Read Zou 2 SAMUEL 1 Bible Online

2 SAMUEL 1 - Zou bible

2 SAMUEL 1

¹Saul a si zaw, Amalek-te zo-in David a kilekia ciengin Ziklag ah David ni ni sung a taam hi.

²A ni thum ni-in a puon ki-ehmal, a lutanga leivui baang mi khat Saul’ giephuol panin a tung hi. David kung a tun bepin ama lei-ah bawhsuhin zatahna a pie hi.

³David in ama kungah, “Nang hei pana hing pei na hiei?” a ci hi. Ama in, “Israel giephuol pana hing suohta ka hi hi,” a ci hi.

⁴David in ama kungah, “Bang thu a om ei? Ei gen vawi!” a ci hi. Ama in, “Gal phuol panin galkapte a taimang vua, hinanle galkap tampitah pua-in a si uhi; tuale Saul le a tapa Jonathan zong a si hi,” ci-in a dawng hi.

⁵Tua ciengin David in ama kunga thu puoh tangvalpa kungah, “Saul le a tapa Jonathan a si lam bang na ci thei ahiei?” a ci hi.

⁶Ama kunga thu puoh tangvalpa in, “ Gilboa Muol ah ka va om kha ta hi. Tuale sakol leengte le sakol siemte in ama a na neh laitahun tua munah Saul a teipi tungah na kingam hi.

⁷A nualam a en leh kei ei mu-in ei hlan hi. Keima in ka dawng a, ‘Tanah om ing siepa,’ ka ci hi.

⁸Tuale ama in keima kungah, “Nang koi na hiei?” ei ci hi. Ke’n ka dawng a, ‘Amalek-te khat ka hi hi,’ ka ci hi.

⁹Ama in kei kungah, ‘Hing pei inlen ei that ta’n; azieh pen ka lel mama ta a, hizongle ka hing kenkon lai hi,’ ei ci hi.

¹⁰Tuaci’n a tungah dingin ama ka that hi. Azieh pen a pua zaw ciengin ama hing nawn sih va ci ka thei hi. A lu tunga om kumpi lukhu le a ban tunga om bantuom ladawhin tuate tam sunga ka pu kungah kang tut hi,” a ci hi.

¹¹Tua ciengin David in a puonte la-in botkeh hi; tuale a ompi mi zosie in zong tua bangma-in a bawl uhi.

¹²Tua ciengin Saul, a tapa Jonathan, TOPA’ galkapte le Israel innsung mite namsau tawh a si ziehun da-in kapin nitah dongin an a tang uhi.

¹³David in ama kunga thu puoh tangvalpa kungah, “Hei pana hing pei na hiei?” a ci hi. Ama in, “Kei Amalek-te pemta khat’ tapa ka hi hi,” ci-in a dawng hi.

¹⁴David in ama kungah, “TOPA’ sathau nu pa that dinga na khut na hlan mawngmawng na zau sih amah?” a ci hi.

¹⁵Tua ciengin David in tangvalte khat hlanin ama kungah, “Tanah hing pei inlen ama satlia in,” a ci hi. Tuaci’n ama in a satsuh pai a, ama a si hi.

¹⁶David in ama kungah, “Na sisan na lutungah tu taheh; bangzieh ahei cile na kamham in nangma langkhatah teci pang a, ‘TOPA’ sathau nu pa ka that zo ta hi,’ na ci hi,” a ci hi.

¹⁷David in tami kaala tawh Saul le Jonathan kaa a,

¹⁸(ama in Judah mite kungah tami “Thaltang[1] La” a kihil nadingin thu pie hi; tuami la Jashar Laibu sungah kigiel hi. Ama in:

¹⁹Israel aw, na minthanna, na munsangte tungah kithat! Mi hatte bangci pua sieng!

²⁰Gath ah gen sinlen, Ashkelon gawl lamah zong gen sin; tua hile Philistia tanute kipah ding a, a tep kitanlo mite’ tanute lungdamin a kipah ding uhi.

²¹No Gilboa muolte aw, daitui hile, guotui hile, ga nei logamte hile, na tung vuah omsah da un![2] Azieh pen mihatpa’ lum bua zo a, Saul’ lum sathau kinu nawn lo hi.

²²A kithat pa’ sisan panin, mi thahat pa’ thau panin, Jonathan’ thaltang kinuale loin, Saul’ namsau a guohkia sih hi.

²³Saul le Jonathan a kihe vua, a it huoi mama uhi! A si a hinun ama gel a kikhen vawt sih uhi; muvanlai sangin ama gel gangzaw a, humpi sangin zong ama gel hatzaw hi.

²⁴No Israel tanute aw, Saul ziehin kap un. Puonsan nel silin a nuom op ziuzieu, na puon tung vua kham kizepna suongte aw, ama ziehin kap un.

²⁵Galphuol sungah, mi hatte bangci pua! Na muol sangte tungah Jonathan kithat-in lum ta.

²⁶Nang ziehin ka lung a kham hi, sanggam Jonathan aw; nei itna a gol sengin, nei itna lamdang a, numei’ itna sangin lienzaw hi.

²⁷Mi hatte bangci pua, galhiemte bangci siet!” a ci hi.