang mama hi. Jacob’ Vanglien Pa’ khut, Israel Suongpi, Tuucingpa’ min,

²⁵ang hu ding na pa’ Pasien, thupha ang pie ding Vanglienpa[183], vantunga om thuphate, leinei a thuhna sunga thuphate, nawi le sul thuphate, na tungah ang pie hi.

²⁶Na pa’ thuphate pen kumtawn muolte’ thuphate, tawntung muoltangte’ thuphate[184] sangin a lienzaw hi. Tua thuphate, Joseph’ lu tung, a sanggamte lahah a kituomkoi pa’ talpang tungah hing tu taheh.

²⁷Benjamin khu ngie gilkiel ahi a, zingmawngin a sa mat nawmvalin, nitah ciengin a matsa teng a hawm hi,” a ci hi.

²⁸Tam teng zosie Israel minam sawm le nite ahi vua, tam pen a pa un amate khat ciet tawh kituohin thupha a pieh kawma a kung vua a gen thute ahi hi.

²⁹Tua ciengin ama in amate thuhilin a kung vuah, “Kei ka hi leh ka mite tawh a kigawm ding ka hi ta hi. Hit mi Ephron’ lolai-a suonghawm sungah ka pu ka pate tawh ei vuiton unlen,

³⁰tuami suonghawm khu Mamre nisuona lam Machpelah lomun Canaan gam sunga om ahi a, Abraham in hankhuh dinga a na leisa mun ahi hi.

³¹Tua munah Abraham le a zi Sarah kivui hi; tua mun ma-ah Isaac le a zi Rebekah zong kivui hi; tuale keima in tua munah Leah ka na vui hi.

³²A lo le a sunga om suonghawm pen Hit-te kung pana kilei ahi hi,” a ci hi.

³³Jacob in a tate thuhil a man zaw ciengin a lupna tungah laitat a, a nukhia pen a husangin a mipite kung a zuon ta hi.